1Pet 3:4 - ÎVUKU RÎA ÛVORO MWARO

⁴ Vandû va ûguo tigani kîrîa kîrî ngororî cienyu kîmûtucage athaka. Ûthaka ûcio ûtathiraga umanaga na ngoro mvoreri na îkiragîrîria na ûrî vata mûnene mûno methorî ma Ngai.

1Pet 3:4 ပူးပေါင်းရင်းမြစ်များ

Thaburi 131:2

Nwatî nîmvorerete na ngagîa na thayû, ta ûrîa kaana kavoragîra kagwatîtwe nî ng'ina, ngoro yakwa îkirîrîrîtie ta kaana kavoreretue.

Thaburi 147:6

Ngai-Mûnene nîaûkagîrîria arîa avinyîrîrie, nwatî agaikia arîa aganu mûtheturî.

Thaburi 149:4

Nîûndû Ngai-Mûnene akenagua nî andû ake; nîatûmaga arîa enyivia mavootane.

Thaburi 25:9

Nîatongoragia andû arîa enyivia na njîra cia ûthingu, na nîamathomithagia wendi wake.

Thaburi 45:13

Mwarî wa mûthamaki nîaratonya mûciî kwa mûthamaki na nî mûthaka mûno! Nguo yake ndaca îtumîtwe na ndigi cia thaavu.

Thaburi 51:6

We wendaga ûûma kuuma ngororî; kwoguo mva ûûgî wa ngoro.

Isaia 11:4

Agaatucagîra athîni na ûthingu, na atucagîre andû arîa matarî vinya gûkû nthî na waragania. Nîakaaverithia nthî na kiugo gîake, na aûrage andû arîa aganu na mûgambo wake.

Isaia 29:19

Andû arîa avooreri nîmakaagîa na gîkeno gîcerû kuuma kûrî Ngai-Mûnene, nao arîa athîni gûkû nthî nîmagaakena nîûndû wa Ûrîa Mûtheru wa Isiraeli.

Isaia 57:15

“Ûguo nîguo Ke Ûrîa ûrî îgûrû mûno, Ke Ûrîa wambararîtue mûno, ûrîa ûtûûraga tene na tene na ûrîa wîtagwa Mûtheru arauga. “Nie mbîkaraga kûu îgûrû kûrîa kûtheru, mbîkaraga na andû athînîku na enyivia. Nîngekîra mîoyo arîa maarî enyivia, na gwîkîra vinya arîa enyivia.

Isaia 61:1

Roho wa Mwathani Ngai-Mûnene ûrî nanie, nîûndû ke nîanthuurîte na akambîtîrîria maguta, nîguo mvirîre arîa akinyîrîrie Ûvoro Mwaro, ngaûmîrîrie arîa makuîte ngoro, nganîrîre kûrî arîa anyite atî nîmarekererua, nao arîa movetwe njeera nîmamenyithie atî nîmovorwa.

Jeremia 51:59

Mwaka wa kana wa wathani wake, Zedekia mûthamaki wa Juda nîwathiîre Babuloni vamwe na mûnene wa athigari ake wîtagwa Seraia mûvîcî wa Neria. Neria aarî mûvîcî wa Mahaseia. Nie Jeremia nînagîre na kanya ga kwîra Seraia ndûmîrîri îno.

Mathaayo 11:29

Ocani îcoki rîakwa mwîkîre na mwîrute na nie, nîûndû nie nîrî mûvoreri na nîmwînyivia ngororî yakwa na nîmûkûvurûka.

Mathaayo 21:5

‘Îrani îtûûra rîa Jerusalemu atî, taroriani, Mûthamaki wenyu nî araûka kûrî mue, ke nîmûvoreri na akuuîtwe nî mvunda, na nî njaû ya mvunda!’ ”

Mathaayo 23:26

Mue Afarisai aya atumumu! Ambani mûthambie gîko kîrîa kîrî ndaarî ya gîkombe, nakuo kûu nja nîgûkwîthîrwa gwî kûtheru wana kuo.

Mathaayo 5:5

Kûrathimwa nî arîa avoreri; nîûndû nîmakagaa nthî!

Luka 11:40

Mue irimû ino! Na kinthî Ngai ûrîa waûmbire mwena wa îgûrû wa gîkombe na wa thaani twake waûmbire mwena wa ndarî?

Luka 16:15

Nake Jesû nîwamerire atîrî, “Mue mwendaga gwîtua ûrîa mûrî aro methorî ma andû, nwatî Ngai nîwîcî ngoro cienyu. Nîûndû maûndû marîa monekanaga marî na vata methorî ma andû matirî vata methorî ma Ngai.

Aroma 1:23

Vandû va gûkumia Ngai ûrîa ûtûûraga tene na tene, Makumagia mîvuanano îrîa îthondeketwe îkariî ta andû arîa makucaga, iconi, nyamû, kana ta nyamû cia kîruka Kîam njoka.

