2Maû 29:30 - ÎVUKU RÎA ÛVORO MWARO

³⁰ Nake mûthamaki Hezekia na anene nîmaathire Alawi makumie Ngai-Mûnene na nyîmbo irîa ciatungîtwe nî Daudi na Asafu, ûrîa warî mwoni. Kwoguo andû onthe nîmaakumirie Ngai-Mûnene marî na gîkeno na nîmeenamîrîrie mothiû mao nthî na makîgooca Ngai.

2Maû 29:30 ပူးပေါင်းရင်းမြစ်များ

2Maû 23:18

Mûthînjîri-Ngai Jehoiada nîwacokire akîthuura arangîri a hekarû marûngamîrîrîtwe nî athînjîri-Ngai a mbarî ya Lawi na Alawi arîa Daudi aaveete wîra wa gûtungata hekarûrî na kûrutîra Ngai-Mûnene matega ma kûvîvua kûringana na ûrîa kwandîkîtwe wathorî wa Musa. Arangîri acio nwao maatongoragia nyîmbo magîkûngûagîra na gîkeno wata ûrîa Daudi aathanire.

2Maû 30:21

Nao andû a Isiraeli arîa maarî Jerusalemu nîmaakûngûîre kîrugo Kîam mîgate îtarî mîkîre ndawa ya kwimbia îvinda rîa mîthenya mûgwanja makenete mûno. Alawi na athînjîri-Ngai nîmaakumagia Ngai-Mûnene wa mûthenya wa mûthenya na nîmaainagîra Ngai-Mûnene na vinya wao wonthe.

2Maû 30:23

Andû onthe arîa maagomanîte nîmeetîkanîrie makûngûîre kîrugo kîu îvinda rîa mîthenya îngî mûgwanja (7). Kwoguo nîmaagîkûngûîre mîthenya îngî mûgwanja makenete.

2Maû 30:26

Kwoguo kwarî na gîkeno kînene mûno îtûûrarî rîa Jerusalemu, nîûndû kuuma vîndî ya Solomoni mûvîcî wa Daudi, mûthamaki wa Isiraeli gûtiagîîte ûndû wîngî ta ûcio îtûûrarî rîa Jerusalemu.

2Maû 7:3

Rîrîa andû a Isiraeli moonire mwaki wanyûrûrûka kuuma îgûrû na riiri wa Ngai-Mûnene ûrî îgûrû rîa hekarû, nîmaaturirie maru na magîturumithia mothiû mao vau vaarîtwe mathiga na makîgooca Ngai-Mûnene makiuga “Ke nî mwaro, wendo wake ûtathiraga nî wa tene na tene.”

Ezira 6:16

Nao andû a Isiraeli, athînjîri-Ngai, Alawi na andû onthe arîa maacokire kuuma îthamîriorî nîmaakûngûîre kwamûrwa gwa hekarû ya Ngai marî na gîkeno.

Ezira 6:22

Nîmaakûngûîre kîrugo Kîam mîgate îtaarî mîkîre ndawa ya kwimbia vandû va mîthenya mûgwanja marî na gîkeno. Maakenete nîûndû Ngai-Mûnene nîwatûmîte mûthamaki wa Asîria agîe na wendo nîguo amatethie gûtuma rîngî hekarû ya Ngai wa Isiraeli.

Nehemia 12:46

Nîûndû kuuma tene vîndî ya Daudi na Asafu kwethagîrwa kûrî na mûnene wa aini a nyîmbo, na kwarî na nyîmbo cia gûkumia na gûcokia ngatho kûrî Ngai.

Thaburi 106:12

Andû a Isiraeli nîmaacokire magîtîkia ciugo ciake, na makina nyîmbo cia kûmûkumia.

Thaburi 149:2

Isiraeli, kenerera Mûkûmbi, Andû a Zayuni canjamûkani nîûndû wa Mûthamaki wenyu.

Thaburi 32:11

Mue andû arîa athingu, kenani na mûcanjamûke, nîûndû wa ûrîa Ngai-Mûnene ekîte. Mue arîa mûmwathîkagîra, ugîrîriani mûkenete!

Thaburi 50:1

Ngai-Mûnene, Ngai mwene vinya wonthe nîararia; nîareta andû onthe a nthî kuuma îrathîro nginya îthûîro.

Thaburi 95:6

Ûkani tûmwînamîrîre na tûmûgooce, tûturie maru mbere ya Ngai-Mûnene, ûrîa watûmbire.

Thaburi 96:9

Goocani Ngai-Mûnene arî hekarûrî yake ntheru; mûgooceni na gîtîîo mue andû onthe a nthî!

Afil 4:4

Îkaragani mûkenete mûrî ûrûmwe na Mwathani vîndî cionthe. Na nîngûmwîra rîngî atî mwîkarage mûkenete.