Ezek 20:5 - ÎVUKU RÎA ÛVORO MWARO

⁵ Meere Ngai-Mûnene augîte atî, mûthenya ûrîa nie naathuurire andû a Isiraeli nîneranîre na mwîvîtwa kûrî njiarwa cia Jakovu na ngîîmenyithania kûrî o marî vûrûrirî wa Misiri. Nevîtire kûrî o ngiuga atî nie nînie Ngai-Mûnene Ngai wenyu.

Ezek 20:5 ပူးပေါင်းရင်းမြစ်များ

Kîam 14:22

Aburamu nîwamûcokerie atîrî, “Nie nîngwîvîta nîrî mbere ya Ngai-Mûnene, Ngai ûrîa ûrî Îgûrû Mûno, na ûrîa waûmbire îgûrû na nthî

1Atha 18:39

Rîrîa andû onthe moonire ûguo, nîmegwîthirie maturumithîtie mothiû mao nthî na makîanîrîra atîrî, “Ngai-Mûnene nîke Ngai! Ngai-Mûnene nîke Ngai!”

Thaburi 103:7

Nîwamenyithirie Musa maûndû marîa aavangîte gwîka, nîwonirie andû a Isiraeli ciîko ciake.

Thaburi 33:12

Kûrathimwa nî vûrûri ûrîa Ngai wa guo arî Ngai-Mûnene wao, kûrathimwa nî andû arîa athuurîte nîguo matuîke ake kîûmbe!

Ntha 3:16

Thiî ûnganie atongoria onthe a andû a Isiraeli vamwe na ûmere atî, Ngai-Mûnene, Ngai wa methe menyu, Ngai wa Iburahimu, Isaka na Jakovu nî arakuumîrîre. Meere nîmonete ûrîa andû a Misiri marameka,

Ntha 3:6

Nie nînie Ngai wa methe menyu ma tene, Ngai wa Iburahimu, Isaka na Jakovu.” Nake Musa nîwakunîkire ûthiû wake nîûndû nîwetigagîra kûroria Ngai.

Ntha 3:8

Kwoguo nie nyûrûrûkîte mbûke nîmatethûre kuuma kûrî andû a Misiri, nîmarute Misiri nîmavire vûrûri mwaro na mûnene. Vûrûri ûcio wîcûrîte îria na ûûkî, na nîkuo gûtûûragwa nî Akanaani, Ahiti, Amori, Aperizi, Ahivi na Ajebusi.

Ntha 4:31

Nao atongoria acio nîmeetîkirie. Na vîndî îrîa maamenyire atî Ngai-Mûnene nîamenyete ûrîa maarî na mathîna, nîmaaturumithirie ciongo ciao nthî na makîgooca Ngai-Mûnene.

Ntha 6:2

Nake Ngai nîwerire Musa atîrî, “Nie nî nie Ngai-Mûnene.

Ntha 6:3

Nînaumîrîre Iburahimu, Isaka na ngiumîrîra Jakovu ta Ngai Mwene Vinya Wonthe, nwatî ndiemenyithania kûrî o na njîra ya rîîtwa rîakwa rîrîa rîtheru, Ngai-Mûnene.

Ntha 6:8

Nanie nîngaamûvira vûrûrirî ûrîa nerîîre Iburahimu, Isaka na Jakovu atî nîngaamava na nîngaamûva guo ûtuîke wenyu. Nie nî Nie Ngai-Mûnene.’ ”

Isaia 43:10

Ngai-Mûnene arauga atîrî, “Mue Aisiraeli mûrî aira akwa; namûthuurire mûtuîke ndungata ciakwa, nîguo mûûmenye na mûmbîtîkie, gûtirî ngai îngî tiga Nie. Na mûmenye atî nie nînie Ngai, gûtirî ngai îngî yarî kuo mbere yakwa na gûtikaagîa.

Jeremia 33:24

“Nîkwa ûtarî mwîgu ûrîa andû marauga, atî Ngai-Mûnene nîmûreganu na nyomba igîrî irîa aathuurire, na nîcio Isiraeli na Juda. Andû acio nîmanyararîte andû akwa na matimonaga ta vûrûri.

Ezek 16:8

“Rîrîa navîtûkîrîre vakuvî nawe rîngî, nînoonire atî nama warî mwîrîtu mûkinyiu wa kûmbwa. Nînarutire nguo yakwa ya îgûrû ngîgûkunîka nîguo ûthithe njaga. Nîtwarîkanîre nawe atî nîtûkûvikania, nawe nîwatuîkire wakwa.” Ûguo nîguo Ngai-Mûnene arauga.

