2Maû 20:20 - ÎVUKU RÎA ÛVORO MWARO

²⁰ Kîraûko tene, andû onthe a Juda na a Jerusalemu nîmaathiîre werûrî wa Tekoa. Mbere ya mambîrîria rûgendo Jehoshafati nîwamerire atîrî, “Tanthikîrîriani mue andû a Juda na a Jerusalemu! Îîvokeni Ngai-Mûnene, Ngai wenyu na nîmûkwîvanda. Îtîkiani ûrîa arathi ake makûmwîra na nîmûkûvootana.”

2Maû 20:20 ပူးပေါင်းရင်းမြစ်များ

2Sam 14:2

Kwoguo Joabu nîwatûmanîre mûndûmûka ûmwe warî mûûgî watûûraga îtûûrarî rîa Tekoa. Rîrîa mûndûmûka ûcio aathiîre kûrî Joabu, Joabu nîwamwîrire atîrî, “Îîtue atî nîkwa ûracakaya, wîkîre nguo ciaku cia macakaya, na ndûgacanûre njuîrî ciaku na wîtue ta mûndûmûka wîthîrîtwe agîcakaya kavinda karaca.

1Maû 4:5

Ashihuri, îthe wa Tekoa aarî na aka aîrî. Ûmwe eetagwa Hela, na ûcio wîngî eetagwa Naara.

2Maû 11:6

Aatumire matûûra ma: Bethilehemu, Etamu, Tekoa,

2Maû 20:19

Nao andû a mûvîrîga wa Lawi a mbarî ya Kohathu na ya Kora, nîmaarûngamire na magîkumia Ngai-Mûnene, Ngai wa Isiraeli maugîrîrîtie mûno.

Thaburi 125:1

Arîa mevokete Ngai-Mûnene mekariî ta Kîrîma gîa Zayuni, kîrîa gîtanginainua, nwatî gîtûûraga tene na tene.

Ntha 14:31

Vîndî îrîa andû a Isiraeli moonire vinya mûnene ûrîa Ngai-Mûnene aavootire andû a Misiri naguo, nîmeetigîre Ngai-Mûnene, makîmwîtîkia na magîtîkia ndungata yake Musa.

Isaia 26:3

We Ngai-Mûnene, arîa magwîtîkîtie, nîûmaigaga marî na thayû mûkinyanîru, nîûndû nwawe mevokete.

Isaia 28:16

Kwoguo Ngai-Mûnene mwene vinya wonthe arauga atîrî, “Taroria, nîngwiga îthiga rîa mûcingi Zayuni, îthiga rîrî na vinya, îthiga rîa mûcingi rîa goro, rîa mûcingi wîna vinya na rîa goro: ‘Mûndû ûrîa wîtîkîtie ndakeenyenyeka.’

Isaia 7:9

Îtûûra rîrîa rînene rîa Isiraeli nî Samaria, na mûnene wa Samaria nî mûvîcî wa Remalia.” “Ethîrwa tî mwîtîkia, nama mûtigekindîria.”

Jeremia 38:20

Jeremia nîwacokirie atîrî, “Ndûkanenganîrwa kûrî o. Athîkîra mûgambo wa Ngai-Mûnene, wata ûrîa nîrakwîra, na maûndû maku nîmagûtuîka maro na ûvonokie mwoyo waku.

Jeremia 6:1

Mue andû a Benjamini, ûrani mûkegitîre! Ûrani mume Jerusalemu! Vuvani karumbeta mûrî Tekoa; na mwonanie rûûri rwa ûgwati kûu Bethi-hakeremu! Nîûndû ûndû mûcûku na mwanangîko kuuma mwena wa rûgûrû nîûkîte.

Danieli 6:23

Nake mûthamaki nîwakenire mûno, na akîathana atî Danieli aguucue arutwe îrimarî rîa mînyambû. Nake nîwarutirwe kuo atarî mûtivie wanarî vandû, nîûndû nîwevokete Ngai wake.

Luka 16:31

Nwatî Iburahimu nîwacokerie gîtonga kîu atîrî, ‘Angîthîrwa matingîthikîrîria Musa na Arathi, wana mûndû akariûka matingîmûthikîrîria.’ ”

Johana 11:40

Jesû nîwamwîrire atîrî, “Na kinthî ndikwîrire wetîkia nîûkwona riiri wa Ngai?”

Johana 13:20

Nie nîramwîra ûvoro wa ma atî, mûndû wa wonthe wamûkagîra mûndû ûrîa ndûmîte wa nanie nîanyamûkagîra. Nake mûndû wa wonthe ûnyamûkagîra nîwamûkagîra ûrîa wandûmire.”

Johana 14:1

Jesû nîwamerire atîrî, “Tigani gûtangîka ngororî cienyu. Îtîkiani Ngai na wa nanie mûmbîtîkie.

Aroma 8:31

Nîtuga atîa îgûrû rîa maûndû mama? Ethîrwa Ngai arî mwena wetû, nû ûngîtûtuma ûthû?

Ahib 11:6

Gûtirî mûndû ûngîvota gûkenia Ngai atarî na wîtîkio. Nîûndû mûndû wa wonthe ûthiîcaga kûrî Ngai nwanginya etîkie atî Ngai arî kuo na nîarathimaga arîa mamûcaragia.