Nahumu 1:7 - ÎVUKU RÎA ÛVORO MWARO

⁷ Ngai-Mûnene nî mwaro, nîagitagîra andû ake vîndî ya thîna; nîagitagîra arîa onthe maûragîra kûrî ke.

Nahumu 1:7 ပူးပေါင်းရင်းမြစ်များ

1Maû 16:34

Cokeriani Ngai-Mûnene ngatho nîûndû ke nî mwaro, wendo wake ûtathiraga ûtûûraga tene na tene.

1Maû 5:20

Nîmaaigire mwîvoko wao kûrî Ngai na makîmûvoya amatethie. Nake Ngai nîwegwire mavoya mao na nîwamatethirie makîvoota andû a Hagiri vamwe na andû arîa maarî ngwatanîro nao.

2Maû 13:18

Kwoguo kavinda kau athigari a Isiraeli nîmaavootirwe. Nao athigari a Juda maavootanire nîûndû nîmeevokire Ngai-Mûnene, Ngai wa methe mao.

2Maû 32:11

Anga tîkwa Hezekia aramûveenia nîguo atûme mûkue nî yûra na nyonda akîmwîra atî, ‘Ngai-Mûnene, Ngai wetû agaatûvonokia kuuma kûrî mûthamaki wa Asîria?’

2Maû 32:21

Nake Ngai-Mûnene nîwatûmire mûraika na nîwathiîre akîûraga athigari arîa maarî njamba, anene a athigari a mbaara na anene onthe arîa maarî kûrîa mûthamaki wa Asîria aambîte magema. Kwoguo mûthamaki wa Asîria nîwacokire vûrûrirî wake aconokete mûno. Rîrîa aathiîre hekarûrî ya ngai yake, amwe a avîcî ake nîmaamûragire na mviû.

2Maû 32:8

Ke arî na vinya wa ûûmûndû tu, nwatî tue tûrî na Ngai-Mûnene, Ngai wetû wa gûtûtethia na gûtûrûîrîra.” Nao andû nîmaaûmîrîrue nî ciugo icio cia Hezekia, mûthamaki wa Juda.

Ezira 3:11

Nîmaainire nyîmbo cia gûkumia Ngai-Mûnene makiugaga atîrî, “Ngai-Mûnene nî mwaro, wendo wake ûtathiraga kûrî andû a Isiraeli nî wa tene na tene.” Andû onthe nîmaaugîrîrie na vinya wata ûrîa mangîavotire, magîkumagia Ngai-Mûnene nîûndû wîra wa gûtuma mûcingi wa hekarû nîwambîrîrîtue.

Thaburi 1:6

Nîûndû andû arîa athingu matongoragua nî Ngai-Mûnene, nwatî njîra ya andû arîa aganu îmaviraga gîkuûrî.

Thaburi 100:5

Nîûndû Ngai-Mûnene nî mwaro; wendo wake ûtathiraga ûtûûraga tene na tene, wîvokeku wake ûkinyagîra njiarwa cionthe.

Thaburi 20:1

Ngai-Mûnene arogûtethagia rîrîa wî na thîna! Ngai wa Jakovu arokûgitagîra!

Thaburi 25:8

Ngai-Mûnene nî mûthingu na nî mwaro, kwoguo nîathomithagia evia njîra îrîa magîrîrwe nî kûrûmîrîra.

Thaburi 27:5

Vîndî ya thîna nîakaangitîra, nîakaanthitha hekarûrî yake, na ambigage îgûrû vandû vagitîre.

Thaburi 37:39

Ngai-Mûnene nîavonokagia andû arîa athingu, na nîamagitagîra vîndî ya thîna.

Thaburi 37:40

Ngai-Mûnene nîamatethagia na akamavonokia; nîamavonokagia kuuma kûrî andû arîa aganu, nîûndû nîmathiîcaga kûrî ke amagitîre.

Thaburi 46:2

Kwoguo tûtigeetigîra wana nthî yainaina, na irîma inginaina igwe îriarî;

Thaburi 50:15

Mbîtaga vîndî îrîa wanyitwa nî thîna; nîngaakûvonokia nawe nîûkaangumia.”

Thaburi 59:16

Nwatî nîngaagûkumia nîûndû wa vinya waku; ngaagûkumagia iraûko cionthe nîûndû wa wendo waku ûtathiraga, nîûndû nîûtuîkîte mûgitîri wakwa, nîthithaga kûrî we vîndî îrîa nîrî na thîna.

Thaburi 71:3

Tuîka kûndû gwakwa gwa kwîthitha, vandû vagitîre va kûmenyagîrîra, nîûndû we nîwe vandû vakwa va kûûrîra na kûngitîra.

Thaburi 86:7

We nîwe mbîtaga, rîrîa nîrî thînarî, nîûndû we nî ûmbîtîkaga.

Thaburi 9:10

Arîa maicî rîîtwa rîaku nîmakwîvokete, nîûndû we Ngai-Mûnene ndûtiganagîria arîa magûcaragia.

Thaburi 91:15

Rîrîa akaambîta nîngaamwîtîka; nîngethîrwa nake arî thînarî; nîngaamûvonokia na ndûme atîîke.

Nthi 18:10

Ngai-Mûnene nîta nyomba ndaca na îrî na vinya, kûrîa andû arîa athingu mangîûrîra makagîa na ûgitîri.

