2Tim 3:15 - ÎVUKU RÎA ÛVORO MWARO

¹⁵ Na ûririkane atî kuuma ûrî mwana nîwecî mandîko marîa matheru marîa mangîtûma ûgîe na ûûgî wa gwîtîkia Jesû Kristû ûkînavonoka.

2Tim 3:15 ပူးပေါင်းရင်းမြစ်များ

2Maû 34:3

Mwakarî wa kanana (8) kuuma Josia atuîka mûthamaki wa Juda, vîndî wa îo arî mwanake, nîwambîrîrie kûgooca Ngai wa îthe Daudi. Mwakarî wa îkûmi na îîrî (12) Josia arî mûthamaki, nîwambîrîrie gûcûkangia kûrîa kwagoocagîrwa mîvuanano, Ashera, ngai ya mûndûmûka na mîvuanano îrîa îngî yonthe kûu Juda na Jerusalemu.

Thaburi 19:7

Watho wa Ngai-Mûnene nî mûkinyanîru, nî ûvecaga mûndû vinya mûcerû. Maathani ma Ngai-Mûnene nî ma kwîvokeka, nîmavecaga ûûgî arîa matarî naguo.

Thaburi 71:17

We Ngai, ûtwîre ûnthomithagia kuuma nîrî mûnini, na managîrîre ciîko ciaku cia magegania.

Nthi 22:6

Thomithia mwana njîra îrîa agîrîrwe nî kûthiîra, na wana akûra ndakaariganîrwa nîyo.

Nthi 8:17

Nîmendete arîa mamendete, na arîa manjaragia na kinyi nîmamonaga.

Mûvunjia 12:1

Ririkanaga ûrîa wakûmbire vîndî îrîa ûrî mwîthî, mbere ya kavinda gakinya rîrîa ûkaauga atîrî, “Ndirakenerera ûtûûro.”

Danieli 10:21

Nwatî nîngaakwîra ûrîa kwandîkîtwe îvukuurî rîa ûma. Ndirî na wa kûndethia kûrûa na nthû ino tiga Mikaeli, mûraika ûrîa ûmûgitagîra.

Mathaayo 22:29

Nake Jesû nîwamacokerie atîrî, “Na kaî mûrî avîtiu-î! Na gîtûmi nî atî mûtiîcî mandîko matheru kana vinya wa Ngai.

Luka 1:15

Nîûndû nîagaatuîka mûndû mûnene methorî ma Mwathani. Nake ndakaanyua ndivei wana kana anyue njovi. Kuuma gûciarwa gwake nîakethîrwa ecûrîtwe nî Roho Mûtheru.

Luka 2:40

Nake mwana ûcio nîwakûrire na akîgîa na vinya; na nîwecûrîtwe nî ûûgî na wega wa Ngai warî îgûrû rîake.

Luka 24:27

Jesû nîwacokire akîmeereithia maûndû marîa mamwîgiî na maarîtue Mandîkorî Matheru, kwambîrîria na mavuku ma Musa nginya marîa maandîkirwe nî arathi onthe.

Luka 24:32

Nao nîmaambîrîrie kûrania atîrî, “Na kinthî ngoro cietû itikûrîrîmbûkaga vîndî îrîa agûtwaragîria na gûtûtaarîria Mandîko Matheru tûrî njîrarî?”

Luka 24:45

Nake Jesû nîwamavotithirie gûtaûkîrwa nî Mandîko,

Johana 5:47

Nwatî angîthîrwa mûtiîtîkîtie ûvoro ûrîa aandîkire, mûngîvota atîa vi gwîtîkia ûrîa nie mbugîte?”

Ciîko 10:43

Arathi onthe nîmaarutire ûira wîgiî Jesû, na makiuga atî andû onthe arîa mamwîtîkîtie nîmakooverwa mevia mao na vinya wa rîîtwa rîake.”

Ciîko 13:29

Na vîndî îrîa maarîkirie gwîka maûndû monthe marîa maamwîgiî marîa maandîkîtwe Mandîkorî Matheru, nîmaamûcurûkirie kuuma mûtharavarî îgûrû na makîmûthika mbîrîrarî.

Ciîko 16:1

Nake Paûlo nîwathiîre Deribe na agîcoka akîthiî Listra, kûrîa Mûkristiano ûmwe wetagwa Timotheo aatûûraga. Ng'ina, ûrîa wa nake warî Mûkristiano, aarî Mûyahudi, nwatî îthe aarî Mûngiriki.

