Akol 1:6 - ÎVUKU RÎA ÛVORO MWARO

⁶ Ûvoro mwaro wîkaraga ûkîgîcaga na maciaro na nîûvunjagua nthî yonthe. Ûndû ûyû nîmûtuîkîku wana nginya gatagatîrî kenyu, nîûndû kuuma mûthenya ûrîa mwambîrîrie kwîgua ûvoro mwaro, nîmwambîrîrie gûtaûkîrwa nî ûma wîgiî wega wa Ngai.

Akol 1:6 ပူးပေါင်းရင်းမြစ်များ

Thaburi 110:3

Mûthenya ûrîa ûkaathiî kûrûa na nthû ciaku, andû aku nîmakevecana na njîra ya kwîyendera. Ta ûrîa îme riumaga kîraûko tene, nîguo anake aku magaaûka kûrî we irîmarî irîa nyamûre.

Thaburi 98:3

Nîendete andû a Isiraeli na arî mwîvokeku kûrî o. Andû onthe a nthî nîmonete ûvootani wa Ngai wetû.

Mathaayo 24:14

Naguo Ûvoro Mwaro wîgiî Ûthamaki wa Ngai nîûkavunjua nthî yonthe wî ta ûira kûrî andû onthe, na vuva wa ûguo îthirîro rîcoke rîkinye.

Mathaayo 28:19

Kwoguo thiîni kûrî andû onthe arîa marî nthî yonthe mûkamatue arutwa akwa. Mavatithagieni na rîîtwa rîa Îthe, na rîa Mûriû na rîa Roho Mûtheru.

Maariko 16:15

Nake Jesû nîwamerire atîrî, “Thiîni nthî yonthe mûkavunjîrie andû onthe ûvoro mwaro.

Maariko 4:8

Mbeû ciîngî nacio nîciagwîre mûtheturî ûrîa warî mûnoru, ikîmera ikîneneva na igîciara mûno; imwe nîciaciarire maita mîrongo îthatû, ciîngî maita mîrongo îtandatû na ciîngî maita îgana.”

Johana 15:16

Mue tî mue mwanthuurire, nînie namûthuurire na ngîmûva wîra wa kûthiî kûgîa na maciaro meengî marîa magwîkara kavinda karaca. Kwoguo Vava akaamûvecaga kîndû wa kîonthe kîrîa mûkaamwîtagia na rîîtwa rîakwa.

Johana 17:19

Na nîûndû wao nie nînîyamûrîte ngûtungatîre nîguo wa nao meyamûre magûtungatîre na ma.

Johana 4:23

Nwatî kavinda nîgagûkinya karîa andû makaagoocaga Îthe wetû marî na Roho na ûma. Kavinda kau rîu nîgakinyu.

Ciîko 11:18

Nao etîkia acio megua ûguo nîmaathiririe ngarari na makîgooca Ngai makiugaga atîrî, “Kwoguo Ngai nîavete wana andû a ndûrîrî kanya ga kwîrira nîguo matûûre mwoyo!”

Ciîko 12:24

Nayo ndûmîrîri ya Ngai nîyathiîre na mbere na gûtamba na îgîkinyîra andû eengî.

Ciîko 16:14

Nake ûmwe wa arîa maatûthikîrîrie aarî mûndûmûka wetagwa Lîdia, warî wa kuuma îtûûrarî rîa Thîatira na warî mwendia wa nguo ciarî na rangi ya njambarawe. Ke aarî mûgooci Ngai, na Mwathani nîwavingûrire ngoro yake agîtûma îgue îkîenda kûthikîrîria maûndû marîa Paûlo aaragia.

Ciîko 26:18

Nîngûtûma ûthiî ûkamavingûre metho nîguo maume ndumarî maûke kûrî ûtheri, na maume vinyarî wa Caitani maûke kûrî Ngai. Na nîûndû wa kûmbîtîkia makovagîrwa mevia mao na makaavewa îgai vamwe na andû arîa Ngai athuurîte.’

Aroma 1:13

Ariû na aarî a Îthe wetû, nîngwenda mûmenye atî mavinda meengî nanavanga gûka kûrî mue nwatî ûndû ûkaga ûkandigîrîria. Mendaga gûka nîguo ndûme andû arîa engî matuîke arûmîrîri a Jesû Kristû wa ta ûrîa nekire kûrî andû a ndûrîrî.

Aroma 15:19

na njîra ya kûgîa na vinya wa kûringa ciama na gwîka maûndû ma magegania, na na njîra ya vinya ya Roho Mûtheru. Kwoguo kuuma Jerusalemu nthiûrûrûkîte kûndû kuonthe na ngakinya Iluriko ngîvunjagia Ûvoro Mwaro wa Kristû.

