Vuva wa maûndû mau, Ngai-Mûnene nîwaumîrîre Aburamu na njîra ya kîoneki na akîmwîra atîrî, “Aburamu, tiga kwîgua guoya. Nie nîngaakûgitîra kuuma kûrî mogwati na nîngaakûva kîveo kînene.”
Mûthamaki Daudi nîwerire Solomoni atîrî, “Mwana wakwa, ûmenye Ngai wa aguo na ûmûtungatagîre na ngoro yonthe na meciria marî na wendi. Ngai-Mûnene nîatuîragia ngoro cionthe na nîamenyaga meciria na mîvango yacio. Ûngîmûcaria, ke nîagûgwîtîkîra. Nwatî ûngîmûrega nîagûgûtiganîria nginya tene na tene.
Mue rûciaro rûrû, thikîrîriani ciugo cia Ngai-Mûnene. Nîkwa mbîthîrîtwe mbîkariî ta werû kûrî andû a Isiraeli, kana vûrûri ûrî na nduma nene? Nîndûî vi gîtûmaga andû akwa mauga atî, “Tûrî na wîathi na tûtigaûka kûrî we rîngî?”
Ngai-Mûnene nîwacokire akîra Musa na Aroni atîrî, “Nîûndû nîmwaregire kûmbîtîkia na kwonania ûtheru wakwa mbere ya andû a Isiraeli, mûtigaakinyia andû aya vûrûrirî ûrîa namaveere.”
Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku.
Nîûndû Watho wa Musa ndûngîatuire ûndû wana ûrîkû mûkinyanîru. Nwatî rîu nîtûvetwe kîîrîgîrîro kîngî Kîamro makîria ya kîrîa gîtûmaga tûthiî vakuvî na Ngai.
Kwoguo ariû na aarî a îthe wetû, geragiani na kîîo mûno kwona atî na ma nîmwîtîtwe na mûkathuurwa nî Ngai. Ethîrwa nîmûgwîka ûguo, mûtigatiganîria wîtîkio wenyu.
Kwoguo arata akwa ende, wa mûgîetagîrîra Mûthenya ûcio, geragiani wa ûrîa mûngîvota nîguo mwîthagîrwe mûrî atheru na mûtarî na ûcuke mbere ya Ngai, na mûrî na thayû.