Mathaayo 21:5 - ÎVUKU RÎA ÛVORO MWARO

⁵ ‘Îrani îtûûra rîa Jerusalemu atî, taroriani, Mûthamaki wenyu nî araûka kûrî mue, ke nîmûvoreri na akuuîtwe nî mvunda, na nî njaû ya mvunda!’ ”

Mathaayo 21:5 ပူးပေါင်းရင်းမြစ်များ

Kîam 49:10

Mûragi wa ûtongoria ndûkaauma Juda, njiarwa ciake nîcio igûtûûra ciathanaga. Mavûrûri monthe nîmakaamwathîkîra, na menamagîrîre mbere yake.

2Sam 16:2

Mûthamaki Daudi nîwaûririe Ziba atîrî, “Indo ino cionthe nî ciakî?” Nake Ziba nîwacokirie atîrî, “Mvunda ino nî cia gûkuuaga andû a mûciî wa mûthamaki, mîgate na matunda nî cia kûrîwa nî anake, nayo ndivei nî ya kûnyunyagwa nî andû arîa mathira vinya marî werûrî.”

1Atha 1:33

Mûthamaki nîwamerire atîrî, “Thiîni na ndungata ciakwa, na mwîkarîrie Solomoni îgûrû rîa nyûmbû yakwa nie mwene, mûcoke mûmumagarie anyûrûrûke nginya Gihoni.

1Atha 10:26

Solomoni nîwaûnganirie vamwe ikaari cia mbaara na andû arîa maathiîcaga matûîte mbarathi. Aarî na ikaari ngiri îmwe na magana mana (1,400) cia mbaara, na athigari ngiri îkûmi na igîrî (12,000) arîa mathiîcaga matûîte mbarathi. Aamaigire matûûrarî marîa maaigagwa ikaari cia mbaara, nao acio engî akîmaiga Jerusalemu kwa mûthamaki.

Thaburi 9:14

nîguo ngaarûngama mbere ya andû a Jerusalemu, na nîmere maûndû monthe marîa matûmaga ngûkumie. Nîngaakena nîûndû nîûmvonoketie.

Isaia 12:6

Ugîrîriani na mwine mûkenete, mue arîa mûtûûraga Zayuni! nîûndû Ûrîa Mûtheru wa Isiraeli nî mûnene, na atûûraga gatagatîrî kenyu.”

Isaia 40:9

Unûkia îgûrû rîa kîrîma kîraca na îgûrû we Zayuni, anîrîra ûvoro ûrîa mwaro! Ugîrîria na vinya we Jerusalemu, anîrîra ûvoro mwaro. Ugîrîria na ndûgetigîre na wîre matûûra ma Juda atî: “Ûyû nîke Ngai wenyu!”

Isaia 62:11

Taroriani Ngai-Mûnene nîanîrîrîte nthî yonthe. Îrani andû a Zayuni atîrî, “Ngai-Mûnene nîaûkîte kûmûvonokia, aûkîte arî na iveo ciake, aûkîte na andû arîa aavonokirie.”

Ezek 34:24

Nanie Ngai-Mûnene nîngaatuîka Ngai wacio, na ndungata yakwa Daudi nîagaatuîka mûnene wacio. Nie Ngai-Mûnene nînie mbugîte ûguo.

Ezek 37:24

Ndungata yakwa Daudi nîgaatuîka mûthamaki wao, na methagîrwe marî a mûrîthi ûmwe. Nîmakaarûmagîrîra matuîro makwa ma ciira na mavingagie mawatho makwa.

Hosea 1:7

Nwatî nîngeguîra andû a Juda ntha na nîmavonokie. Nie Ngai-Mûnene Ngai wao nîngamavonokia, nwatî tî na vinya wa athigari a mbaara, kana rûviû rwa njûra kana mbaara, kana mbarathi, kana arîa mekaragîra mbarathi.”

Mika 5:2

Ngai-Mûnene augîte atîrî, “We Bethilehemu Efiratha, nîwe îtûûra rîrîa rînini mûno Juda. Nwatî mûndû ûrîa ûkaathana Isiraeli vandûrî vakwa akaauma kûrî we, na nîwa njiarwa cia methe ma tene.”

Ndari 24:19

Isiraeli nîakaavootana, na athirie andû arîa makethîrwa matigarîte.”

Mathaayo 11:29

Ocani îcoki rîakwa mwîkîre na mwîrute na nie, nîûndû nie nîrî mûvoreri na nîmwînyivia ngororî yakwa na nîmûkûvurûka.

Mathaayo 2:2

na makîûria andû atîrî, “Mwana ûrîa ûciarîtwe nîguo agaatuîka mûthamaki wa Ayahudi arî kû? Tue nîtûmenyithirue ûvoro wa gûciarwa gwake nî njata yumîte mwena wa îrathîro, na rîu twaûka kûmûgooca.”

Mathaayo 2:6

‘We Bethilehemu vûrûrirî wa Juda, We tîwe mûnini mûno gatagatîrî ka matûûra ma Juda, nîûndû mûtongoria nî akauma kûrî we, ûrîa ûkaarîthia andû akwa a Isiraeli.’ ”

Mathaayo 21:6

Nao arutwa acio aîrî nîmaathiîre na magîka wata ûrîa meerîtwe meke nî Jesû.

Luka 24:27

Jesû nîwacokire akîmeereithia maûndû marîa mamwîgiî na maarîtue Mandîkorî Matheru, kwambîrîria na mavuku ma Musa nginya marîa maandîkirwe nî arathi onthe.

Johana 1:49

Nathanieli nîwacokerie Jesû atîrî, “Mwarimû, we nîwe Mûriû wa Ngai! Nîwe Mûthamaki wa Isiraeli”

2Akor 10:1

Nie Paûlo nie mwene monekaga nîrî mwînyivia na mûvoreri rîrîa tûrî vamwe namue na mbîthagîrwa nîrî na ûcamba rîrîa tûtarî vamwe namue, nîramûthaitha nîrî na ntha na wega wa Kristû.

Gûco 17:16

Mûthamaki ûcio ndakethîrwe na mbarathi nyîngî, na ndagatûme andû Misiri kûgûra mbarathi nîûndû Ngai-Mûnene aaugire atî andû ake matigaacoka Misiri rîngî.

Atir 12:14

Abudoni aarî na avîcî mîrongo îna (40) na anake mîrongo îthatû (30) a avîcî ake arîa maathiîcaga matûîte mvunda mîrongo mûgwanja. Abudoni aatirîrîre vûrûri wa Isiraeli îvinda rîa mîaka înana.

Atir 5:10

Vecanani ûvoro mue mûthiîcaga mûtwîte mvunda ino njerû, mue mwîkarîrîte matandîko ma mbarathi, namue mûthiîcaga na magûrû, vecanani ûvoro.