Luka 1:78 - ÎVUKU RÎA ÛVORO MWARO

⁷⁸ Ngai wetû arî ntha na nî mûkirîrîria. Nîagaatûma tûthererwe nî ûtheri wa ûvonokio.

Luka 1:78 ပူးပေါင်းရင်းမြစ်များ

Thaburi 25:6

We Ngai-Mûnene taririkana ntha ciaku na wendo waku ûtathiraga, ûrîa wonanirie kuuma tene.

Isaia 11:1

Nîgûkaaumîra mûthamaki kuuma njiarwarî cia Jesii, ta ûrîa rûvûa rûkûraga kuuma mûtîrî.

Isaia 42:16

“Nîngaatongoreria itumumu njîrarî irîa mataicî. Ngaamatongoreria tûcîrarî tûrîa matamenyete. Nîngaagarûra nduma îrîa îrî mbere yao îtuîke ûtheri, na kûndû kûrîa gûtarî kwaraganu nîkwaraganie. Mama nîmo maûndû marîa ngeeka, na ndikaamatiganîria.

Isaia 63:15

We Ngai-Mûnene, ûtûrorie kuuma îgûrû, kûrîa ûtûûraga na kûtheru. Ûtugi waku mwîngî na vinya waku kûrî tue irî kû? Wendo waku na ntha ciaku irî kû? Ndûgatûtiganîrie.

Isaia 63:7

Nîngûvecana ûvoro wa wendo ûtathiraga wa Ngai-Mûnene, na nîmûgooce nîûndû wa maûndû monthe marîa atwîkîrîte, na nîûndû wa maûndû manene na maro marîa ekîrîte nyomba ya Isiraeli, kûringana na ntha ciake na wendo wake ûtathiraga.

Zakaria 3:8

Tathikîrîria waro, we Joshua Mûthînjîri-Ngai mûnene. Wa namue athînjîri-Ngai arîa mûtungataga vamwe nake tathikîrîriani. Mue oni a maûndû ma mavinda marîa magaaûka tathikîrîriani. Nîngûreta ndungata yakwa îrîa îtagwa Rûvûa.

Zakaria 6:12

Mwîre Ngai-Mûnene mwene vinya wonthe augîte atî, ‘Ûyû nîke mûndû ûrîa wîtagwa Rûvûa. Nîagaatamba arî wa vau arî na atume rîngî hekarû ya Ngai-Mûnene.

Malaki 4:2

Nwatî nîûndû wenyu mue arîa mûngoocaga, ûvoti wakwa wa kûmûvonia nîûkaamwarîra ta riûa rîrî na vinya wa kûvonia mîrûri yarîo. Mûkauma mûkîrûgarûgaga ta njaû ciauma rwagarî rwa cio.

Ndari 24:17

Nînîrona ûrîa ûgaaûka vuvarî, nînîramwona nwatî ndarî vakuvî. Nîakaaumîra ta njata kûrî njiarwa cia Jakovu, gatagatîrî ka andû a Isiraeli nîgûkaauma Mûthamaki. Nîakaathiria atongoria a Moabu, na acûkangie njiarwa cionthe cia Sethi.

Johana 3:16

Nîûndû Ngai nîwendire andû a gûkû nthî mûno nîwavecanire Mûriû wake wa mûmwe nîguo mûndû wa wonthe ûmwîtîkîtie ndagaakue nwatî agîe na mwoyo wa tene na tene.

Aefeso 5:14

nîûndû ûndû wa wonthe ûguûrîtue cararûkû nîûtuîkaga ûtheri. Na kîu nîkîo gîtûmaga kwîrwe atîrî: “We ûmamîte ûkîra, na ûriûke ume kûrî arîa akuû, na Kristû nîagûkûva ûtheri.”

Afil 1:8

Ngai nî mûira atî nîraria ûma vîndî îrîa nguga atî wendo wakwa kûrî mue wîthagîrwa umîte ngororî ya Jesû Kristû ke mwene.

Afil 2:1

Mwatûûra ndarî ya Kristû mûkethagîrwa mûrî na vinya, naguo wendo wake ûkamûmagîrîria. Gwatanagîrani mûrî na Roho Mûtheru; îgucanagîrani ntha na mûtuganage mûndû na mûndû ûrîa wîngî.

Akol 3:12

Mue mûrî andû a Ngai. Ke nîwamwendire na nîwamûthuurire mûtuîke andû ake. Kwoguo îgucanagîrani ntha, tanavanagîrani, îînyivagieni, îthagîrwani mûrî avoreri na mûrî akirîrîria.

2Pet 1:19

Na tûrî na ûma makîrîa wa ndûmîrîri îrîa yanîrîrwe nî arathi. Nîmwagîrîrwe nî kûthikîrîria ndûmîrîri îo, nîûndû yo îkariî ta taa yakanîte vandû ndumarî nginya gûkîe, na ûtheri wa njata ya kîraûko ûgakengaga ngororî cienyu.

1Joh 3:17

Mûndû angîthîrwa nî mûtongu na one mûrwang'ina kana mwarwang'ina arî na thîna nwatî arege kûmwîguîra ntha, mûndû ûcio nwa ethîrwe endete Ngai?

Kûguû 22:16

“Nie Jesû, nînie ndûmîte mûraika wakwa kûrî mue nîguo anîrîre ndûmîrîri îno kûu makanitharî. Nie nîrî wa rûciaro rwa nyomba ya Daudi. Nie nînie njata îrîa ngengu ya kîraûko.”