1Akor 5:1 - ÎVUKU RÎA ÛVORO MWARO

¹ Rîu kûrî na ûma atî kûrî na wîvia wa kûmenyana kîîmwîrî ûrerîkana gatagatîrî kenyu. Wîvia ûcio nî wa mûthemba mûcûku mûno wana nginya makîria ya wîvia ûrîa wîkagwa gatagatîrî ka andû arîa mataicî Ngai. Nîmbîrîtwe atî mûndû mûrûme nîaramenyana kîîmwîrî na mûka wa îthe.

1Akor 5:1 ပူးပေါင်းရင်းမြစ်များ

Kîam 35:22

Vîndî îrîa Isiraeli aatûûraga vûrûrirî ûcio, Reubeni nîwamenyanire kîîmwîrî na Biliha ûrîa warî mûndûmûka wa kwigwa wa îthe na Isiraeli nîwamenyire ûvoro ûcio. Jakovu aarî na anake îkûmi na aîrî

Kîam 37:2

Rûrû nîruo rûgano rwa andû a Jakovu. Rîrîa Josefu aarî na ûkûrû wa mîaka îkûmi na mûgwanja (17), nîwarîthagia mbûri na ng'ondu marî na aa mûrwang'ina. Aamûrûang'ina acio maarî avîcî a Biliha na Zilipa, aka arîa maarî a kwigwa a Jakovu. Josefu nîweraga îthe maûndû macûku marîa mekagwa nî aa mûrwang'ina acio.

Kîam 49:4

We wîkariî ta manjî mecûrîte makauna, nwatî ndûgaatuîka mwagîrîru gûkîra aa mûrwanyûkwe, nîûndû nîwamenyanire kîîmwîrî na mûndûmûka wakwa wa kwiga, na ûkîgwatia ûrîrî wa aguo gîko.

2Sam 16:22

Kwoguo nîmaambîre Abusalomu îgema îgûrû rîa nyomba îo, na Abusalomu akîthiî na akîmenyana kîîmwîrî na aka acio îthe aaigîte Aisiraeli onthe makîonaga.

2Sam 20:3

Rîrîa Daudi aakinyire gwake mûciî Jerusalemu, nîwocire aka îkûmi arîa aaigîte na aatigîte mamenyagîrîra mûciî na akiuga maigwe vandû nyomba mekarage marangîrîtwe. Nîwamavecaga kîrîa kîonthe maavataraga, nwatî ndaacoka kûmenyana nao kîîmwîrî. Maatûûrire mavingîrîtwe mekariî ta aka a ndigwa nginya rîrîa maakuire.

1Maû 5:1

Ino nîcio njiarwa cia Reubeni îrikithathi rîa Isiraeli. (Reubeni nîwamenyanire kîîmwîrî na mûka ûmwe wa îthe wa kwiga, kwoguo îgai rîrîa aagîrîrwe nî kûvewa arî ke îrikithathi nîwacunirwe na nîrîaverwe avîcî a Josefu. Josefu aarî mûvîcî wa Isiraeli. Nîûndû wa ûguo mûtaratararî wa avîcî a Isiraeli, Reubeni tîke wa mbere.

Jeremia 2:33

Nama we nîwîcî gûcaria andû a kwendana nao, wana nginya aka arîa aganu nîûmathomithîtie mîthiîre yaku.

Ezek 16:47

Kûnarî ûguo we ndwaneganîra ûrûmîrîra mîtugo yao kana wîka ta ûrîa o meekaga maûndû marî na magigi. Takwa ûndû ûcio ûtaarî mûnene, we nîwatuîkire mûcûku mûno na ûkîmakîra onthe mîthiîrerî yaku.”

Ezek 22:10

Gwaku kûrî arûme amwe mamamaga na aka a methe mao, na kûrî nao manyitaga aka rîrîa marî îvindarî rîao rîa mweri.

Alawi 18:8

Mûtigaconorithie aguo na njîra ya kûmenyana kîîmwîrî wanarî na ûmwe wa aka ake.

Alawi 20:11

Mûndûmûrûme ûrîa ûkaamenyana kîîmwîrî na ûmwe wa aka a îthe, nîagaaconorithia îthe. Mûndûmûrûme ûcio na mûndûmûka ûcio nîmakaaûragwa. Ikuû cia andû acio oîrî ikaaumana na gîîko Kîamo o ene.

Amosi 2:7

Nîmaanyamaririe arîa matarî vinya, na makaregana na kîvooto Kîam athîni. Mûndû na îthe mamenyanaga kîîmwîrî na mwîrîtu ûmwe ngombo, kwoguo nîmatûmaga rîîtwa rîakwa rîtheru rîgîe na mûgiro.

Ciîko 15:20

Vandû va ûguo, tue nîtwagîrîrwe nî kwandîka maarûa kûrî o tûmere maûndû mama. Matikarîcage irio irîa irî na mûgiro nîûndû nîciîthagîrwa itegeretwe mîvuanano: matigekage ciîko cia ûmaraa: matikarîcage nyama cia nyamû irîa ciîthagîrwa ithioretwe ngingo itagwîtûrûra nthakame; na matikaarîcage nthakame.

