Amosi 5:15 - ÎVUKU RÎA ÛVORO MWARO

¹⁵ Thûrani maûndû macûku na mwende maûndû maro, na mûrûmagîrîre kîvooto magootirî. Nwa kwîthîrwa Ngai-Mûnene, Mwene vinya wonthe nwa akinyîrie njiarwa cia Josefu irîa itigarîte wega wake.

Amosi 5:15 ပူးပေါင်းရင်းမြစ်များ

2Sam 16:12

Ngai-Mûnene avota kwona mînyamaaro yakwa, na ambîtîrîrie irathimo nyîngî makîria ya irumi irîa arumanîte ûmûnthî.”

1Atha 20:31

Ndungata ciake nîciamwîrire atîrî, “Nîtwîguîte atî athamaki a Isiraeli marî ntha. Twîtîkîrie twîrigice nguo cia macakaya ciûnorî cietû na twîrigice mîkanda ngingorî cietû tûthiî kûrî mûthamaki wa Isiraeli, avota kûrega gûkûûraga.”

2Atha 13:7

Jehoahazi ndaarî na athigari a mbaara maatigarîte tiga arûme mîrongo îtano (50) arîa mathiîcaga matwîte mbarathi, ikaari îkûmi (10) cia mbaara, na arûme ngiri îkûmi (10,000) arîa maathiîcaga na magûrû, nîûndû mûthamaki wa Sîria nîwacûkangîtie acio engî na akamakinyangîra nthî ta mûthetu.

2Atha 15:29

Vîndî îrîa Peka aarî mûthamaki wa Isiraeli nîrîo Tigilathi Pilesa, mûthamaki wa Asîria aanyitire matûûra ma: Ijoni, Abeli-bethi-maaka, Janoa, Kadeshi, Hazoru, Gileadi, na Galili, vûrûri wonthe wa Nafutali. Nîwacokire akîvira andû Asîria marî mîgwate.

2Atha 19:4

Nwa kwîthîrwe atî, Ngai-Mûnene Ngai waku nîwegwire maûndû monthe ma kûthekerera Ngai ûrîa ûtûûraga mwoyo marîa mûthamaki wa Asîria aatûmîte ndungata yake. Ngai-Mûnene Ngai waku aroîgua irumi icio na averithie acio marumanîte. Kwoguo voerani andû arîa matigarîte.”

Thaburi 119:104

Na njîra ya mawatho maku, nîngîcaga na ûtaûku, kwoguo nînthûrîte njîra cionthe cia maveeni.

Thaburi 34:14

Ûragîra maûndû marîa macûku na wîkage maûndû marîa maro; caragia thayû na ngoro yonthe.

Thaburi 36:4

Rîrîa amamîte avangaga gwîka maûndû marîa macûku, gûtirî ûndû mwaro ekaga, na ndareganaga na ûndû wa wonthe wa waganu.

Thaburi 37:27

Ûragîra maûndû macûku na wîkage maûndû marîa maro, nawe nîûgûtûûra vûrûrirî ûyû tene na tene;

Thaburi 80:1

We mûrîthi wa andû a Isiraeli tûthikîrîrie, we ûtongoragia njiarwa cia Josefu ta ndîthia ya ng'ondu. We wîkaragîra gîtî gîaku Kîam ûnene îgûrû rîa akerubi, onania ûnene waku.

Thaburi 97:10

Ngai-Mûnene nîendete andû arîa mathûrîte maûndû macûku, nîamenyagîrîra ûtûûro wa andû ake, nîamavonokagia kuuma kûrî andû arîa aganu.

Ntha 32:30

Mûthenya ûcio warûmîrîrîte Musa nîwerire andû atîrî, “Mue nîmwîkîte mevia macûku mûno. Nwatî rîu nîngunûkia kîrîmarî kûrî Ngai-Mûnene ngone kana Ngai-Mûnene nwa amwovere mevia menyu.”

Jeremia 18:8

naguo vûrûri ûcio narîtie ûvoro waguo ûgarûrûke ûtigane na maûndû macûku, nîngericûkwa ndige gûûcûkangia wata ûrîa navangîte.

Jeremia 22:3

Nie Ngai-Mûnene nîramwatha mwîkage maûndû ma kîvooto na ma ûthingu. Mûvonokie andû onthe arîa macunîtwe indo ciao kuuma kûrî arîa mamavinyagîrîria. Mûtigeke ûndû mûcûku kana mûnyamaria ageni, ciana irîa itarî methe, mûndûmûka wa ndigwa kana mûrage mûndû ûtarî na wîvia vandû ava.

Jeremia 31:7

Ngai-Mûnene arauga atîrî, “Inani na gîkeno nîûndû wa andû a Isiraeli, na mugîrîrie nîûndû wa vûrûri ûrîa mûnene, anîrîrani na mûkenerere mûkiugaga atî, ‘Ngai-Mûnene nîavonoketie andû ake, matigari ma andû a Isiraeli.’

