1Atha 22:8 - ÎVUKU RÎA ÛVORO MWARO

⁸ Ahabu, mûthamaki wa Isiraeli nîwacokirie atîrî, “Kûrî na mûrathi wa Ngai-Mûnene ûmwe ûtigarîte, Mikaia, mûvîcî wa Imula. Nwatî ndimwendete nîûndû ndaanaratha wanarî ûndû mwaro ûmbîgiî; vîndî cionthe andathagîra maûndû mama macûku.” Jehoshafati nîwamûcokerie atîrî, “Mûthamaki, ndwagîrîrwe nî kuga ûguo!”

1Atha 22:8 ပူးပေါင်းရင်းမြစ်များ

Kîam 37:8

Nao aa mûrwang'ina nîmaamûririe atîrî, “Ûreciria nama atî nîûgûtuîka mûnene wetû ûtwathage?” Nao nîmaamûmenire mûno makîria, nîûndû wa iroto ciake na nîûndû wa maûndû marîa aaugaga mamegiî.

1Atha 18:4

na rîrîa Jezebeli aaûragaga arathi a Ngai-Mûnene, Obadia nîwocire arathi îgana rîmwe na akîmathitha ngurungarî marî ikundi igîrî cia arathi mîrongo îtano, na akîmava mîgate na manjî.)

1Atha 19:10

Nake Elija nîwacokirie atîrî, “Ngai-Mûnene, mwene vinya wonthe, ndwîre ngûtungatagîra wa we wenga. Nwatî andû a Isiraeli nîmareganîte na kîrîkanîro gîaku. Nîmomorete metha ciaku cia magongoona, na makaûraga arathi aku onthe na rûviû. Nînie nienga tu ndigarîte, na nîkwa marenda kûmbûraga!”

1Atha 19:14

Nake Elija nîwacokirie atîrî, “Ngai-Mûnene, mwene vinya wonthe, ndwîre ngûtungatagîra wa we wenga. Nwatî andû a Isiraeli nîmareganîte na kîrîkanîro gîaku. Nîmomorete metha ciaku cia magongoona, na makaûraga arathi aku onthe na rûviû. Nînie nienga tu ndigarîte, na nîkwa marenda kûmbûraga.”

1Atha 21:20

Ahabu nîwaûririe Elija atîrî, “Anga we nthû yakwa nîwamona?” Nake Elija nîwacokirie atîrî, “Nînakwona nîûndû nîwîrutîrîte viû gwîka maûndû macûku mbere ya Ngai-Mûnene.

1Atha 22:13

Vîndî wa îo, ndungata îrîa yatûmîtwe kûrî Mikaia nîyamwîrire atîrî, “Arathi acio engî onthe nîmaratha atî mûthamaki nîakûvootana. Wanawe ratha maûndû maro wa tao.”

1Atha 22:18

Ahabu, mûthamaki wa Isiraeli nîwerire Jehoshafati atîrî, “Kinthî ndikwîrire, atî ndandathagîra wanarî ûndû mwaro? Arathaga ûndû ûyû mûcûku tu vîndî cionthe!”

1Atha 22:27

Ûmere mamûvingîre njeera na mamûrûmagie tûirio tûnini na manjî, nginya rîrîa ngaacoka nîrî na thayû.”

1Atha 22:7

Nwatî Jehoshafati nîwaûririe atîrî, “Nîkwa gûkû gûtarî mûrathi wa Ngai-Mûnene wîngî tûngîûria ûvoro?”

1Atha 22:9

Ahabu nîwetire ndungata îmwe yake na akîmîatha îthiî îkagîîre Mikaia mûvîcî wa Imula na îvenya.

2Atha 9:22

Rîrîa Joramu oonire Jehu, nîwamûririe atîrî, “Ûkîte na thayû?” Nake Jehu nîwamûcokerie atîrî “Kûngîthîrwa kwî na thayû atîa rîrîa ûragûri na ûvoi wa ngai cia mîvuanano irîa ciaretirwe nî nyûkwe, Jezebeli ciîngîvîte ûguo?”

2Maû 36:16

Nwatî andû a Juda nîmaathiîre na mbere kûthekerera anjaama ake na kwira ndûmîrîri yake na kûnyûrûria arathi ake nginya Ngai-Mûnene akîrakara nî andû ake mûno ûndû atangîamarekeere.

Thaburi 34:21

Andû arîa aganu makaathirua nî waganu wao; andû arîa mamenete arîa athingu nî makaaverithua.

Nthi 15:12

Andû arîa etîi matiendaga kûrutwa mavîtia; matiûragia ûtaaro kûrî andû arîa aûgî kûrî o.

