Nîngûtûma we na mûndûmûka mûmenane, na mbîkîre ûthû gatagatî ka mbeû yaku na ya mûndûmûka. Mbeû ya mûndûmûka îgaakûringaga kîongo nawe ûkamîrûmaga ndiira ya kûgûrû.”
Nîngûtûma ûthiî ûkamavingûre metho nîguo maume ndumarî maûke kûrî ûtheri, na maume vinyarî wa Caitani maûke kûrî Ngai. Na nîûndû wa kûmbîtîkia makovagîrwa mevia mao na makaavewa îgai vamwe na andû arîa Ngai athuurîte.’
Kwoguo, kûringana na ûvoro mwaro ûrîa mvunjagia ûguo nîguo gûkethîrwa gwîkariî mûthenya ûrîa Ngai na njîra ya Jesû Kristû agaatua ciira wa maûndû ma nthitho marîa marî ngororî cia andû.
O matiîtîkagia nîûndû meciria mao nîmaigîtwe ndumarî nî ngai wa maveeni ûrîa wathaga nthî îno. Ke nîamarigîrîrîtie matikone ûtheri ûrîa umanaga na ûvoro mwaro wa riiri wa Kristû ûrîa arî ke mûvuanîre wa Ngai.
Na mûtharavarî ûcio nîvo Kristû eetethûrire kuuma kûrî maavinya ma maaroho marîa maathamakaga na maathanaga. Ke nîwamanyûrûririe na njîra ya kûmatongoria mbere ya andû na wa vo akîonania atî aarî na ûvootani îgûrû rîa maroho na maavinya mau.
Nîûndû ciana ino nî andû marî na mwîrî na nthakame, Jesû ke mwene nîwatuîkire mûndû wata o. Aatuîkire mûndû nîguo na njîra ya gîkuû gîake, athirie vinya wonthe wa Ngoma îrîa îthagîrwa îrî na ûvoti îgûrû rîa gîkuû.
Nwatî îgûrû na nthî irîa irî kuo rîu cigîtwe na njîra ya rîathani wa rîu rîa Ngai nîguo ikaathirua na mwaki. Nacio cigîtwe nîûndû wa mûthenya ûrîa andû arîa matarî na ûngai magaatuîrwa na mathirue.
Mûndû wa wonthe wîvagia nî wa Ngoma nîûndû Ngoma îtûûraga îvagia kuuma wa Kîammbîrîria. Kîrîa gîatûmire Mûriû wa Ngai aûke, nî gûcûkangia wîra wa Ngoma.