Mûvunjia 3:12 - ÎVUKU RÎA ÛVORO MWARO

¹² Kwoguo nînaamenyire atî ûndû ûrîa mwaro mûndû angîka nî gûkena na gwîkenia ûtûûrorî wake wonthe.

Mûvunjia 3:12 ပူးပေါင်းရင်းမြစ်များ

Thaburi 37:3

Îîvokeni Ngai-Mûnene na mwîkage waro, nîguo mûtûûre vûrûrirî ûyû mûrî na thayû.

Mûvunjia 11:9

We mwanake kenagîra wîthî waku. Ngoro yaku nî îkenagîre wîthî waku. Îkaga ûrîa ngoro yaku îrenda. Nwatî ririkana atî Ngai nîagaagûtuîra nîûndû wa maûndû marîa monthe wîkaga.

Mûvunjia 2:24

Ûndû ûrîa mwaro mûno mûndû angîka ûtûûrorî wake nî kûrîa, kûnyua na gûkenerera wîra wake. Nînaamenyire atî wana ûndû ûyû uumaga kûrî Ngai.

Mûvunjia 2:3

Nîneciririe mûno ûrîa ngwîkenia na ndivei wa ndongoretue nî ûûgî, na ngîrûmagîrîra ûrimû nginya rîrîa ngaamenya maûndû maro mûno marîa andû mekaga kavinda kanini karîa matûûraga mwoyo.

Mûvunjia 3:22

Nînaacokire ngîmenya atî ûndû ûrîa mwaro mûno mûndû angîka nî gwîkenia na indo irîa acarîtie nîûndû ûguo nîguo avangîrîtwe. Gûtirî mûndû ûngîmenya ûrîa gûgekara arîkia gûkua.

Mûvunjia 8:15

Kwoguo mbîtîkîtie atî andû nîmagîrîrwe nî gwîkenia, nîûndû gûkû nthî gûtirî ûndû mwaro ûkîrîte kûrîa, kûnyua na gwîkenia. Mau nîmo maûndû marîa mûndû agîrîrwe nî gwîka rîrîa akûruta wîra gûkû nthî gwa kavinda karîa Ngai amûveete ga gûtûûra mwoyo.

Isaia 64:5

We nîwamûkagîra andû arîa mekaga maûndû ma ûthingu makenete, arîa makûririkanaga na marûmagîrîra njîra ciaku. We nîwarakarire nîtue, nwatî nîtwathiîre na mbere kwîvia; wana ethîrwa nîwarakarire mûno nîtue, tûtwîre twîvagia kuuma tene.

Luka 11:41

Vandû va gwîka ûguo, vecagani athîni ûtethio na indo cionthe cienyu nî igûtuîka ntheru.

Ciîko 20:35

Nie nînîmwonetie maûndûrî monthe atî wata ûrîa naarutaga wîra nîrî na kîîo kîîngî wa namue nwa nginya mwîkage guo nîguo mûtethagie andû arîa matarî na vinya. Nie nînîmwîrîte mûririkanage ciugo irîa Mwathani Jesû ke mwene aaugire atîrî, ‘Nîkwîthagîrwa kûrî na gîkeno makîria mûndû akîvecana gûkîra akîvewa.’ ”

Gûco 12:18

Nwatî mue, ciana cienyu, vamwe na ndungata cienyu cia arûme na cia aka, na Alawi arîa matûûraga matûûrarî menyu, mûkaarîcagîra matega mbere ya Ngai-Mûnene Ngai wenyu mûrî varîa Ngai-Mûnene Ngai wenyu akaathuura va kûgoocagîrwa na nî mûgaakenaga mûgîka maûndû monthe mûrî mbere ya Ngai-Mûnene Ngai wenyu.

Gûco 12:7

Mûrî vau mbere ya Ngai-Mûnene Ngai wenyu, mûkaarîcaga na mûgakena mûrî vamwe na andû a mîciî yenyu nîûndû wa maûndû monthe marîa Ngai-Mûnene Ngai wenyu amûrathimîte namo.

Gûco 26:11

Nîûgaakena nîûndû wa indo cionthe mbaro irîa Ngai-Mûnene, Ngai waku akûvete vamwe na andû a mûciî waku. Wanao Alawi na ageni arîa mûtûûranagia nao nîmagaakena.

Gûco 28:63

Wata ûrîa Ngai-Mûnene akenirue na akîmwîka maûndû maro na agîtûma mwîngîve mûno, nwa ta guo agaakena akîmûretithîria mathîna na akîmûthiria. Nîmûkaarutwa vûrûrirî ûrîa mûthiîte kwîgwatîra.

1Tim 6:18

Atha itonga ituîke andû aro na ituîke itonga cia mawîra marîa maro. Maathe matuîke andû ataana na andû a kûgaana indo ciao na andû arîa engî.