Ciîko 15:29

Mue mûtiagîrîrwe nî kûrîa irio wa cionthe irîa itegeretwe mîvuanano; mûtiagîrîrwe nî kûrîa nthakame; wana kana nyama cia nyamû irîa ciîthagîrwa ithioretwe ngingo ikaûragwa itagwîtûrûra nthakame; mûtiagîrîrwe nî kûvûûra ûmaraa. Mue mûgeeka waro ethîrwa mûkathengutagîra maûndû mama. Tigwani na waro.”

1Akor 1:11

Ariû na aarî a îthe wetû, andû amwe a kuuma mûciî wa Kiloe nîmambîrîte cararûkû atî kûrî na ngarari gatagatîrî kenyu.

1Akor 5:11

Ûndû ûrîa naugaga nî atî mûtiagîrîrwe nî kûgîa ngwatanîro na mûndû wa wonthe ûrîa wîîtaga mûriû kana mwarî wa îthe wetû na ethîrwe nî mûvûûri ûmaraa, kana nî mûkoroku, kana nî mûvoi mîvuanano kana nî mûrumani, kana nî mûrîu wa njovi, wana kana nî mûcunani. Mue wana nginya mûtikaarîcanagîre na mûndû ta ûcio.

1Akor 6:13

Mûndû wîngî avota kuga atîrî, “Irio irî vo nîûndû wa îvu, na îvu rîrî vo nîûndû wa irio.” Ûguo nîguo kûrî, nwatî wa cioîrî Ngai nîakaaithiria. Mwîrî ndûrî vo nîûndû wa kûvûra ûmaraa, nwatî ûrî vo nîûndû wa gûtungatîra Mwathani. Na Mwathani nîke ûtûmaga mwîrî wîthîrwe ûrî vo.

1Akor 6:18

Ûrîrani wîvia wa kûmenyana kîîmwîrî. Wîvia wîngî wonthe ûrîa wîkagwa nî andû wîthagîrwa ûrî nja ya mwîrî, nwatî mûndû ûrîa wîvagia na njîra ya kûmenyana kîîmwîrî nîevagîria mwîrî wake ke mwene.

1Akor 6:9

Mue nîmwicî atî andû arîa aganu matikaagaîrwa ûthamaki wa Ngai. Mûtikeveenie; andû arîa mavûûraga ûmaraa kana mavoyaga mîvuanano kana matharagia, kana arûme arîa mamenyanaga kîîmwîrî na arûme arîa engî,

2Akor 12:21

Nînîramaka atî rîrîa ngaaûka rîngî Ngai wakwa nîagaatûma njonoke nîrî mbere yenyu. Nanie nîngeguîra andû engî kîeva arîa meevirie na matirî merira maûndû macûku marîa meekire ta ûmaraa na merirîria macûku ma mwîrî.

2Akor 2:5

Nwatî ethîrwa nîkûrî mûndû wîgwithanîtie kîeva, ke ndekîte ûguo kûrî nie nienga, nwatî (nîrauga ûguo ndakwenda kûgathîrîria mûno) ekîte guo kûrî mue muonthe.

2Akor 7:12

Kwoguo wana ethîrwa nînaandîkire maarûa îo, ndiamîandîkire nîûndû wa mûndû ûrîa wavîtirie kana mûndû ûrîa wavîtîrue. Vandû va ûguo namîandîkire nîguo nîmwonie cararûkû mbere ya Ngai ûrîa wîrutîri wenyu kûrî tue wîkariî.

Agal 5:19

Maûndû marîa macûku mekagwa nî mwîrî nîmeyonanîtie, namo nî: ûtharia, gwîka ciîko njûku na cia ûûra nthoni,

Aefeso 5:3

Na nîûndû mûrî andû a Ngai, maûndû mamwe matiagîrîrwe wana nî kûgwetwa gatagatîrî kenyu, namo nî ûmaraa, ûûra nthoni na ûkoroku.

Gûco 22:30

“Gûtirî mûndûmûrûme ûkaamenyana kîîmwîrî na mûka wa îthe, nîûndû gwîka ûguo nî gûconorithia îthe.

Gûco 27:20

“ ‘Kûnyitwa nî kîrumi nî mûndû ûrîa ûmenyanaga kîîmwîrî na mûka wa îthe, nîûndû kûu nî gûconorithia îthe.’ “Nao andû onthe nîmakaauga, ‘Ameni!’

Akol 3:5

Kwoguo ûragani merirîria marîa mûrî namo ma maûndû ma gûkû nthî. Namo nî: ûmaraa, ûûra nthoni, ûtûrîka, kûgîa na merirîria macûku na gûkoroka (nîûndû gûkoroka nî ta kûvoya ngai cia mîvuanano).

1Ath 4:7

Ngai aatwîtire tûtûûre tûrî atheru, nwatî tî tûtûûre tûkîvagia.

Kûguû 2:21

Nie nînîmûvete kavinda ga kwîrira, nwatî ke ndendaga gûtiga ciîko ciake cia ûmaraa.

Kûguû 21:8

Nwatî andû arîa iguoya, arîa matarî evokeku, arîa matarî atheru, mîtoi, arîa matharagia, arogi, arîa magoocaga mîvuanano, na arîa mavenanagia, nîmagaaikua îcuarî rîa mwaki ûrîa wakanaga na ûviriti, na nîkîo gîkuû gîa kaîrî.”

1Sam 2:24

Tigani gwîka maûndû mau rîngî anake akwa! Nîûndû ûvoro ûcio nîregua andû a Ngai-Mûnene makîaria îgûrû rîenyu tî mwaro!