Aefeso 4:14 - ÎVUKU RÎA ÛVORO MWARO

¹⁴ Tûtigaacoka gûtuîka ta ciana irîa cikanagua na mbere na igaikanua na vuva na ikaveenererua nî arimû a maveeni a mîthemba yonthe. Acio nîo mavîtithagia andû arîa engî nîûndû wa mawara marîa matungîte.

Aefeso 4:14 ပူးပေါင်းရင်းမြစ်များ

Thaburi 10:9

metagîrîra methithîte ta mînyambû, metagîrîra andû arîa athîni, mamanyitaga na mîtego yao na makathiî nao.

Thaburi 59:3

Taroria! Manîînthithîrîte nîguo mambûrage; andû aganu maûnganîte nîguo mambûkîrîre. Gûtirî wîvia kana mavîtia mbîkîte,

Isaia 28:9

Manthekagîrîra makîûragia atîrî, “Mûrathi ûcio arenda kûthomithia û? Areciria nîagûtûtarîria ndûmîrîri yake? Tue tûrî ciana cia ngenge irîa iratigithirue kwonga?

Mika 7:2

Gûtirî mûndû wîvokete Ngai mûtigaru gûkû nthî, na gûtirî mûndû wathîkagîra Ngai. Gûtirî mûndû wana ûmwe mwîvokeku ûtigarîte, onthe methagîrwa magîcaria kanya ga kûûragana. Wa mûndû acaragia ûrîa angînyitithia mûndû ûrîa wîngî.

Mathaayo 11:7

Na rîrîa arutwa a Johana maaumagarûkaga, Jesû nîwambîrîrie kwîra kîrîndî ûvoro wîgiî Johana na akiuga atîrî, “Vîndî îrîa mwathiîte werûrî, mwendaga kwona ndûî? Nî karûthanje gakinainua nî rûkûngi?

Mathaayo 24:11

Arathi eengî a maveeni nîmagaacoka meyumîrie na mavîtithie andû eengî.

Mathaayo 24:24

Nîûndû Mesaya a maveeni na arathi a maveeni nîmakeyumîria. Nîmakoonania ciama na morirû nîguo mangîvota mavîtithie andû arîa Ngai ethuurîrîte.

Ciîko 23:21

Nwatî ndûgetîkîre nîûndû nîkûrî na andû makîria ya mîrongo îna makwîthitha na mamweterere. O nîmarîkîtie kwîvîta atî matingîrîa kana manyue kîndû matambîte kûûraga Paûlo. Nîmevarîrîtie gwîka ûguo na nîkwa metererete îtua rîaku.”

1Akor 12:2

Mue nîmwîcî ûrîa mwatûûraga vîndî îrîa mûtaarî atuîku etîkia. Nîmwavîtithagua na njîra nyîngî nîguo atî mûgoocage mîvuanano îtarî mwoyo.

1Akor 14:20

Ariû na aarî a îthe wetû, tigani gwîciiragia ta ciana. Maûndûrî marîa macûku tuîkani ta twana twa tûkenge, nwatî meciriarî menyu tuîkani ta andû agima.

1Akor 3:19

Nîûndû kîrîa andû a gûkû nthî metaga ûûgî, Ngai agîtaga ûrimû. Kwandîkîtwe mandîkorî matheru atîrî, “Ngai atûmagîra wara wa andû arîa aûgî ûrî ta mûtego wa kûmatega.”

2Akor 2:17

Kwoguo tue tûtiîkariî ta andû amwe eengî arîa manyitaga ndûmîrîri ya Ngai ta kîndû gîtarî vata. Nwatî nîûndû Ngai nîke ûtûtûmîte, twaragia tûrî na ûma mbere yake ta ndungata cia Kristû.

2Akor 4:2

Nîtûreganîte na maûndû ma nthoni marîa mekagîrwa nthithorî. Nîtûreganîte na maûndû ma wara, kana kûgarûrania ciugo cia Ngai ituîke cia maveeni. Nwatî twaragia ûvoro wa ma tûrî mbere ya Ngai tûkîîrîgagîrîra atî andû onthe arîa marî na thamiri mbaro nîmagûtwîtîkîra.