Ezek 20:15

Marî werûrî nînevîtire kûrî o ngiuga ndikaamavira vûrûrirî ûrîa naamaveete wîcûrîte îriia na ûûkî na mwaro gûkîra mavûrûri monthe,

Ezek 20:23

Makîria ma ûguo nînevîtire nîrî mbere yao kûu werûrî ngiuga atî, nîngaamanyagania gatagatîrî ka ndûrîrî ciîngî na ndûme mavirwe mavûrûrirî mengî.

Ezek 34:24

Nanie Ngai-Mûnene nîngaatuîka Ngai wacio, na ndungata yakwa Daudi nîagaatuîka mûnene wacio. Nie Ngai-Mûnene nînie mbugîte ûguo.

Ezek 35:11

Kwoguo, wata ûrîa nie, Mwathani Ngai-Mûnene ndûûraga mwoyo, ngaagwîka kûringana na marakara na wîru waku ûrîa wamonirie nîûndû wa kûmathûûra. Na rîrîa ngaamûverithia nîmakaamenya nie nîrî û.

Ezek 47:14

Nînevîtire ngiuga nîngava methe menyu vûrûri ûyû ûtuîke wao. Rîu gaîrani mîvîrîga yonthe icunjî ciîganene.

Danieli 12:7

Mûndû ûcio wekarîte mwena wa îgûrû wa rûnjî ekîrîte nguo mbaro, nîwaûkîrîrie njara ciake cioîrî na îgûrû. Nînaacokire ngîgua akîîvîta na rîîtwa rîa ûrîa ûtûûraga tene na tene akiuga atî, ‘Nî kavinda ka mîaka îthatû na nuthu. Vîndî îo andû arîa atheru a Ngai nîmagaatiga kûnyamarua na nîrîo maûndû monthe makethîrwa makîvinga.’

Alawi 18:2

ere andû a Isiraeli atîrî, “Nie nînie Ngai-Mûnene, Ngai wenyu.

Maariko 13:20

Nwatî Mwathani nîanyivanyivîtie mîthenya ya mathîna mau, nîûndû wa andû ake arîa ethuurîrîte. Tiga nî ûguo gûtirî mûndû ûngîgaatigara.

Gûco 14:2

Mue mûrî andû atheru a Ngai-Mûnene Ngai wenyu, na amwamûrîte gatagatîrî ka mavûrûri marîa mengî monthe ma nthî nîguo mûtuîke andû ake kîûmbe.

Gûco 32:40

Wata ûrîa Nie nîrî Ngai ûrîa ûtûûraga mwoyo, nîngûkîrîria njara nîîvîte atî,

Gûco 4:34

Kûrî ngai yanageria kûthiî kûruta andû vûrûrirî wîngî na kûmatua andû ake ta ûrîa Ngai aamwîkire mûrî Misiri? Ngai-Mûnene, Ngai wenyu nîwatûmîre ûvoti na vinya wake mwîngî wa mûkîonaga. Nîwatûmire andû a Misiri manyitwe nî mûthiro na mbaara, nîwaringire ciama na morirû magîkîka na agîtûma maûndû ma kûmakania mekîke.

Gûco 4:37

Ngai-Mûnene nîwendete methe menyu; kwoguo nîwamûthuurire kuuma kûrî njiarwa ciao na akîmûruta Misiri na vinya wake mûnene.

Gûco 7:6

Mue mûrî rûrîrî rûtheru rwa Ngai-Mûnene, Ngai wenyu. Ngai-Mûnene, Ngai wenyu aamûthuurire gatagatîrî ka andû onthe a nthî mûtuîke andû ake kîûmbe.

Gûco 7:7

“Ngai-Mûnene ndaamwendire na akîmûthuura nîûndû wa ûrîa mwarî eengî gûkîra andû a mavûrûri marîa mengî, nama mwarî anini mûno gûkîra mavûrûri marîa mengî ma nthî.

Kûguû 10:5

Nake mûraika ûcio nonire arûngamîte îriarî na nthî nyûmû nîwaûkîrîrie njara yake îgûrû,

Kûguû 10:6

na akîîvîta na rîîtwa rîa Ngai ûrîa ûtûûraga tene na tene, na waûmbire îgûrû, nthî, îria na indo cionthe irîa irî kuo. Nake nîwaugire atîrî, “Gûtirî na kavinda kengî ka gweterera!