Ciîko 17:2

Nake Paûlo nîwathiîre îvoerorî wata ûrîa aamenyerete gwîka. Na kwa îvinda rîa ciumia ithatû, nîwaranîrie na Ayahudi ûvoro wîgiî mandîko matheru.

Ciîko 26:24

Rîrîa Paûlo eetetagîra na njîra îo, Fesito nîwamûgûkirie akîmwîra atîrî, “We Paûlo wî na ngoma. Kîthomo kîu gîaku kînene nîkîo kîratûma ume ngoma!”

Aroma 1:2

Tene Ngai nîweranîre Ûvoro Mwaro na njîra ya arathi wata ûrîa kwandîkîtwe mandîkorî matheru.

Aroma 16:26

Na rîu, maûndû marîa mandîkîtwe nî arathi nîmatûmîte ûndû ûcio ûmenyeke. Ngai ûrîa ûtûûraga tene na tene nîwathanire atî ûvoro ûcio ûmenyithue andû onthe a nthî nîguo onthe metîkie na mathîkîre Ngai.

Aroma 2:27

Kwoguo andû a Ndûrîrî arîa matarî aruu mwîrî nwatî nîmathîkagîra watho, nîmakaamûtuîra ciira mue Ayahudi arîa mûrî na watho mwandîke na nîmûruaga nwatî mûtiathîkagîra watho ûcio.

1Akor 1:21

Kûringana na ûûgî wake, Ngai nîwatûmire andû matikaamûmenye na njîra ya ûûgî wao. Vandû va ûguo, na njîra ya ndûmîrîri îo îtucagwa ya “ûrimû” îrîa tue tûvunjagia, Ngai nîwatuire atî nîakaavonokia arîa mamwîtîkîtie.

Aefeso 6:4

Mue aciari tigagani gwîka ciana cienyu maûndû marîa mangîtûma irakare. Vandû va ûguo, imenyagîrîreni na mûitaarage ciîkage wata ûrîa mûndû ûrîa wîtîkîtie Mwathani agîrîrwe nî gwîka.

Gûco 4:6

Mathîkagîreni na kinyi na mûmavingagie. Ûndû ûyû nîguo ûgaatûmaga mwonwe nî andû a mavûrûri marîa mengî mûrî aûgî na mûrî na ûmenyo mwîngî. Andû megua mawatho mau monthe makaaugaga, ‘Nama andû aya a vûrûri ûyû marî na ûûgî na ûmenyo mwîngî mûno!’

1Tim 4:13

Thiî na mbere kûthomera andû mandîko matheru, kûmaûmîrîria na kûmathomithia nginya rîrîa ngaacoka.

2Tim 1:1

Kuuma kûrî Paûlo mûtûmwa wa Jesû Kristû nî ûndû wa kwenda kwa Ngai, ndûmîtwe ngavunjie ûvoro mwaro wa tene na tene ûrîa ûvecanagwa nî Jesû Kristû.

2Tim 1:5

Nîndirikanaga wîtîkio waku ûrîa ûtarî ûvinga. Wîtîkio wata ûyû nîguo warî na ûcûguo Loisi na nyûkwe Eunîci. Nîrî nama atî wîna wîtîkio wata ûcio wao.

2Pet 3:16

Ûguo nîguo augîte maarûarî ciake cionthe rîrîa rîonthe andîkîte îgûrû rîa ûvoro ûyû. Maûndû mamwe marî maarûarî cia Paûlo nî maûmû mûno mûndû gûtaûkîrwa nîmo. Nao andû arîa methagîrwa matarî athomu na arîa matekindîrîtie wîtîkiorî nîmataaragîria maûndû mau na njîra ya maveeni, wata ûrîa mataaragîria icunjî irîa ciîngî cia Mandîko Matheru. Kwoguo nîmethiragia o ene.

Kûguû 19:10

Nînegwîthirie nthî mbere yake nîmûgooce, nwatî ke nîwambîrire atîrî, “Tiga gwîka ûguo! Nie ndungatagîra Ngai wa tawe na etîkia arîa engî onthe evokeku. Acio nî arîa marûmagîrîra ûira wa Jesû. Goocani Ngai arî ke!” Nîûndû ûira ûrîa ûguûragwa nî Jesû nîguo ûtûmaga arathi manîrîre ndûmîrîri ya ûkristiano.

1Sam 2:18

Samueli nîwathiîre na mbere gûtungatîra Ngai-Mûnene ekîrîte nguo îrîa yarathimîrîtûe wîra ûcio.