Agal 3:1

Mue Agalatia aya aritu! Nû wamûrogire? Nîmwataarîrue waro ûrîa Kristû aakwire arî mûtharavarî.

Aefeso 6:11

Îkîrani indo cionthe cia mbaara cia Ngai nîguo mûvotage kwîgitîra kuumana na mawara macûku ma Ngoma.

1Tim 3:6

Mûtongoria wa kanitha agîrîrwe nî kwîthîrwa arî mûndû ûtarî mwîthî wîtîkiorî, nîguo ndakagîe na mwîtîîo mwîngî na atuîrwe wata ûrîa Ngoma aatuîrîrwe.

2Tim 1:15

Nîwîcî atî andû onthe vûrûrirî wa Asia nîmandiganîrîtie, amwe ao nî Fugelo na Herimogene.

2Tim 3:13

Nwatî andû arîa aganu na arîa maveenanagia nîkwa makaathiîcaga na mbere gûcûka. Andû acio makaaveenanagia na makîveenagua.

2Tim 4:3

Mavinda nîmagaûka rîrîa andû makaarega kûthomithua maûndû marîa magîrîrîte. Nwatî nîmakeyûnganîria arimû ao kûringana na merirîria mao. Arimû acio nîmakaamakenia, nîûndû makaaragia maûndû marîa matû mao mendete kwîgua.

Ahib 13:9

Mûtigetîkîre kûvîtithua nî mîthomithanîrie mîgeni îrîa îrî kuo ya mîthemba mîîngî. Nî waro ngoro igîcage na vinya kuuma kûrî wega wa Ngai, nwatî tî kuumana na kwathîkîra mawatho megiî irio. Nîûndû arîa mathîkagîra mawatho mama matîtethekaga nîmo.

Jakuvu 1:6

Nwatî nwanginya etie arî na wîtîkio na atarî na nganja. Mûndû wa wonthe ûgîcaga na nganja ekariî ta ndivû cia manjî ma îria irîa cikanagua na ivurutanagua nî rûkûngi.

Jakuvu 3:4

Îcirieni ûvoro wa meri: înarî nene ûguo na îtwarithagua nî rûvuvo rûrî na vinya ûguo, nî îvotaga kûgatwa nî kîgati kînini na îkathiî wa kûrîa kuonthe mûtwarithia wayo endaga îthiî.

2Pet 2:18

Nîecari na nîmaragia maûndû ma ûrimû. Na njîra ya merirîria mao macûku ma mwîrî, nîmathaagîrîria andû arîa mambîrîrîtie kûthengutîra andû arîa matûûraga mavîtagia.

1Joh 2:19

Andû aya nama matiarî a gîkundi gîetû, kwoguo nîmaatûtigire. Maangîethîrwe marî a gîkundi gîetû nîmangîekaranirie natue. Nwatî nîmaatûtigire nîguo kûonekane waro atî matiarî etû.

1Joh 2:26

Nîramwandîkîra ûvoro wîgiî andû arîa marageria kûmûvîtithia.

1Joh 4:1

Arata akwa, mûtigetîkagie andû onthe arîa maugaga atî marî na Roho. Nwatî ambagani mûkamaroria waro nîguo mûmenye kana roho ûrîa marî naguo umîte kûrî Ngai nîûndû kûrî na arathi eengî a maveeni meyumîrîtie gûkû nthî.

Juda 1:12

Andû acio maticonokaga vîndî îrîa makûrîcanîra namue mekariî ta maroro ma gîko vîndî îrîa mûrî marugarî ma ngwatanîro. O merîthagia o ene tu. Mekariî ta matû matarî mbura, marîa mavurutagwa nî rûkûngi. Mekariî ta mîtî vîndî ya thano îrîa îtagîcaga na maciaro. Mekariî ta mîtî mîkûûre na îkaûma viû.

Kûguû 19:20

Nayo nyamû nîyanyitirwe wa vamwe na mûrathi wa maveeni ûrîa waringaga ciama îrî vo. (Na njîra ya ciama icio, mûrathi ûcio wa maveeni nîwavîtithirie arîa maarî na rûûri rwa nyamû na maagoocete mûvuanano wayo.) Nyamû îo na mûrathi ûcio wa maveeni nîmaaikirue marî mwoyo îriarî rîa mwaki ûrîa wakanaga na ûviriti.