Maariko 13:7 - ÎVUKU RÎA ÛVORO MWARO

⁷ Na rîrîa mûkeegua mûrurumo wa mbaara vakuvî namue, kana ûvoro wa mbaara îrîa îgaaûka, mûtikavavûke. Maûndû ta mama nwa nginya mekîke, nwatî ûcio tîguo mûthiia wa nthî.

Maariko 13:7 ပူးပေါင်းရင်းမြစ်များ

2Sam 14:14

Tuonthe nwanginya tûgaakua; tûvana ta manjî metîkîte nthî, marîa matangîoceka rîngî. Wanake Ngai ndangîcokia mwoyo mûndû ûrîa ûrîkîtie gûkua, nwatî mûthamaki nwa avote gûcaria njîra ya gûcokia mûciî mûndû ûrîa ûrî îthamîriorî.

Thaburi 112:7

Ke ndetigagîra kwîgua ûndû mûcûku; wîtîkio wake nî mwîkindîriu, na evokaga Ngai-Mûnene.

Thaburi 27:3

Wana athigari a mbaara mangîndigicîria, gûtirî kîndû ngeetigîra, wana nthû ciantharîkîra, vîndî cionthe ngeevokaga Ngai.

Nthi 3:25

Ndûgetigîre ûndû wa kûmakania ûrîa ûngîûka wa rîmwe, kana ivuvûkanio irîa ingîtharîkîra andû arîa aganu na vinya.

Isaia 8:12

“Ndûkanyitanîre na mîvango yao, na ndûgetigîre maûndû marîa maretigîra, kana wîgua guoya.

Jeremia 51:46

Mûtigakue ngoro kana mwîgue guoya, nîûndû wa ndeto îtarî na mûkinyo irîa mûregua gûkû vûrûrirî. Wa mwaka ûrî na ndeto itarî mûkinyo; ndeto cia mbaara vûrûrirî, mûthamaki ûmwe akîrûa na ûrîa wîngî.

Mathaayo 18:7

Na kaî nthî îrî na thîna-î, nîûndû atî kûrî na maûndû matûmaga andû mevie. Maûndû ta mau magatuîkîkaga vingo cionthe, nwatî mûndû ûrîa ûtûmaga maûndû mau mekîke arî na thîna.

Mathaayo 2:3

Na rîrîa Mûthamaki Herode eegwire ûvoro ûcio nîwatangîkire mûno ngororî yake, vamwe na andû onthe arîa maarî Jerusalemu.

Maariko 13:6

Nîûndû andû eengî nîmagaaûka makiugaga atî nîo Mesaya na nîmakaavîtithia andû eengî.

Maariko 13:8

Mavûrûri nîmakaarûa, namo mothamaki mathithûkanîre. Nîgûkaagîa na ithingithia kûndû kwîngî wana kûgîe na yûra. Maûndû mama nî ta Kîammbîrîria Kîam ûrûrû ûrîa mûndûmûka egucaga akîgîa na mwana.

Johana 14:1

Jesû nîwamerire atîrî, “Tigani gûtangîka ngororî cienyu. Îtîkiani Ngai na wa nanie mûmbîtîkie.

Johana 14:27

“Thayû nîguo nie nîramûtigîra; nî thayû wakwa nîramûva. Nie ndiramûva thayû wîkariî ta ûrîa ûvecanagwa nî nthî. Tigani gûtangîka ngororî cienyu kana mûgîe na guoya.

Ciîko 17:3

Nîwamataarîrie mandîko na kuuma kûrî mo akîmonia na ma atî nîkwarî na wagîrîru wa Mesaya athînue na acoke ariûke. Nake Paûlo nîwamerire atîrî, “Jesû ûcio nie nîramwîra ûvoro wake, nîke Mesaya.”