Nthi 29:10

Aûragani mathûrîte andû arîa evokeku, nwatî andû arîa athingu magitagîra ûtûûro wao.

Nthi 9:8

Kwoguo ndûkarute mûndû mwîtîi mavîtia, nîûndû nîagaakûmena. Nwatî ruta mûndû mûûgî mavîtia, nake nîagaakwenda.

Isaia 3:11

Nwatî kaî andû arîa aganu marî na thîna-î, Nîûndû maûndû marîa mekîte andû arîa engî nwamo mageekwa.

Isaia 30:10

Meraga oni maûndû atîrî, ‘Tigani kwona maûndû.’ Na makeera arathi atîrî, ‘Mûtigatûrathîre maûndû marîa magîrîru, twaragîrieni maûndû marîa maro, na mûrathage maûndû ma maveeni.

Isaia 49:7

Ngai-Mûnene mûkûri wa Isiraeli na ûrîa Mûtheru wake, arera ûrîa ûnyararîtwe mûno, ûrîa ûmenetwe nî andû a mavûrûri na nî ndungata ya athamaki atîrî, “Athamaki nîmagaakwona na marûngame magûtîîe; anene wanao nîmakenamîrîria mothiû mao magûtîîe.” Mageeka ûguo nîûndû wa ûrîa nie Ngai-Mûnene nîrî mwîvokeku, Ûrîa Mûtheru wa Isiraeli, nîke ûkûthuurîte.

Jeremia 18:18

Nao andû nîmaacokire makiuga atîrî, “Ûkani tûvange ûrîa tûkûraga Jeremia. Tûtigatura athînjîri-Ngai a gûtûthomithia kana andû aûgî a gûtûtaara na arathi a kwanîrîra ndûmîrîri ya Ngai-Mûnene. Ûkani tûmûthitange na ciugo ciake ke mwene na tûtikathikîrîrie ûrîa arauga.”

Jeremia 20:10

Mbîgucaga andû engî makîaria na kîvwe, makiugaga atî: “Guoya ûrî kûndû kuonthe!” Engî marauga: “Nîtûmûthitange! Nîtûmûthitange!” Wana arata akwa onthe arîa mambicî waro metererete kwona ngîgwa. Marauga atî: “Nwa kûvoteke aveenue, tûcoke tûmûvoote na twîrîvîrîrie.”

Jeremia 36:23

Jehudi athoma icunjî ithatû kana inya, mûthamaki nîwatembûrangaga icunjî icio na kaviû, na agîcikia mwakirî. Nîwatembûrangire îvuku rîonthe rîa gîkûnjo na akîrîvîvia rîkîthira.

Jeremia 38:4

Nao anene nîmeerire mûthamaki atîrî, “Mûndû ûyû nîwagîrîrwe nî kûragwa nî ûndû nîathirîtie athigari arîa matigîtwe gûkû îtûûrarî vinya vamwe na andû onthe nîûndû wa kwaria ciugo ta icio. Mûndû ûyû ndacaragia wagîrîru wa andû aya, nwatî amacaragîria maûndû macûku.”

Amosi 5:10

Mue nîmûthwîre arîa marûngamagîrîra kîvooto na arîa maragia ûûma îgootirî.

Mika 2:11

Ethîrwa mûndû nwa athiî akîaragia maveeni, akiugaga atî, ‘Nîmûrathagîra atî ndivei na njovi nîciîthîrwa irî nyîngî,’ mûvunjia ta ûcio nîke andû aya mangîenda.

Mika 2:7

Maûndû mau nîmagîrîrwe nî kûgwetwa kûrî andû a Isiraeli? Nîkwa Ngai-Mûnene aremetwe nî gûkirîrîria? Nwa eke maûndû ta mama? Kinthî ndaragîrîria andû arîa mekaga maûndû marîa magîrîre?

Zakaria 11:8

Îvindarî rîa mweri ûmwe nînaûragire arîthi acio athatû acûku. Nînaaremirwe nîkwîguithania na ng'ondu icio na wanacio ikîmena.

Mathaayo 10:22

Andû onthe nîmakaamûmena nîûndû wakwa. Nwatî mûndû wa wonthe ûkaaûmîrîria nginya mûthiia, nîakaavonokua.

Johana 17:14

Nînaamakinyîrie ndûmîrîri yaku na andû a gûkû nthî makîmamena nîûndû o tî a gûkû nthî wata ûrîa wa nanie ndarî wa gûkû nthî.

Johana 7:7

Andû a nthî matingîmûmena, nwatî nie nîmamenete nîûndû nînîmeraga atî nîmekaga maûndû macûku.

Agal 4:16

Nîkwa rîu nduîkîte nthû yenyu nîûndû wa kûmwîra ûma?