Ezek 45:9

Ngai-Mûnene augîte atîrî, “Mue anene a andû a Isiraeli nîmwîvîtie vandû va kavinda karaca. Thirwani nî waganu na mûtige kûvinyanîrîria mwîkage maûndû ma kîvooto na ma waragania. Tigani kûvinyûria andû akwa kuuma vûrûrirî wao. Nie Ngai-Mûnene nînie nauga ûguo.

Danieli 2:49

Danieli nîwaûririe mûthamaki amûthuurîre Shadiraka Mîsheki na Abendinego, matuîke a kûrûngamagîrîra maûndû monthe ma vûrûri wa Babuloni. Nwatî Danieli ekarire kûu kwa mûthamaki.

Joeli 2:14

Nwa kwîthîrwa Ngai-Mûnene Ngai wenyu nîakwîricûkwa, na amûve irathimo cia irio nyîngî, mûcoke mûmûrutîre matega ma irio cia mûgûnda na ndivei.

Amosi 5:10

Mue nîmûthwîre arîa marûngamagîrîra kîvooto na arîa maragia ûûma îgootirî.

Amosi 5:24

Vandû va ûguo, tiga kîvooto kînyûrûrûkage ta karûnjî, na ûthingu ûnyûrûkage ta rûnjî rûtavûcaga.

Amosi 5:6

Cariani Ngai-Mûnene, namue nîmûgûtûûra mwoyo. Ethîrwa tîmûmûcaria nîakaamûthiria mue njiarwa cia Josefu na Mwaki. Mwaki nîûkavîvia atûûri a Betheli na gûtirî mûndû ûkaavota kûûvoria.

Amosi 6:12

Mbarathi nîivinyûragîra mathigarî? Andû nîmarîmaga îriarî na ndegwa? Nwatî mûgarûrîte kîvooto gîgatuîka ûrogi, na ûthingu ûgatuîka ûrûrû.

Amosi 7:3

Ngai-Mûnene, Ngai nîwericûkirwe gwîka ûndû ûcio na akiuga atîrî, “Ûndû ûcio tîwîkîka.”

Jona 1:6

Mûtwarithia wa meri nîwathiîre kûrî ke na akîmûria atîrî, “Ûngîvota kûmama ûguo atîa? Ûkîra ûvoye ngai waku! Ngai waku avota gûkwîguîra ntha na agatûvonokia tûtigakue.”

Jona 3:9

Ngai avota kwîricûkwa na atige kûrakara, na kwoguo tîtûkua!”

Mika 2:12

“Nwatî nama mue andû a Jakovu nîngaamûgomania vamwe, nîngaûngania andû a Isiraeli arîa matigarîte, nîmagomanie vamwe ta ng'ondu irî Kîamgarî, ta ndîthia nene ya ng'ondu irî kîthakarî, nîmûgaatuîka gîkundi Kîam andû eengî,”

Mika 3:2

Nwatî mue mûmenete maûndû marîa maro na mûkenda maûndû marîa macûku. Mûrutaga andû akwa rûûo, na mûgatinangia nyama kuuma mavîndîrî mao.

Mika 5:3

Kwoguo Ngai-Mûnene nîagaatiganîria andû ake, nginya rîrîa mûndûmûka ûrîa ûrî îvu agaaciara kavîcî. Nao andû ao arîa marî îthamîriorî nîmagaacokanîrîra rîngî na andû a Isiraeli.

Zefania 2:3

Cokererani Ngai-Mûnene mue muonthe arîa avoreri, mue arîa mwîkaga ûrîa kwagîrîrîte, cariani ûthingu cariani wînyivia. Kwavoteka ûkethîrwa ûtarî vamwe na andû arîa makaverithua, mûthenya ûrîa Ngai-Mûnene akonania marakara make.

Malaki 3:18

Namue nîmûkoona ngûrani ya mûndû ûrîa mûthingu na mûndû ûrîa mwaganu; na mûmenye ngûrani ya mûndû ûrîa ûtungatagîra Ngai, na ûrîa ûtamûtungatagîra.”

Aroma 12:9

Nwanginya wendani wenyu ûtuîke wa ma. Menani ûndû ûrîa mûcûku na mûnyitie na vinya maûndû marîa maro.

Aroma 7:22

Ngororî yakwa nîngenete nî ûndû wa watho wa Ngai.

Aroma 8:7

Kwoguo andû arîa mathagwa nî maûndû ma mwîrî methagîrwa marî ûthû na Ngai, nîûndû matiathîkagîra Watho wake, na matingîvota kûwathîkîra.

3Joh 1:11

Mûrata wakwa, ndûkarûmîrîre maûndû marîa macûku, nwatî rûmagîrîra maûndû marîa maro. Mûndû wa wonthe wîkaga waro nî wa Ngai, nake mûndû wa wonthe wîkaga maûndû macûku ndaanona Ngai.