2Maû 31:10 - ÎVUKU RÎA ÛVORO MWARO

¹⁰ Nake Azaria, mûnene wa athînjîri-Ngai ûrîa warî wa kuuma nyomba ya Zadoku nîwacokerie Hezekia atîrî, “Kuuma vîndî îrîa andû maambîrîrie kûreta matega mao hekarûrî, twîthîrîtwe tûrî na irio mbîganu cia kûrîa na igatigara nyîngî nîûndû Ngai-Mûnene nîmûrathimu andû ake. Kîu nîkîo gîtûmîte twîthîrwa tûrî na indo ino nyîngî ûguo itigarîte.”

2Maû 31:10 ပူးပေါင်းရင်းမြစ်များ

Kîam 26:12

Mwaka ûcio Isaka nîwavandire mbeû mûgûndarî ûcio, na nîwakethire maita îgana rîa mbeû îrîa aavandîte, nîûndû Ngai-Mûnene nîwamûrathimîte.

Kîam 39:23

Mûrûngamîrîri wa njera ndaatindanagîra na ûndû wana ûrîkû wa marîa meethagîrwa makîmenyererwa nî Josefu, nîûndû Ngai-Mûnene aarî vamwe na Josefu. Ûndû wa wonthe ûrîa Josefu eekaga Ngai-Mûnene nîwatûmaga ûmûthatûke.

Kîam 39:5

Kuuma Josefu aatuîka ndungata na mûrûngamîrîri wa indo cia Potifa, Ngai-Mûnene nîwarathimire mûciî wa Mûmisiri ûcio vamwe na indo ciake irîa ciarî mûciî na irîa ciarî mûgûndarî.

1Atha 2:35

Mûthamaki nîwatuire Benaia, mûvîcî wa Jehoiada mûnene wa athigari a mbaara vandûrî va Joabu, agîcoka agîtua Zadoku mûthînjîri-Ngai vandûrî va Abiatharu.

1Maû 29:16

We Ngai-Mûnene, Ngai wetû tûnganîtie indo ino cionthe na wîngî nîguo tûgûtumîre hekarû nîguo tûve rîîtwa rîaku rîtheru gîtîîo. Cionthe ciumîte kûrî we, na nî ciaku.

1Maû 6:14

Azaria aarî îthe wa Seraia, Seraia aarî îthe wa Jehozadaki.

1Maû 6:8

Ahitubu aarî îthe wa Zadoku, Zadoku aarî îthe wa Ahimaazi.

1Maû 6:9

Ahimaazi aarî îthe wa Azaria, Azaria aarî îthe wa Johanani,

2Maû 26:17

Nwatî Azaria, mûthînjîri-Ngai marî na athînjîri-Ngai engî mîrongo înana (80) maarî njamba nîmaamûrûmîrîrie

2Maû 31:13

Nao Jehieli, Azazia, Nahathi, Asaheli, Jerimothi, Jozabadi, Elieli, Isumakia, Mahathi na Benaia maarî arûngamîrîri arîa maatethagîrîria Konania na mûrwang'ina Shimei. Andû acio îkûmi maathuurirwe nî mûthamaki Ezekia na Azaria, Mûthînjîri-Ngai mûnene.

2Maû 31:9

Hezekia nîwaûririe athînjîri-Ngai na Alawi ûvoro wîgiî irûndo icio.

Ntha 36:7

Indo irîa ciaretetwe ciarî mbîganu cia kûruta wîra na igatigara.

Nthi 10:22

Irathimo cia Ngai-Mûnene nîcio itûmaga mûndû atonge, na ndarî kîeva aretanagîria na irathimo icio.

Nthi 11:24

Andû amwe mavecanaga na ûtaana na makathiî na mbere gûtonga; nao arîa engî mativecanaga, nwatî nwakwa mathiîcaga na mbere kûthîna.

Nthi 3:10

Weka ûguo, makûmbî maku nîmagecûra maketha, na mîtûngi yaku îcûre na yune ndivei ya kûvivwa warîo.

Nthi 3:9

Tîîaga Ngai-Mûnene na indo ciaku, na ûmûrutagîre maketha ma mbere ma indo cionthe cia mîgûnda yaku.

Ezek 44:15

Ngai-Mûnene nîwaugire atîrî, “Athînjîri-Ngai a mûvîrîga wa Lawi, a njiarwa cia Zadoku nîo maamenyagîrîra hekarû yakwa rîrîa andû acio engî a Isiraeli maandiganîrîtie. Acio nîo makaandungatagîra na maûkage mbere yakwa kûndutîra maguta na nthakame.

Ezek 44:30

Maketha ma mbere marîa maro mûno na indo irîa mbaro mûno cia matega menyu irîa mûndutagîra ikaavecagwa athînjîri-Ngai. Vîndî cionthe rîrîa mwakanda mûgate, mûgate wa mbere ûkaavecagwa athînjîri-Ngai rîrî îtega nanie ngarathimaga mîciî yenyu.

Alawi 25:21

Nie, Ngai-Mûnene nî ngaarathima mîgûnda mwakarî wa gatandatû na nî gûkaauma irio irîa mûkaarîa îvinda rîa mîaka îîrî.

Hagai 2:18

Ûmûnthî nî mûthenya wa mîrongo îîrî na îna wa mweri wa kenda, mûthenya ûrîa mûcingi wa hekarû ya Ngai-Mûnene wathirire. Etererani mwone maûndû marîa mûkûthiî na mbere kwona kuuma rîu.

Malaki 3:10

“Reteni matega menyu makûmbîrî makwa, nîguo nyomba yakwa îgîe na irio cia kwîgana. Mue nwa mûcoke mûngerie. Mweka ûguo, nîmûkoona kana tîmvingûra ndirica cia îgûrû na nîmwîtûrûrîre irathimo ciakwa.

Ndari 22:12

Ngai nîwerire Balaamu atîrî, “Tî mûthiî nao na tîûmaruma nîûndû nînîmarathimîte.”

Mathaayo 15:37

Nao andû onthe nîmaarîre na makîvaa. Na arutwa nîmaacokire makîûngania ciondo mûgwanja ciîcûrîte cienywa cia mîgate îrîa yatigarîte.

Gûco 28:8

“Ngai-Mûnene Ngai wenyu nîakaarathima mawîra menyu monthe, na atûme makûmbî menyu mecûre irio, acoke atûme mwîngîve mûrî vûrûrirî ûrîa akûmûva.

Afil 4:18

Na rîu nîngîte na indo nyîngî na ngakîrîrîria. Nîrî na indo cia kûmbîgana nîûndû Epafarodito nîwandetere iveo kuuma kûrî mue. Iveo icio ciîkariî ta kîndû kîrî na mûnungo mwaro gîkîrutîrwa Ngai, na ta îgongoona rîa gwîtîkîrîka nîke na rîa kûmûkenia.

1Tim 4:8

Kûmenyeria mwîrî gwîka maûndû nîguo ûgîe na vinya nî ûndû mwaro, nwatî kwîmenyeria gwîka maûndû marîa mangîtûma ûgîe na vinya wa kîîroho kûrî vata na njîra cionthe, nîûndû nîkûretagîra mûndû kîîrîgîrîro mwoyorî ûyû tûrî naguo rîu na mwoyorî ûrîa ûgaaûka.