Alawi 4:20 - ÎVUKU RÎA ÛVORO MWARO

²⁰ Ageeka na ndegwa îo wata ûrîa eekire na ndegwa ya îtega rîa kûtheria mevia. Nî akaaruta îgongoona nîûndû wa kûtheria wîvia wa andû wata ûguo, na nî makooverwa.

Alawi 4:20 ပူးပေါင်းရင်းမြစ်များ

Ntha 32:30

Mûthenya ûcio warûmîrîrîte Musa nîwerire andû atîrî, “Mue nîmwîkîte mevia macûku mûno. Nwatî rîu nîngunûkia kîrîmarî kûrî Ngai-Mûnene ngone kana Ngai-Mûnene nwa amwovere mevia menyu.”

Danieli 9:24

“ ‘Mîaka mûgwanja maita mîrongo mûgwanja, nî îvinda rîrîa Ngai amûrîte rîa kûthiria waganu, mevia; kwovera andû arîa mekîte maûndû macûku, kûrete thayû wa tene na tene, gwîtîkîra cioneki na ûrathi, na kûvaka vandû varîa vatheru Mûno maguta.

Alawi 1:4

Mûndû ûcio nî akaaigîrîra njara yake kîongorî Kîam nyamû îo îkûrutwa îrî îtega rîa kûvîvua, nayo nîgetîkîrîka nîûndû wake nîguo rîmûtherie mevia.

Alawi 12:8

“Ethîrwa mûndûmûka ndangîona ng'ondu, nîakaanenganîra ndutuura igîrî kana macîa maîrî. Îmwe ya îtega rîa kûvîvua nayo îo îngî ya îtega rîa kûtheria wîvia. Mûthînjîri-Ngai nîakaarûthîra mûndûmûka ûcio mambura ma kûmûtheria na nîakaathera.”

Alawi 14:18

Nîagetîrîria maguta marîa makethîrwa matigarîte rûvîrî rwake kîongorî Kîam mûndû ûcio ûkûtherua. Ûguo nîguo mûthînjîri-Ngai akaarûtha mambura ma kûtheria mûndû ûcio.

Alawi 15:15

Mûthînjîri-Ngai nîakaaruta îmwe yacio îrî îtega rîa kûtheria mevia nayo îo îngî arute îrî îtega rîa kûvîvua. Ûguo nîguo mûthînjîri-Ngai akaarûtha mambura ma kûtheria mûndûmûrûme arwarîte mûrimû wa kuuma mavira ciîgarî ciake cia ûciari.

Alawi 19:22

Nake mûthînjîri-Ngai nîakaarûtha mambura ma kûtheria mevia ma mûndûmûrûme ûcio na ndûrûme îo, na Ngai-Mûnene nîakaamwovera.

Alawi 4:21

Vuva wa ûguo, mûthînjîri-Ngai Mûnene nî agooca ndegwa îo na amîvire na kûu nja ya kûrîa matûûraga na amîvîvîrie kuo, wata ûrîa aavîvirie ndegwa îrîa yarutîtwe nîûndû wa kûtheria wîvia wake ke mwene. Rîrî nî îtega rîa kûtheria wîvia wa andû onthe.

Alawi 4:26

Nî agaacoka avîvîrie mathunya mayo monthe îgûrû rîa metha ya kîgongoona wata ûrîa avîvagia mathunya ma nyamû irîa ciûragagwa nîûndû wa matega ma ngwatanîro. Ûguo nîguo mûthînjîri-Ngai akaaruta îgongoona nîûndû wa kûtheria wîvia wa mûtongoria na mûtongoria ûcio nî akooverwa.

Alawi 4:35

Nî agaacoka arute mathunya monthe mayo, wata ûrîa mathunya ma ng'ondu îrîa îrutagwa nîûndû wa matega ma ngwatanîro marutagwa. Nî akaavîvîria mathunya mau vamwe na irio irîa irutîrîtwe Ngai-Mûnene îgûrû rîa metha ya kîgongoona. Ûguo nîguo mûthînjîri-Ngai akaaruta îgongoona rîa kûtheria wîvia wa mûndû ûcio na nî akooverwa.”

Alawi 4:8

Nî agooca mathunya monthe marîa marî nyamarî cia nda ma ndegwa îo,

Alawi 5:10

Nîagaacoka arute gîconi kîu kîngî rîrî îtega rîa kûvîvua kûringana na ûrîa watho ugîte. Ûguo nîguo mûthînjîri-Ngai akaaruta îtega rîa kûtheria wîvia wa mûndû ûcio na nîakooverwa.

Alawi 5:13

Ûguo nîguo mûthînjîri-Ngai akaaruta îgongoona rîa kûtheria wîvia wa mûndû ûcio na mûndû ûcio nî akoverwa. Mûtu ûcio wîngî nî wa mûthînjîri-Ngai, wata ûrîa gwîkagwa na matega ma irio cia mûgûnda.