Isaia 25:4

Nîûndû we nîwe mûgitîri wa andû arîa athîni, mûgitîri wa ngîa vîndî îrîa irî na mathîna. We nîwe ûmagitagîra kuuma kûrî rûkûngi rûnene, na nîwe kîruru Kîamo Kîam vîndî ya ûrugarî. Nîûndû îringa rîa mûndû ûtarî ntha rîkariî ta rûkûngi rûnene rûringîte rûthingo;

Isaia 32:2

Wa mûndû agaatuîka ta kûndû gwa kwîthitha rûkûngi, kana ta vandû va kwîthitha rûkûngi rûnene, kana ta tûrûnjî tûrî kûndû kûnyaru, kana ta mwîgunyî wa îthiga înene werûrî.

Isaia 50:10

Nû gatagatîrî kenyu wîtigîrîte Ngai-Mûnene na wathîkagîra mûgambo wa ndungata yake, wana ethîrwa athiîcagîrîra ndumarî atarî na ûtheri, nîevokete Ngai-Mûnene na nîevokaga Ngai wake.

Jeremia 16:19

We Ngai-Mûnene nîwe ûngitagîra na ûmvecaga vinya; nîwe ûndethagia vîndî ya mathîna. Mavûrûri kuuma mîena yonthe ya nthî nîmagaûka kûrî we makwîre atîrî, “Gûtirî kîndû methe metû maagaire tiga ngai cia maveeni, na indo îtarî vata kana umithio.

Jeremia 17:17

Ndûgatûme ngîa na guoya, mbûkaga kwîthitha kûrî we vîndî ya mathîna.

Jeremia 24:5

“Nie Ngai-Mûnene, Ngai wa Isiraeli nîrauga atî, ta ûrîa ngûyû ino îrî mbaro, nîguo ngona andû a Juda marî aro arîa narutire gûkû na ngîmavira îthamîriorî vûrûrirî wa Akalidei.

Jeremia 33:11

andû makiugîrîria macanjamûkîte nî gûkena, andû makiugîrîria marî kîrugorî Kîam ûviki. Nîmûkegua andû makina makenete makîrete maketha ma gûcokia ngatho hekarûrî ya Ngai-Mûnene makiugaga, ‘Kumiani Ngai-Mûnene mwene vinya wonthe, nîûndû nî mwaro, nîûndû wendo wake ûtathiraga nîwa tene na tene.’ Nîngatûma vûrûri ûyû ûgîe na maûndû maro wata ûrîa wekariî mbere. Ûguo nîguo nie Ngai-Mûnene nîrauga.”

Maca 3:25

Ngai-Mûnene nî mwaro kûrî arîa mamwîvokete, na kûrî arîa onthe mamûcaragia.

Danieli 3:28

Nebukadinezarû nîwaugire atîrî, “Ngai wa Shadiraka Mîsheki na Abedinego arokumua! Ke nîatûme mûraika wake nîguo avonokie arûme aya arîa mamûtungatagîra nama mamwîvokete. Nîmaaregire kwathîkîra watho wakwa na makiuga atî, nîkava gûkua îthenya rîa kwînamîrîra nthî, nîguo mavoe ngai îngî tiga Ngai wao.

Danieli 6:23

Nake mûthamaki nîwakenire mûno, na akîathana atî Danieli aguucue arutwe îrimarî rîa mînyambû. Nake nîwarutirwe kuo atarî mûtivie wanarî vandû, nîûndû nîwevokete Ngai wake.

Joeli 3:16

Ngai-Mûnene nîararuruma arî kîrîmarî gîa Zayuni; aranîrîra na mûgambo mûnene arî Jerusalemu, îgûrû na nthî nîirainaina. Ngai-Mûnene nîke rîûrîro rîa andû ake, nîke ûgitagîra andû ake.

Zefania 3:12

Nie nîngaatiga andû enyivia na avoreri kûu, arîa magaaûka kûrî nie nîguo nîmatethie.

Mathaayo 27:43

Ke nîevokete Ngai na augaga atî ke nî Mûriû wa Ngai. Tigani rîu twone kana Ngai nîakûmûtethûra.”

Mathaayo 7:23

Nanie nîngaamera atîrî, ‘Nie ndiamwîcî. Nthengutîrani mue mwîkaga maûndû macûku!’

Johana 10:14

Nie nînie mûrîthi ûrîa mwaro. Nîmbîcî ng'ondu ciakwa nacio ng'ondu ciakwa nîimbîcî,

Johana 10:27

Ng'ondu ciakwa nîithikagîrîria mûgambo wakwa; nie nînîciîcî na nîinûmagîrîra.

Aroma 11:22

Ûndû ûyû ûratwonia ûrîa Ngai arî mûtugi, na ûrîa arî mwaganu. Ke nîwaganagîra andû arîa magwîte na agatuga arîa matûûraga wegarî wake, nwatî ethîrwa tîmwîkara wegarî wake, nîakûmûkavûranga!

Agal 4:9

Nwatî rîu nîûndû nîmûmenyanîte na Ngai, kana mbuge Ngai nîamenyanîte na mue, nîkî kîratûma mûcokerere maroho marîa matarî vinya na matarî vata? Mûrenda gûtuîka ngombo cia maroho mau rîngî nîkî?

2Tim 2:19

Nwatî mûcingi ûrîa Ngai atumîte ndûngîenyenyeka; na îgûrû rîaguo kwandîkîtwe atîrî, “Mwathani nîwîcî andû ake na mûndû wa wonthe umbûraga Mwathani nwanginya atige gwîka maûndû ma waganu.”