Aroma 15:28

Narîkia kwona atî andû a kanitha wa Jerusalemu nîmamûkîra ûtethio ûrîa wavecanîtwe nîûndû wao, nîngaaûkîrîra kûu kwenyu ngîthiî Sipania.

Aroma 16:26

Na rîu, maûndû marîa mandîkîtwe nî arathi nîmatûmîte ûndû ûcio ûmenyeke. Ngai ûrîa ûtûûraga tene na tene nîwathanire atî ûvoro ûcio ûmenyithue andû onthe a nthî nîguo onthe metîkie na mathîkîre Ngai.

2Akor 10:14

Tûtiaruta wîra makîria ya ûrîa twagîrîrwe nî kûruta vîndî îrîa twaûkire kwenyu rîa mbere, kûmûretere Ûvoro mwaro wîgiî Kristû.

2Akor 6:1

Tûkîrutithania wîra wetû vamwe na Ngai, nîtûramûthaitha mûtikamûkîre wega wa Ngai mana.

Aefeso 3:2

Nîrî na ma nîmwîguîte atî Ngai na njîra ya wega wake nîwamûvere wîra ûyû nîûrute nîûndû wenyu.

Aefeso 4:21

Nîrî na ma atî nîmwîguîte ûvoro wîgiî Kristû na mûrî ake. Kwoguo nîmûthomithîtue ûma ûrîa ûrî ndaarî ya Jesû.

Aefeso 4:23

Ngoro cienyu na meciria menyu nwanginya icerûvue.

Aefeso 5:9

nîûndû ûtheri nîguo ûretaga maûndû monthe maro, ma ûthingu na ma ma.

Afil 1:11

Nayo mîtûûrîre yenyu îkeethagîrwa îcûrîtwe nî maûndû maro marîa maumanaga na ûthingu ûrîa ûvecanagwa nî Jesû Kristû tu nîûndû wa riiri na ngumo ya Ngai.

Afil 4:17

Nie ndirenda iveo kuuma kûrî mue, nwatî nîrenda mûgîe na maciaro marîa maumanaga na ûvecani.

Akol 1:10

Namue mûkaavotaga gûtûûra ta ûrîa Mwathani endaga na mûgeekaga maûndû marîa makenagia Mwathani vîndî cionthe. Namue mûkaagîcaga na maciaro maro maûndûrî monthe marîa mûgekaga na mûgakîragîrîria kûmenya Ngai.

Akol 1:23

Kwoguo nwanginya mûthiî na mbere gwîkara mwîkindîrîtie wîtîkiorî wenyu na mûrî na vinya. Mwîrîgîrîro ûrîa mwagîre naguo rîrîa mwegwire ûvoro mwaro, mûtikanetîkîre wenyenyue. Nie Paûlo nîrî ndungata ya ûvoro mwaro ûrîa wîthîrîtwe ûkîvunjîrua andû a nthî yonthe.

1Ath 1:5

Nîûndû rîrîa twamûretere Ûvoro Mwaro tûtiamûretera na ciugo ntheri, nwatî twamûretere ûrî na vinya na ûrî na Roho Mûtheru na tûkîmenyaga waro atî nî wa ma. Mue nîmwîcî ûrîa twatûûraga rîrîa twarî namue. Twatûûraga ûguo nîûndû wenyu.

1Ath 2:13

Na kûrî ûndû wîngî ûtûmaga tûcokie ngatho kûrî Ngai tûtagûtigithîrîria. Vîndî îrîa twamûretere ndûmîrîri ya Ngai, nîmwamîgwire na mûkîmîtîkîra. Mûtiamîtîkîra ta ndûmîrîri ya andû nwatî mwamîtîkîre ta ndûmîrîri ya Ngai na nî ma nî ya Ngai na nîyo îraruta wîra ndaarî yenyu mue arîa mwîtîkîtie.

2Ath 2:13

Ariû na aarîa îthe wetû, nwanginya tûcokagie ngatho kûrî Ngai vîndî cionthe nîûndû wenyu mue arîa mwendetwe nî Mwathani. Nîûndû Ngai nîwamûthuurire mûrî a mbere nîguo amûvonokie na njîra ya kûtherua nî Roho mûtheru na gwîtîkia ûvoro wa ma.

1Pet 5:12

Namwandîkîra maarûa îno nini ûguo ngîtethagîrîrua nî Silivano, ûrîa mbîcî nî mûkristiano wa tatue na nî mwîvokeku. Nîrenda kûmûmîrîria na nîmûrutîre ûira wakwa nîmwîre atî, ûyû nîguo wega wa ma wa Ngai. Îkaragani mwîkindîrîtie ndaarî yaguo.