Kûguû 8:7 - ÎVUKU RÎA ÛVORO MWARO

⁷ Nake mûraika wa mbere nîwavuvire karumbeta gake. Nayo mbura ya mbembe na mwaki, itukanîte na nthakame nîcietîkire nthî. Nakîo gîcunjî kîmwe Kîam icunjî ithatû cia nthî na nyaki yonthe ya ngirini, na gîcunjî kîmwe Kîam icunjî ithatû cia mîtî nîciavîre.

Kûguû 8:7 ပူးပေါင်းရင်းမြစ်များ

Thaburi 105:32

Îthenya rîa mbura, aamaurithîrie mbura ya mbembe, na mveni ciamûrîkaga vûrûri wao wonthe.

Ntha 9:33

Musa nîwaumire varî mûthamaki wa Misiri na akîthiî nja ya îtûûra rînene. Na rîrîa aaûkîrîrie njara ciake na îgûrû akîvoya Ngai-Mûnene, ngwa na mbura ya mbembe nîyatigire kuura gûkû nthî.

Isaia 28:2

Taroria, Mwathani nîethuurîrîte njamba îrî vinya; ûrîa wîkariî ta mbura ya mbembe na rûkûngi rûnene, ta makûmbî manene ma manjî makiuna; nîakaamarivania nthî na vinya.

Isaia 29:6

Ngai-Mûnene mwene vinya wonthe nîagaaûka kûrî mue, na njîra ya ngwa, kîthingithia na mûgambo mûnene, rûkûngi rwa ngoma cia aka, rûkûngi rûnene na mwaki wa kûthiria.

Isaia 30:30

Ngai-Mûnene nîagaatûma mûgambo wake ûrîa ûrî riiri wîguîke, na aringe nthû ciake na vinya arî na marakara. Nîgûkethîrwa na rûrîrîmbî rwa mwaki rwa kûvîvia viû, marurumî, ngûa na mbura ya mbembe.

Isaia 32:19

Naguo mûtitû nîûkaathirua viû, narîo îtûûra rîcûkangue viû.

Ezek 38:22

Nîngaamûverithia na mîrimû mîcûku na ndûme andû maûragane. Nîngaaurithîria Gogu, athigari ake a mbaara na arîa onthe arî nao mbura nene ya mbembe na mwaki wa ûviriti.

Joeli 2:30

“Nîngekîra rûûri îgûrû na nthî, nîgûkethîrwa na nthakame, mwaki na matu ma ndogo.

Jakuvu 1:11

Riûa nîrîaraga rîrî na ûrugarî mwîngî na rîkavîvia mûmera, maûa maguo magûcaga na ûthaka waguo ûkathira. Na njîra wata îo itonga nîigaakua îrî mawîrarî ma cio.

Josh 10:11

Vîndî îrîa Amori maavinyûrîte mavîtûkîrîrîte mwanyarî wa kîrîma maûrîte kuuma kûrî athigari a Isiraeli, Ngai-Mûnene nîwatûmire maurîrwe nî mbura ya mbembe. Mbura îo nîyamaurîre nginya magîkinya Azeka. Amori eengî nîmaaûragirwe nî mbura îo ya mbembe gûkîra arîa maaûragirwe nî athigari a mbaara a Isiraeli.

1Pet 1:24

Mandîko matheru maugîte atîrî: “Andû onthe mekariî ta nyaki, na riiri wao wonthe wîkariî ta maûa ma kîthaka. Nyaki nîyûmaga, namo maûa nîmagûcaga,

Kûguû 12:4

Njûnamatu îo nîyagucirie gîcunjî kîmwe Kîam ithatû Kîam njata cia îgûrû na mûkiia wayo, na îgîcikia nthî. Nayo nîyarûngamire mbere ya mûndûmûka ûcio warî vakuvî gûciara nîguo îrîe kaana gaciarwa warîo.

Kûguû 16:2

Kwoguo mûraika wa mbere nîwathiîre na agîtûrûra kîrîa Kîamrî mbakûrirî yake kûu nthî. Nao andû arîa maarî na rûûri rwa nyamû na arîa magoocete mûviano wayo, nîmaagîre na ironda njûku na ciarî na ûrûrû mîîrîrî yao.

Kûguû 16:21

Mbura ya mbembe nene ciarî na ûrito ta wa kilo mîrongo îtano nîyaurire kuuma îgûrû. Nayo yaurîra andû, nîmaarumire Ngai nîûndû wa mavera ma mbura. Mavera mau maarî mûcûku mûno.

Kûguû 6:8

Nînaroririe na ngîona mbarathi ya rangi îno nthererûku. Nake ûrîa wathiîte amîkarîrîte eetagwa Gîkuû na Vûrûri wa arîa akuû nîwamûrûmîrîrîte. Nao nîmaaveerwe ûvoti wa kwatha kîmwe gîa icunjî inya cia nthî nîguo maûrage andû na njîra ya mbaara, yûra, mîrimû, na nyamû cia kîthaka.

Kûguû 7:1

Vuva wa ûguo nînoonire araika ana marûngamîte mîthiiarî îna ya nthî. Araika acio maarigîrîrîtie ngûngi cia mîthiia wa yo îna ya nthî itikavurutane nthî nyûmû, îriarî kana mûtîrî wana ûrîkû.

Kûguû 9:15

Kwoguo araika acio ana nîmaarekererue. Araika acio maaigîtwe mavarîrîtue nîûndû wa îthaa rîîrî, mûthenya ûyû, mweri ûyû, na mwaka ûyû nîguo mavote kûûraga gîcunjî kîmwe Kîam ithatû Kîam andû arîa marî gûkû nthî.

Kûguû 9:18

Gîcunjî kîmwe Kîam ithatû Kîam andû arîa marî gûkû nthî nîmaaûragirwe nî mathîna mathatû marîa maaumaga tûnyuarî twa mbarathi: namo nî mwaki, ndogo na ûviriti.

Kûguû 9:4

Nacio nîcierirwe itigacûkie nyaki, kana mîtî, wana kana mûmera wa wonthe. Cierirwe icûkie tu andû arîa mataarî na mûvûûri wa Ngai ithithiirî ciao.