Na mûndû wonthe ûrîa wegucaga arî na wendi wa gwîka ûguo nîwaretire matega ma gûtuma îgema rîa Ngai-Mûnene. Nao nîmaaretire indo cionthe irîa ciendekaga cia gûtûmîrwa vîndî ya kûgooca na cia gûtuma nguo cia ûthînjîri-Ngai.
Aka onthe arîa maarî na ûûgî wa gûtuma nîmaaretire ndigi cia gûtuma gîtambaa Kîamro na ndigi cia rangi wa vururu, njambarawe na cia rangi ndune irîa maarûthîte.
Andû onthe a Isiraeli arîa maarî na wendi wa kûvecana nîmaarutire matega ma Ngai-Mûnene nîûndû wa wîra wonthe ûrîa Ngai-Mûnene aathanîte na njîra ya Musa ûrutwe.
Musa nîwetire Bezaleli, Oholiabu na andû onthe arîa maarî na wara na maavotithîtue nî Ngai-Mûnene, na maarî na wendi wa gûtethia na akîmeera mambîrîrie kûruta wîra.
Andû arîa maarî na wara mwîngî gûkîra arîa engî nîo maarutaga wîra wa gûtuma îgema rîa Ngai-Mûnene. Maarîtumire na itambaa îkûmi cia nguo mbaro itumîtwe na ndigi cia rangi wa vururu, njambarawe, na cia rangi ndune na igemetue na akerubi.
