Maca 1:18 - ÎVUKU RÎA ÛVORO MWARO

¹⁸ “Nwatî Ngai-Mûnene arî na kîvooto nîûndû nîndegete kwathîkîra kiugo gîake, nwatî tanthikîrîriani mue andû onthe, taroriani ûrîa nîrathînîka, erîtu na anake akwa nîatave.

Maca 1:18 ပူးပေါင်းရင်းမြစ်များ

1Atha 13:21

na akîra mûndû ûcio wa Ngai augîrîrîtie atîrî, “Ngai-Mûnene arauga atî, we nîûregete kûmwathîkîra na nîwaregire kûvingia kîrîkanîro kîrîa Ngai-Mûnene, Ngai waku aakwathire.

Ezira 9:13

Ûrîa wonthe wîkîkîte kûrî tue wîkîkîte nîûndû wa mevia na mavîtia metû. Nwatî we Ngai wetû îvera rîrîa ûtûverithîtie narîo nî rînini gûkîra ûrîa twagîrîrwe nî kûverithua, na ûgetîkîra tûtigare tûtarî athiru viû.

Nehemia 9:26

“Kûnarî ûguo andû aku nîmaaregire kwathîka, na nîmaareganire nawe. Nîmaareganire na Watho waku na makîûraga arathi arîa maameraga makûgarûrûkîre, na mavinda meengî nîmaakûrumire.

Nehemia 9:33

Ûtûverithîtie na njîra îrîa yagîrîrîte, we ûrî mwîvokeku na tue twîkîte maûndû ma waganu.

Thaburi 107:11

nîûndû nîmaareganîte na mawatho ma Ngai, na makaira mataaro ma Ûrîa ûrî Îgûrû Mûno.

Thaburi 119:137

We Ngai-Mûnene, wî mûthingu, na matuîro maku ma ciira nî ma ma.

Thaburi 119:75

Nîmbicî atî we Ngai-Mûnene, ûtucaga ciira ûrîa kwagîrîrîte, na wamverithirie nîûndû ûrî mwîvokeku.

Thaburi 145:17

Ngai-Mûnene nî mûthingu maûndûrî monthe, na arî ntha maûndûrî monthe marîa ekaga.

Ntha 9:27

Nake mûthamaki nîwatûmanîre Musa na Aroni na akîmera atîrî, “Kavinda gaka nie nînjîvîtie, Ngai-Mûnene ekîte ûrîa kwagîrîrîte. Nwatî nie na andû akwa tûrî avîtiu.

Jeremia 12:1

We Ngai-Mûnene wî mûthingu, wana ethîrwa nînîrakûretera mateta makwa, kûnarî ûguo nwa mende kwîyarîrîria mbere yaku. Nîndûî gîtûmaga andû arîa aganu mathatûkwa? Nîndûî gîtûmaga andû matarî evokeku mathiî na mbere?

Jeremia 32:23

Nao nîmaatonyire vûrûri ûcio makîwîgwatîra, nwatî matiakwathîkîra kana marûmîrîra watho waku. Matianeka ûndû wanarî ûmwe wa marîa wamaathire. Kwoguo nîûtûmîte manyitwe nî mathîna mama monthe.

Jeremia 4:17

Mathiûrûrûkîrîtie Jerusalemu ta arangîri a mûgûnda, nîûndû andû a kuo nîmareganîte nanie. Ûguo nîguo Ngai-Mûnene arauga.

Jeremia 49:12

Ngai-Mûnene arauga atîrî, “Ethîrwa arîa matavatiî kûnyuîra gîkomberî Kîam mathîna nî anyuîru, nwa mue mûtakûverithua? Naarî, nwa nginya wanamue mûnyuîre gîkomberî kîu!

Maca 1:12

“Taroriani mue muonthe mûravîtûka. Kûrî ûrî na kîeva ta gîakwa, kîeva kîrîa Ngai-Mûnene andeterete rîrîa aarakarîte mûno.

Maca 3:42

“Nîtwîvîtie na twarega gûkwathîkîra, nawe Ngai-Mûnene nî ûregete gûtûrekera.

Maca 5:16

Ngumo yetû nî nthiru, kaî tûrî thînarî-î, nîûndû nîtwîvîtie!

Danieli 9:5

Tue nî twîvîtie, nîtwîkîte maûndû macûku, na tûgeka naaî. Nîtûreganîte nawe na tûkaregana na maathani maku na irîra ciaku.

Danieli 9:7

We, Mwathani, wîthagîrwa ûrî mûthingu vîndî cionthe. Nwatî tue, tûtûûraga tûrî na gîconoko, wana andû onthe arîa matûûraga Judea na Jerusalemu, na andû onthe a Isiraeli arîa marî mavûrûrirî marîa marî vakuvî na marî kûraca, nîûndû matiarî evokeku kûrî we.

Amosi 8:13

“Mûthenya ûcio erîtu na anake arîa marî na ûgima wa mwîrî, nîmakaagirîka nîûndû wa kûnyonda.

Zefania 3:5

Nwatî Ngai-Mûnene ûrîa ûrî îtûûrarî rîu nî mwîvokeku, ekaga maûndû marîa magîrîru nwatî tî marîa macûku. Onanagia kîvooto wa kîraûko kûrî andû ake. Kûnarî ûguo, arîa aganu mathiîcaga na mbere gwîka naaî matarî na nthoni.

Zakaria 1:6

Methe menyu nîmaareganire na irîra na mawatho marîa namathire na njîra ya arathi ndungata ciakwa. Kwoguo nîmaaverire na makiuga atî nie Ngai-Mûnene Mûnene mwene vinya wonthe, nîmaverithîtie kûringana na mîthiîre yao na ciîko ciao wa ta ûrîa natuîte, na nîguo naamekire.”

Aroma 2:5

Nwatî we ûrî na ngoro nyûmû na nîûregete kwîrira. Kwoguo nîûreîngîvîria îvera rîaku rîrîa rîgaakinya mûthenya ûrîa marakara ma Ngai na îtua rîake rîa ma rîkaguûranîrua.

Aroma 3:19

Na rîu nîtwîcî atî maûndû monthe marîa marî Wathorî nîma andû arîa marî rungu rwa Watho nîguo gûtikaagîe ciîgwatio, nao andû onthe a nthî matuîke a gûcirithua nî Ngai.

Gûco 32:4

“Ke nî ta îthiga, wîra wake nî mûkinyanîru, maûndû make monthe nî ma kîvooto. Ngai nî mwîvokeku na wa ûma; ekaga maûndû marîa magîrîrîte na ma kîvooto.

Atir 1:7

Adonibeseki nîwacokire akiuga atîrî, “Nîkwarî na athamaki mîrongo mûgwanja maatinîtue ciara irîa nene cia njara wana cia magûrû. Athamaki acio moocanagia rwîtîki rungu rwa metha yakwa makîrîcaga. Wata ûrîa nekire andû, nwaguo Ngai ambîka.” Adonibeseki nîwacokire akîvirwa Jerusalemu, kûrîa aakuîrîre.

1Sam 15:23

Kûregana na Ngai-Mûnene kwîganene na wîvia wa ûragûri, naruo rûng'athio nî wîvia wîganene na wîvia wa kûvoya mûvuanano. Nîûndû nîwaregire gwîka ûrîa Ngai-Mûnene aakwîrire wîke, wanake nîaregete ûtuîka mûthamaki.”