1Joh 2:11 - ÎVUKU RÎA ÛVORO MWARO

¹¹ Nwatî mûndû wa wonthe ûmenete mûrwang'ina, kana mwarwang'ina ethagîrwa arî ndumarî. Ke athiîcagîra ndumarî na ndamenyaga kûrîa athiîte nîûndû nduma nî îmûtete metho.

1Joh 2:11 ပူးပေါင်းရင်းမြစ်များ

2Sam 13:22

Nake Abusalomu nîwamenire Amunoni mûno nîûndû wa kûnyita mwarwang'ina Tamarû na vinya na ndaacoka kwarîria Amunoni rîngî.

Nthi 4:19

Njîra ya andû arîa aganu nîta nduma ndumanu, magwîcaga na matimenyaga kîrîa kîmavîngaga.

Mûvunjia 2:14

Mûndû mûûgî nî onaga kûrîa athiîte, nakîo kîrimû gîtionaga kûrîa kîthiîte. Nwatî nînaamenyire atî mûthiia wa andû acio wa oîrî nî gîkuû.

Alawi 19:17

“Mûtikamenane na andû arîa engî, nwatî îgucanagani nîguo mûtikevie.

Johana 12:35

Nake Jesû nîwamerire atîrî, “Ûtheri nîwîthîrwa ûrî gatagatîrî kenyu kavinda kanini. Thiîni rîrîa kûrî na ûtheri nîguo mûtikethîrîrue nî nduma, nîûndû mûndû ûrîa ûthiîcaga kûrî na nduma ndamenyaga kûrîa arathiî.

Johana 12:40

“Ngai nîamatuîte atumumu, na akamaûmia ngoro, nîguo matikone na metho mao, na matigataûkîrwe ngororî ciao, wana matikanjokerere nîmavonie.”

2Akor 3:14

Nwatî meciria mao nîmaaûmirue, wana nginya ûmûnthî meciria mao methagîrwa marî makunîkîre na gîtambaa wata kîu rîrîa makûthoma Kîrîkanîro kîrîa gîkûrû. Gîtambaa kîu kîmakunîkîrîte meciria kîrutagwa vo tu na njîra ya Kristû.

2Akor 4:4

O matiîtîkagia nîûndû meciria mao nîmaigîtwe ndumarî nî ngai wa maveeni ûrîa wathaga nthî îno. Ke nîamarigîrîrîtie matikone ûtheri ûrîa umanaga na ûvoro mwaro wa riiri wa Kristû ûrîa arî ke mûvuanîre wa Ngai.

Tito 3:3

Nîûndû vîndî îmwe tue ene twarî ariitu, aremi, na nîtwekaga naaî. Tue twarî ngombo cia merirîria marîa macûku, na mîago ya mîthemba yonthe. Twatûûraga tûrî aganu na tûkîgucanagîra wîru. Andû nîmaatûmenete na wanatue nîtwamamenete.

2Pet 1:9

Nwatî mûndû wa wonthe ûtarî na maûndû mau nî mûtumumu, na nîmûriganîre atî nîwathambirue mevia make marîa aarî namo tene.

1Joh 1:6

Tûngiuga atî tue tûrî na ngwatanîro nake na vîndî wa îo twîthîrwe tûthiîcagîra ndumarî nîtûraveenania na njîra ya ciugo na ciîko cietû.

1Joh 2:10

Mûndû wa wonthe wendete mûrwang'ina na mwarwang'ina ekaraga ûtherirî na ndarî ûndû ûngîtûma mûndû wîngî evie.

1Joh 2:9

Mûndû wa wonthe ugaga atî ke arî ûtherirî na nîamenaga aa mwarwang'ina na aa mûrwang'ina, ethagîrwa arî ndumarî wata mbere.

1Joh 3:15

Mûndû wa wonthe ûmenete mûrwang'ina nî mûragani na nîmwîcî atî gûtirî mûragani wîthagîrwa arî na mwoyo wa tene na tene ndaarî yake.

1Joh 4:20

Mûndû angiuga atî nîendete Ngai, nwatî ethîrwe nî amenete mûrwang'ina kana mwarwang'ina, ke nî mûthaani. Nîûndû mûndû ûrîa ûtendete mûrwang'ina ûrîa onaga ndangîvota kwenda Ngai ûrîa atonaga.

Kûguû 3:17

We uugaga atîrî, ‘Ûrî mûtongu na ûrî na indo nyîngî na gûtirî na kîndû ûvatarîte.’ Nwatî we ndûramenya ûrîa ûrî mûkîa na wagîrîrwe nî kwîguîrwa ntha! We ûrî mûthîni, ûrî njaga na ûrî mûtumumu.