Aroma 2:29

Mûyahudi wa ma nî ûrîa Mûyahudi ndaarî, nakuo kûrua kwa ma nî kûrua ngoro na njîra ya Roho na tî na njîra ya watho ûrîa mwandîke. Mûndû ta ûcio nîakumagua nî Ngai nwatî tî andû.

Aroma 6:6

Nîtwîcî atî ûmûndû wetû wa tene nîwambirwe mûtharavarî vamwe na Kristû nîguo vinya wa mwîrî ûrîa wîvagia ûthirue na tûtigacoke gûtuîka ngombo cia mevia.

Aroma 7:22

Ngororî yakwa nîngenete nî ûndû wa watho wa Ngai.

2Akor 10:1

Nie Paûlo nie mwene monekaga nîrî mwînyivia na mûvoreri rîrîa tûrî vamwe namue na mbîthagîrwa nîrî na ûcamba rîrîa tûtarî vamwe namue, nîramûthaitha nîrî na ntha na wega wa Kristû.

2Akor 4:16

Nîûndû wa gîtûmi gîkî tûtikucaga ngoro. Wana ethîrwa mwîrî ûyû wonekaga nî ûthiîcaga wa ûkîoraga, ûtûûro wetû wa kîîroho nî ûcerûvagua wa mûthenya wa mûthenya.

Agal 5:23

ûvoreri na kwîrigîrîria merirîria ma kîîmwîrî. Gûtirî watho ûreganîte na maûndû ta mama.

Aefeso 4:2

Mavinda monthe îthagîrwani mwînyivîtie, mûvorerete na mûkirîrîrîtie. Onanagiani wendani wenyu na njîra ya gûkiranîrîria mûndû na ûrîa wîngî.

Akol 3:12

Mue mûrî andû a Ngai. Ke nîwamwendire na nîwamûthuurire mûtuîke andû ake. Kwoguo îgucanagîrani ntha, tanavanagîrani, îînyivagieni, îthagîrwani mûrî avoreri na mûrî akirîrîria.

Akol 3:3

Nîûndû nîmwakwire na rîu mwoyo wenyu ûthithîtwe vamwe na Kristû kûrî Ngai.

1Ath 4:11

Îkaragani mûtarî na înegene, mûkîmenyagîrîra maûndû menyu na mûkîrutaga wîra na njara cienyu nîguo mwîyonagîre kîndû gîa kûrîa wata ûrîa twamwîrire.

2Ath 3:12

Na rîîtwa rîa Mwathani wetû Jesû Kristû, nîtûkwatha andû acio na tûmere atî mekarage na mîtugo mîaro na marutage wîra nîguo meyonagîre kîndû gîa gwîtethia mûtûûrîrerî wao.

1Tim 2:2

Voyagîrani athamaki na anene onthe nîguo twîkarage tûkirîrîtie, tûrî na thayû, twînyivîtie mbere ya Ngai na tûrî na mîtugo mîaro.

2Tim 2:25

Nîwagîrîrwe nîkwîthîrwa ûrî mûvoreri rîrîa ûgûtaara andû arîa magûkararagia, nîûndû Ngai avota kûmava kamweke ga kwîrira na makamenya ûvoro wa ma.

Tito 3:2

Merage matikaragie ûcûku wa mûndû wana ûrîkû, nwatî methagîrwe marî na thayû na mendanîte na monanagie ûvoreri kûrî andû onthe.

Jakuvu 1:21

Kwoguo îîyaûreni mîtugo yonthe mîcûku na maûndû monthe matarî maro. Îînyivieni mbere ya Ngai na mwamûkîre kiugo kîrîa avandaga ngororî cienyu na nîkîo kîngîvota kûmûvonokia.

1Pet 1:23

Nîûndû na njîra ya kiugo Kîam Ngai kîrîa kîrî mwoyo nîmûciarîtwe rîngî ta ciana cia mûciari ûrîa ûtakucaga, nwatî atûûraga tene na tene.

1Pet 3:15

Nwatî ngororî cienyu vecagani Kristû gîtîîo kîrîa kîmwagîrîrîte ta Mwathani. Vîndî cionthe îthagîrwani mwîvarîrîtie gûcokeria mûndû wa wonthe ûrîa ûngîmûria mûmûtaarîrie ûvoro wîgiî mwîrîgîrîro ûrîa mûrî naguo.

1Sam 16:7

Nwatî Ngai-Mûnene nîwerire Samueli atîrî, “Tiga kûroria ûrîa aracavîte kana ûrîa arî mûthaka. Nie nînîmûregete, nîûndû ndiroragia ta ûrîa andû maroragia. Andû maroragia ûrîa mûndû ethagîrwa ekariî akîonwa na metho, nwatî nie ndoragia ngoro ndaarî.”