Johana 7:28 - ÎVUKU RÎA ÛVORO MWARO

²⁸ Rîrîa Jesû aathomithanagia hekarûrî, nîwanîrîre akiuga atîrî, “Mue nama nîmûmbîcî na mûkamenya kûrîa nyumîte? Nwatî nie tînie nîîtûmîte. Ûrîa wandûmire nî wa ma na mue mûtimwîcî,

Johana 7:28 ပူးပေါင်းရင်းမြစ်များ

Thaburi 9:10

Arîa maicî rîîtwa rîaku nîmakwîvokete, nîûndû we Ngai-Mûnene ndûtiganagîria arîa magûcaragia.

Jeremia 31:34

Gûtirî mûndû ûgaacoka kûthomithia ûrîa wîngî akîmwîraga atî, ‘Menya Ngai-Mûnene,’ nîûndû andû onthe, anini na anene, nîmakaamenya. Nîngamarekera mavîtia mao na ndikaririkana mevia mao rîngî. Ûguo nîguo Ngai-Mûnene arauga.”

Jeremia 9:6

Mavinyagîrîria andû na makamaveenia, na makarega kûmenya. Ûguo nîguo nie Ngai-Mûnene nîrauga.

Hosea 4:1

Ta thikîrîriani kiugo Kîam Ngai-Mûnene mue andû a Isiraeli, nîûndû Ngai-Mûnene nîarathitanga atûûri a vûrûri ûyû. “Gûtirî na wîvokeku kana ntha vûrûrirî ûyû, gûtirî mûndû ûmenyete Ngai-Mûnene vûrûrirî ûyû.

Hosea 5:4

Ciîko ciao itingîmetîkîria gûcokerera Ngai wao. Nîûndû mecûrîtwe nî ngumba ya ûmaraa; matimbicî nie Ngai wao.

Mathaayo 11:27

“Vava nîamvete indo cionthe; gûtirî mûndû wîcî mûriû tiga Vava. Na gûtirî mûndû wîcî Vava tiga Mûriû na arîa Mûriû endaga kûmaguûrîria.

Mathaayo 2:23

Nake Josefu nîwathaamîre îtûûrarî rîa Nazarethi na agîtûûra kuo. Namo maûndû nîmaavingire marîa arathi maaugîte atî: “Ke nîageetwa Mûnazari.”

Mathaayo 26:55

Nake Jesû nîwaûririe kîrîndî atîrî, “Mûkîte kûnyita mûkuîte mviû na njokoma takwa nî mûcunani? Nîrekaraga hekarûrî mûthenya wa mûthenya ngîthomithagia na matingînyiita.

Luka 10:22

“Vava nîmûnengeru maûndû monthe. Gûtirî mûndû wana ûmwe wîcî Mûriû tiga Îthe, na gûtirî mûndû wana ûmwe wîcî Vava tiga Mûriû na andû arîa Mûriû endaga kûmenyithia ke nû.”

Luka 2:11

nîûndû ûtukû wa ûmûnthî îtûûrarî rîa Daudi nîmûciarîrîtwe mûvonokia na nîke Kristû Mwathani.

Luka 2:39

Rîrîa Josefu na Mariamu maarîkirie gwîka maûndû monthe marîa maathîtwe nî Watho wa Mwathani, nîmaacokire îtûûrarî rîao rîa Nazarethi, vûrûrirî wa Galili.

Luka 2:4

Josefu nîwaumire îtûûrarî rîa Nazarethi vûrûrirî wa Galili na akîthiî îtûûrarî rîa Bethilehemu vûrûrirî wa Judea, kûrîa mûthamaki Daudi aaciarîrwe. Josefu aathire kûu nîûndû aarî wa nyomba na wa mbarî ya Daudi.

Luka 2:51

Jesû nîwacokire Nazarethi arî vamwe na aciari ake, na nîwekaranagia nao akîmaathîkagîra. Nake ng'ina nîwaigaga maûndû mau monthe ngororî yake.

