1Sam 12:19 - ÎVUKU RÎA ÛVORO MWARO

¹⁹ Nao andû acio nîmeerire Samueli atîrî, “Twakûthaitha ûtûvoere kûrî Ngai-Mûnene, Ngai waku, nîguo tûtigakue. Rîu nîtwamenya atî nîtwongererete mevia marîa mengî monthe metû na wîvia wa gwîtia mûthamaki.”

1Sam 12:19 ပူးပေါင်းရင်းမြစ်များ

Kîam 20:7

Nwatî rîu, cokia mûndûmûka ûyû kûrî mûthuuriwe. Mûthuuri ûcio wake nî mûrathi, na nîagûkûvoera nîguo ndûgaakue. Nwatî ethîrwa tîûmûcokia, nîrakwîra nama atî we nîûgûkua vamwe na andû aku onthe.”

Ayubu 37:13

Ngai ekaga wendi wake gûkû nthî, ûrî wa kûverithia andû, kana wa kwonania wendo wake.

Ayubu 42:8

Kwoguo rîu oca ndegwa mûgwanja na ndûrûme mûgwanja, ûcoke ûthiî nacio kûrî ndungata yakwa na ûrute îtega rîa kûvîvua. Ayubu nîagaakûvoera, na nie nîngegua mavoya make na ndege gûkûverithia kûringana na mavîtia maku. We nîwaregire kwaria ûvoro wa ma ûmbîgiî ta ûrîa Ayubu ethîrîtwe agîka.

Ntha 10:17

Rîu njoverani wa rîngî na mûvoe Ngai-Mûnene, Ngai wenyu athengutie îverithia rîîrî rîa gîkuû kuuma kûrî nie.”

Ntha 32:30

Mûthenya ûcio warûmîrîrîte Musa nîwerire andû atîrî, “Mue nîmwîkîte mevia macûku mûno. Nwatî rîu nîngunûkia kîrîmarî kûrî Ngai-Mûnene ngone kana Ngai-Mûnene nwa amwovere mevia menyu.”

Ntha 9:28

Thaitha Ngai-Mûnene, nîûndû mbura îno ya mbembe na ngwa nî mbîganu. Nîngwîranîra atî nîngûmûrekia mûthiî mûtigekare gûkû makîria.”

Isaia 26:16

Ûûi Ngai-Mûnene, rîrîa maarî thînarî, nîmaagûkaîre, rîrîa wamaverithirie, o nîmaakûvoire.

Jeremia 15:1

Ngai-Mûnene nîwacokire akîmbîra atîrî, “Wana Musa na Samueli mangîrûngama mbere yakwa, nie ndingîguîra andû aya ntha. Meere mathiî maume mbere yakwa.

Jeremia 27:18

Ethîrwa o nî arathi na marî na ndûmîrîri ya Ngai-Mûnene, nî makaîre Ngai-Mûnene mwene vinya wonthe nîguo indo irîa ciatigarire hekarûrî ya Ngai-Mûnene na nyombarî ya mûthamaki wa Juda na Jerusalemu itikavirwe Babuloni.”

Jeremia 37:3

Mûthamaki Zedekia nîwatûmire Jehukali mûvîcî wa Shelemia, na mûthînjîri-Ngai Zefania mûvîcî wa Maaseia kûrî mûrathi Jeremia akîmwîra atîrî, “Tûvoere kûrî Ngai-Mûnene Ngai wetû.”

Jeremia 42:2

nîmaathiîre kûrî Jeremia na makîmwîra atîrî, “Wenda tu thikîrîria ûrîa tûrakûria! Îtîkîra gûtûthaithanîra kûrî Ngai-Mûnene Ngai waku, nîûndû wa andû aya matigarîte, (nîûndû twarî andû engî nwatî rîu tûtigarîte tûrî anini tu, wata ûguo ûrona).

Malaki 1:9

Rîu mue athînjîri-Ngai, voyani Ngai nîguo atwîguîre ntha. Ethîrwa mûmûrutagîra indo ta ino, nama akamwîguîra ntha? Ûguo nîguo Ngai-Mûnene mwene vinya wonthe arauga.

Ndari 21:7

Nao andû nîmaathiîre kûrî Musa na makîmwîra atîrî, “Nîtwîvirie rîrîa tûreganire na Ngai-Mûnene na twaregana nawe. Rîu voya Ngai-Mûnene nîguo atûthengutirie njoka ino.” Kwoguo Musa nîwavoere andû.

Ciîko 8:24

Nake Simoni nîwerire Petero na Johana atîrî, “Mwenda mvoerani kûrî Mwathani nîguo ndikone ûndû wana ûmwe wa mau mwagweta.”

Jakuvu 5:15

Namo mavoya mau mangîvowa na wîtîkio nîmakûvonia mûndû ûcio ûrwarîte na Mwathani acokerie mûndû ûcio ûgima wake wa mwîrî. Na ethîrwa mûndû ûcio nîwîtîkîtie nîakwoverwa mevia make.

1Joh 5:16

Ûngîona mûndû agîka rîvia rîrîa rîtangîtûma mûndû aûragwe mûvoere, na Ngai nîakaava mûndû ûcio mwoyo. Ûndû ûyû wîkîkaga kûrî andû arîa mekîte wîvia ûtangîtûma makue. Nwatî kûrî na wîvia ûtûmaga mûndû akue. Ndirauga atî mûndû nwa avoe nîûndû wa rîvia rîu.

1Sam 12:13

“Rîu mûthamaki ûrîa mwetirie na mûkîthuura Ngai-Mûnene nîwamûvere, na nîke ûyû ava.

1Sam 12:17

Îvinda rîîrî nî rîrîa kwîthagîrwa gûtarî na mbura. Nwatî nie nîmvoya Ngai-Mûnene nîguo arete ngwa na aurithie mbura. Vîndî îrîa ûndû ûyû ûgeekîka nîrîo mue mûkaamenya, atî nîmwekire wîvia mûnene kûrî Ngai-Mûnene rîrîa mwetirie mûthamaki.”

1Sam 12:20

Samueli nîwerire andû acio atîrî, “Tigani kûmaka, wana ethîrwa nîmwîkîte wîvia wa mûthemba ûcio, mûtigatiganîrie Ngai-Mûnene, nwatî mûmûtungatîreni na ngoro yonthe.

1Sam 12:23

Makîria ya ûguo, Ngai-Mûnene arondethia ndikavîtie ngîrega kûvoya nîûndû wenyu, nwatî ngaamûthomithagia ûvoro wîgiî maûndû marîa maro na marîa ma ûma.

1Sam 7:5

Nake Samueli agîtûmanîra andû onthe a Isiraeli mathiî macemanie Mizipa. Nake nîwamerire atîrî, “Nie nîngaamûvoera kûrî Ngai-Mûnene nîrî Mizipa.”

1Sam 7:8

Nao andû a Isiraeli nîmeerire Samueli atîrî, “Thiî na mbere gûtûvoera kûrî Ngai-Mûnene Ngai wetû nîguo atûvonokie kuuma kûrî Afilisiti.”

1Sam 8:6

Nwatî Samueli ndaakena egua andû acio makîmûûria amathuurîre mûthamaki wa kûmathaga; kwoguo Samueli nîwavoire kûrî Ngai-Mûnene,