Alawi 5:16

Nwanginya akaarîva kîrîa ataarîvîte na nwanginya ongerere tûcunjî mîrongo îîrî îgûrû rîa îgana. Nîakaavirîra mûthînjîri-Ngai, nake mûthînjîri-Ngai arute nyamû îo îrî îgongoona rîa kûtheria wîvia wa mûndû ûcio, na mûndû ûcio nîakooverwa.

Alawi 5:18

Nwanginya akaavirîra mûthînjîri-Ngai ndûrûme îtarî na wonje kuuma ndîthiarî yake îrî îtega rîa kûthiria wîvia. Naguo thogora wayo wîthîrwe ûrî mwîgana wa kîthimi kîrîa gîtîkîrîku. Mûthînjîri-Ngai nîakaaruta îgongoona rîa kûthiria wîvia ûrîa mûndû ûcio ekîte atakûmenya, na mûndû ûcio nîakooverwa.

Alawi 5:6

Nîakaarutîra Ngai-Mûnene îtega rîa kûtheria wîvia ûrîa ekîte, narîo îtega rîu rîkeethîrwa rîrî rîa mwatî kana nthenge. Nake mûthînjîri-Ngai nîakaaruta îgongoona nîûndû wa kûtheria wîvia wa mûndû ûcio na nîakooverwa.

Alawi 6:7

Mûthînjîri-Ngai nîakaaruta îgongoona rîa kûtheria wîvia wa mûndû ûcio, na mûndû ûcio nîakooverwa.”

Ndari 15:25

Mûthînjîri-Ngai nîakaarûtha mambura ma kûtheria andû onthe a Isiraeli, na nîmakooverwa nîûndû meevirie matakûmenya, na nîarutu îtega rîa kûvîvua na îtega rîa kûtheria mevia kûrî Ngai-Mûnene nîûndû wa mevia mao.

Ndari 15:28

Nake mûthînjîri-Ngai nîakaarutîra Ngai-Mûnene îgongoona rîa kûtheria mevia, nîûndû wa mûndû ûcio wîvîtie atakûmenya na mûndû ûcio nî akooverwa mevia make.

Aroma 5:11

Na twa ûguo tu, nwatî nîtûkenete nî Ngai nîûndû na njîra ya Jesû Kristû nîtûtuîkîte arata ake.

Agal 3:13

Nwatî Kristû nîwatuîkire kîrumi nîûndû wetû nîguo atûkûûre kuuma kûrî kîrumi kîrîa kîretagwa nî watho. Nîûndû Mandîko matheru maugîte atîrî “Mûndû wa wonthe mwambe mûtharavarî nî mûrume nî Ngai.”

Ahib 1:3

Ke onanagia ûkengu wa riiri wa Ngai na akonania mûvano wa ma wa ûrîa Ngai ekariî. Nîanyitîrîte nthî yonthe na kiugo gîake kîrîa kîrî vinya. Vuva wa kûtheria mevia ma mûndû, nîwekarire mwena wa ûrîo wa Ngai mwene vinya wonthe kûu îgûrû.

Ahib 2:17

Ûguo nî kuga atî nwanginya angîatuîkire ta aa mûrwang'ina na aa mwarwang'ina na njîra wa yonthe nîguo atuîke Mûthînjîri-Ngai ûrîa mûnene, mwîvokeku na ûrî ntha wîrarî wa Ngai nîguo atûme andû moverwe mevia mao.

Ahib 9:14

na kinthî nthakame ya Kristû ndîngîmatheria mûno! Ke nîwerutire na njîra ya Roho wa Ngai ûrîa ûtûûraga tene na tene, nîguo atuîke îgongoona rîkinyanîru kûrî Ngai. Kwoguo nthakame yake îkaatheragia thamiri cienyu, nîguo mûtigane na ciîko irîa iretaga gîkuû, nîguo mûtungatagîre Ngai ûrîa ûtûûraga mwoyo.

1Joh 1:7

Nwatî tûngîthiîra ûtherirî wata ûrîa ke arî ûtherirî, nwa tûgîe na ngwatanîro mûndû na ûrîa wîngî. Nayo nthakame ya Mûriû Jesû îgaatûtheragia kuuma meviarî monthe.

1Joh 2:2

Kristû ke mwene nîke ûtûmaga twoverwe mevia metû, na twa mevie metû tu, nwatî nî wana mevia ma andû onthe.

Kûguû 1:5

wana kuuma kûrî Jesû Kristû, Mûira ûrîa mwîvokeku, ûrîa wa mbere kûriûka na nwake Mwathi wa athamaki a nthî. Ke nîatwendete, na nîwatûkûûrire kuuma meviarî na nthakame yake