Kîam 18:32 - ÎVUKU RÎA ÛVORO MWARO

³² Iburahimu nîwaugire rîngî atîrî, “Nakûthaitha Ngai-Mûnene ndûkarakare, tiga mbarie riita rîmwe tu. Narîo ethîrwa nî andû îkûmi aro atigaru?” Nake Ngai-Mûnene nîwaugire atîrî, “Nîngîona andû îkûmi athingu ndikaarîcûkangia.”

Kîam 18:32 ပူးပေါင်းရင်းမြစ်များ

Kîam 18:30

Iburahimu nîwathiîre na mbere kuga atîrî, “Nakûthaitha Ngai-Mûnene ndûkarakare nîûndû nwanginya mbarie rîngî. Narîo ethîrwa kûrî na andû mîrongo îthatû tu aro?” Nake Ngai-Mûnene nîwaugire atîrî, “Ethîrwa nwa mone andû mîrongo îthatû athingu, ndikaarîcûkangia.”

Kîam 18:31

Iburahimu nîwaugire atîrî, “Nakûthaitha Ngai-Mûnene ûnjovere nîûndû wa kûmîrîria kûthiî na mbere gûkwarîria. Narîo ethîrwa kûrî na andû mîrongo îîrî tu athingu?” Nake Ngai-Mûnene nîwaugire atîrî, “Nîngîona andû mîrongo îîrî tu aro, ndikaarîcûkangia.”

Kîam 44:18

Juda nîwathiîre kûrî Josefu na akîmwîra atîrî, “Mwathi wakwa, nakûthaitha ûmbîtîkîrie mbarie nawe nie ndungata yaku, na ndûkarakare nîûndû wakwa. Nîmbicî we ûrî na ûvoti ta wa mûthamaki wa Misiri ke mwene.

Ayubu 33:23

Nwatî mûraika angîthîrwa vakuvî nake mûraika ûmwe gatagatîrî ka araika ake ngiri, wa kûmûririkanagia ûrîa agîrîrwe nî gwîka.

Thaburi 86:5

We Mwathani, wî mwagîrîru na nîwovanagîra; nîwonagia andû arîa makûvoyaga wendo ûtathiraga.

Ntha 32:14

Kwoguo Ngai-Mûnene nîwagarûrire meciria make na ndaaretera andû ake mûthiro ûrîa endeete kûmaretera.

Nthi 15:8

Ngai-Mûnene nîakenagua nî mavoya ma andû arîa athingu, nwatî nîathûrîte magongoona marîa arutagîrwa nî andû arîa aganu.

Isaia 65:8

Ngai-Mûnene arauga atîrî, “Andû moona thavibu inyitanîte vamwe irî mbaro meranaga atî: ‘Tûtikaithûkie, nîûndû nwa ciume ndivei.’ Ûguo nîguo ngeeka nîûndû wa ndungata ciakwa, na ndikaamathiria onthe.

Jeremia 5:1

Vinyûrani kûndû na kûndû varavararî cia Jerusalemu, mûrorie na mwîyonere! Mûtuîrie na kûu thokorî, mwone kana kûrî wanarî ûmwe, ûrûmagîrîra kîvooto na ûcaragia ûma. Mwamwona, nie Ngai-Mûnene nîngûrekera Jerusalemu.

Mika 7:18

We Ngai, nîkûrî wîngî wîkariî ta we? We wovagîra andû aku mevia arîa maatigirwe marî mwoyo. Marakara maku matitûûraga tene na tene nîûndû nî ûtwonagia wendo ûtathiraga.

Mathaayo 7:7

“Voyani, na nîmûkûvewa; cariani, na nîmûkwona; ringaringani mûrango, na nîmûkûvingûrîrwa.

Aefeso 3:20

Ngai arokumua na njîra ya vinya wake ûrîa ûrutaga wîra ndaarî yetû, ke nîavotaga gwîka maûndû meengî mûno makîria ya marîa tûngîmûria wana kana tûngîciria.

Atir 6:39

Gideoni nîwacokire akîîra Ngai rîngî atîrî, “Ndûkandakarîre, tiga mbuge ûndû ûmwe tu rîngî. Nakûthaitha ûmbîtîkîrie ngerie guoya îno riita rîngî rîmwe. Vîndî îno, tiga guoya îno îthîrwe îrî nyûmû, nayo nthî îthîrwe îrî na îme.”