1Sam 2:15 - ÎVUKU RÎA ÛVORO MWARO

¹⁵ Makîria ya ûguo, wana mbere ya mathunya mavîvue, ndungata ya mûthînjîri-Ngai nîîngîathiîcaga na îkeera mûndû ûrîa warutaga kîgongoona atîrî; “Nengera nyama ya mûthînjîri-Ngai akavîvie nîûndû ke ndangîtîkîra îrî nduge kuuma kûrî we, nwanga îrî mbîthî.”

1Sam 2:15 ပူးပေါင်းရင်းမြစ်များ

Ntha 12:9

Mûtikarîe nyama mbîthî kana itherûkîtue na manjî, nwatî tûtûrûme tûu tûkaarîwa tuonthe tûvîvîtue wana ciongo ciatuo, magûrû wa na nyama cia nda.

Alawi 3:16

Mûthînjîri-Ngai nî akaavîvîria indo icio cionthe îgûrû rîa metha ya kîgongoona irî irio irutîrîtwe Ngai-Mûnene irî îtega rîa kûvîvua rîrî na mûtararûko wa kûmûkenia. Mathunya monthe ma nyamû irîa itegagîrwa Ngai-Mûnene nî ma Ngai-Mûnene.

Aroma 16:18

Nîûndû andû arîa mekaga maûndû ta mau matungatagîra mavu mao, nwatî tî Mwathani wetû Jesû Kristû. Na njîra ya ciugo ciao mbaro na mîario yao îrî na mûrîo, andû acio nîmaveenagîrîria andû arîa marî ngoro mvûthû.

Afil 3:19

Mûthiia wa andû acio nî gûcûkangua, nîûndû matongoragua nî merirîria ma mîîrî yao îrî yo ngai yao. Maûndû ma nthoni nîmo mamakenagia na meciria mao methagîrwa marî maûndûrî ma gûkû nthî.

Juda 1:12

Andû acio maticonokaga vîndî îrîa makûrîcanîra namue mekariî ta maroro ma gîko vîndî îrîa mûrî marugarî ma ngwatanîro. O merîthagia o ene tu. Mekariî ta matû matarî mbura, marîa mavurutagwa nî rûkûngi. Mekariî ta mîtî vîndî ya thano îrîa îtagîcaga na maciaro. Mekariî ta mîtî mîkûûre na îkaûma viû.

1Sam 2:14

Nayo ndungata nîyavutûkagia ûma îo thavuriarî, kana nyûngûrî îrîa ya kûruga, nyama ikîrugwa. Nayo nyama wa yonthe îrîa yamundagwa nî ûma nîyarutagwa na îgatuîka ya mûthînjîri-Ngai. Ûguo nîguo Aisiraeli onthe arîa maathiîcaga kûruta magongoona kûu Shilo meekagwa.

1Sam 2:16

Na ethîrwa mûndû ûcio nîangîacokerie ndungata na akamîîra atîrî, “Amba weterere twambe tûvîvie mathuma, ûcoke woce irîa ûkwenda.” Ndungata ya mûthînjîri-Ngai nîîngîaugire atîrî, “Naarî, nwanginya ûnengere rîu! Na ethîrwa ndûkûnengera, nie nîmboca na vinya.!”