Johana 1:46

Nake Nathanieli nîwaûririe Filipu atîrî, “Kûrî kîndû Kîamro kîngiuma îtûûrarî rîa Nazarethi?” Nake Filipu nîwamûcokerie atîrî, “Ûka ûkone.”

Johana 10:36

Vava nîwanyamûrire na akîndûma gûkû nthî. Kwoguo nîndûî kîratûma muge nînaruma Ngai namwîra, ‘Nie nîrî Mûriû wa Ngai?’

Johana 12:49

Nie ndinaria na wathani wakwa nie mwene, nwatî Vava ûrîa wandûmire nîke ûmvete ûrîa mbagîrîrwe nî kuga na kwaria.

Johana 14:10

Filipu, ndûretîkia atî nie nîrî ndaarî ya Vava na Vava arî ndaarî yakwa? Nie, tînie nîîrîte ciugo irîa namwîra. Vava ûrîa wîkaraga ndaarî yakwa nîke wîkaga maûndû mama.

Johana 14:31

nwatî nîmbîkaga maûndû monthe marîa Vava ambathaga mbîke, nîguo andû a gûkû nthî mamenye atî nîmendete Vava. “Ûkîrani rîu tûthiî tuume ava.

Johana 16:3

Andû nîmakaamwîka maûndû mama nîûndû matiîcî Vava na matimbicî.

Johana 17:25

Vava Mûthingu! Andû a gûkû nthî matigwîcî, nwatî nie nîngwîcî na nginya acio wamvere nîmaicî atî we nîwe wandûmire.

Johana 17:3

Naguo mwoyo wa tene na tene nî atî andû onthe makûmenye we Ngai wa ma na mamenye Jesû Kristû ûrîa watûmire.

Johana 3:2

Ûtukû ûmwe Nikodemu nîwathiîre kûrî Jesû na akîmwîra atîrî, “Rabii, tue nîtwîcî atî we wî mwarimû ûtûmîtwe nî Ngai. Gûtirî mûndû wana ûmwe ûngîvota kûringa ciama ta icio ûringaga Ngai atarî vamwe nake.”

Johana 3:33

Nwatî mûndû wa wonthe wîtîkagîra ûira wake, nîatuîkaga mûira atî Ngai nî wa ma.

Johana 5:32

Nwatî nîmbîcî atî kûrî mûndû ûvecanaga ûira ûmbîgiî, na nie nîmbîcî atî maûndû marîa augaga mambîgiî nî ma ma.

Johana 5:43

Nie mbûkîte na rîîtwa rîa Vava na mûtinyamûkagîra. Nwatî mûndû wîngî angîûka akîaragia ûrîa eîrîte, nwa mûmwamûkîre.

Johana 6:42

Nao nîmaaugaga atîrî, “Na ma ûyû nî Jesû mûvîcî wa Josefu. Tue nîtwîcî îthe wana ng'ina. Rîu ke arauga aumîte îgûrû nîkî?”

Johana 7:14

Rîrîa kîrugo Kîamgeerie gûkinya gatagatî, Jesû nîwatonyire hekarûrî na akîambîrîria kûthomithania.

Johana 8:14

Nake Jesû nîwamacokerie atîrî, “Wana ethîrwa nîravecana ûira wakwa, ûira ûrîa nîramûva nî wa ma nîûndû nie nîmbîcî kûrîa naaumire na kûrîa nthiîte. Mue mûtiîcî kûrîa naaumire wana kana kûrîa nthiîte.

Johana 8:16

Nwatî wana ningîtucanîra ciira îtua rîakwa rîngîthîrwa rîrî rîa ma, nîûndû nditucanagîra ciira nîrî nienga. Nwatî twîthagîrwa tûrî na Vava ûrîa wandûmire.

Johana 8:19

Nao Afarisai nîmaamûririe atîrî, “Aguo arî kû?” Nake Jesû nîwamacokerie atîrî, “Mue mûtimbîcî na mûtiîcî Vava. Angîthîrwa nîmûmbîcî nîmûngîramenya Vava.”

Johana 8:26

Nîrî na maûndû meengî nîngiuga mamwîgiî na ma kûmûtuîra ciira. Nwatî ûrîa wandûmire nîmwîvokeku na nie mvecaga andû tu ûvoro ûrîa mbîguîte kuuma kûrî ke.”

Johana 8:42

Nake Jesû nîwamerire atîrî, “Angîthîrwa na ma Ngai nîke Îthe wenyu, nîmûngîmendete nîûndû naaumire kûrî Ngai na rîu nîrî ava. Nie tînie netûmire nwatî Ngai nîke wandûmire.

Johana 9:29

Tue nîtwîcî atî Ngai nîwarîrie Musa, nwatî tue wana tûtiîcî îtûûra rîrîa mûndû ûcio aumîte!”

Ciîko 17:23

Vîndî îrîa nie nîracerangaga îtûûrarî rîîrî rîenyu na ngîroria kûrîa mue mûgoocagîra, nînîrethîre metha ya kûrutîra kîgongoona yandîkîtwe atîrî, ‘Kûrî Ngai ûrîa Ûtaicîkene’. Na kwoguo, ngai ûcio mue mûgoocaga wana mûtamwicî, nîke Ngai ûrîa nie nîravunjia ûvoro wake kûrî mue.

Aroma 1:28

Nîûndû andû acio nîmaaregire kûmenya Ngai, ke nîwamarekererie magîe na meciria macûku na mekage maûndû marîa matagîrîrîte.

Aroma 3:4

Naarî! Ngai atûûraga arî mwîvokeku wana andû onthe mangîtuîka a maveeni. Kwandîkîtwe atîrî Mandîkorî matheru, Nwanginya wonanagie kîvooto rîrîa ûkwaria na rîrîa ûgûtuîrwa ciira, nwanginya ûvootanage.

2Akor 1:18

Nî ma wata ûrîa Ngai arî mwîvokeku, kîîranîro gîakwa gîtiarî “Ii” na “naarî”.

2Akor 4:6

Nîûndû Ngai nîke waugire atîrî, “Tiga ûtheri ware ndumarî.” Ngai ûcio nwake watûmire ûtheri wake ware ngororî cietû nîguo tûmenye riiri wa Ngai ûrîa ûrî ûthiûrî wa Kristû.

Tito 1:2

Ûvoro wa gwîtîkia na kûgîa na ûmenyo wa ûvoro wama nî ûvecanaga kîîrîgîrîro Kîam Mwoyo wa tene na tene kîrîa Ngai ûrîa ûtaveenanagia aatwîrîre kuuma Kîammbîrîria.

Ahib 6:18

Kûrî na maûndû maîrî marîa matangîgarûrîka namo nî atî: Ngai ndangîîricûkwa rîrîa akwîranîra ûndû, na ndangîveenania rîrîa akwîvîta. Maûndû mama nîmatûmagîrîria tue arîa tûthiîcaga kûrî Ngai nîguo atûgitîre, na nîmatûvecaga vinya wa gûtûûra tûrî na kîîrîgîrîro kîrîa kigîtwe mbere yetû.

1Joh 5:10

Kwoguo mûndû wa wonthe wîtîkagia Mûriû wa Ngai arî na ûira ûyû ngororî yake. Nwatî mûndû wa wonthe ûtetîkîtie Ngai nî atuîte Ngai wa maveeni, nîûndû mûndû ûcio ndetîkanîtie na ûrîa Ngai augîte ûrî ta ûira wîgiî Mûriû wake.

1Sam 2:12

Nake Eli aarî na anake ake. Anake acio maarî aganu na matiavecaga Ngai-Mûnene gîtîîo,