Johana 12:32 - ÎVUKU RÎA ÛVORO MWARO

³² Rîrîa ngaavirwa îgûrû nyume gûkû nthî, nîngaagucîrîria andû onthe kûrî nie.”

Johana 12:32 ပူးပေါင်းရင်းမြစ်များ

2Sam 18:9

Wa rîmwe Abusalomu atûîte mbarathi yake nîwatûnganire na ndungata imwe cia Daudi. Mbarathi îo nîyavîtûkîrîre rungu rwa mvûa cia mûtî wa mûvuru. Kîongo Kîam Abusalomu nîkîabatîîre gatagatî ka mvûa cia mûtî ûcio. Mbarathi îrîa yamûkuîte nîyathiîre na mbere kûvinyûra nake Abusalomu agîtigwa acurîte mvûarî.

Rwîmbo rwa Nyîmbo 1:4

Mboca tûthiî nawe na îvenya, tuîka mûthamaki wakwa na ûmvire gwaku mûciî. Tûgakenaga tûrî vamwe, tûgakumagia wendo waku gûkîra ndivei. Aka onthe nîmakwendete.

Isaia 11:10

Mûthenya ûcio mûthamaki mûcerû wa rûciaro rwa Jesii akethîrwa arî kîonereria kûrî andû. Mavûrûri nîmakaathiî gwake mûciî îtûûrarî rîake rîrîa rîrî riiri.

Isaia 49:6

Ke augîte atîrî, “Tî ûndû mûvûthû gûtuîka ndungata yakwa, ûrûngamie rîngî mîvîrîga ya Jakovu, na kûrûnga andû a Isiraeli arîa maatigarire. Nwatî nîngûgûtua ûtheri kûrî andû a Ndûrîrî, nîguo andû onthe a gûkû nthî mavonoke.”

Hosea 11:4

Namatongoririe na ntha na wendo wata ûrîa mûciari ocaga wa mwana akamwiga ciande, nwata guo wananie namekire. Nie nakuamîrîrie na ngîmava gîa kûrîa.

Ndari 21:9

Kwoguo Musa nîwarûthire njoka ya gîcango na akîmîtwîthia gîtugîrî îgûrû. Mûndû wa wonthe warûmagwa nî njoka, na akîroria njoka îo ya gîcango nîwavonaga.

Johana 1:7

Ke aaûkire kûva andû ûira wa ûtheri nîguo andû onthe megue ndûmîrîri îo na mamîtîkie.

Johana 12:34

Nakîo kîrîndî nîgîacokirie atîrî, “Watho wetû ûtwîraga atî Mesaya agaatûûra tene na tene. Kûngîvoteka atîa ûtwîre atî Mûrû wa Mûndû nwa nginya ambatue? Mûrû wa Mûndû ûcio nû?”

Johana 18:32

(Ûndû ûyû wekîkire nîguo maûndû mavinge marîa Jesû aarîtie megiî mûthemba wa gîkuû kîrîa agaakua.)

Johana 19:17

Nake nîwathiîre ekuuîrîte mûtharava nginya magîkinya nja ya îtûûra rîu vandû vetagwa “Vandû va Îvîndî rîa Kîongo.” (Na Kîhibirania vetagwa “Gologotha”.)

Johana 3:14

“Wata ûrîa Musa aaûkîrîrie njoka ya gîcango arî werûrî ûguo nwa ta guo Mûrû wa Mûndû wa nake agaaûkîrîrua

Johana 6:44

Gûtirî mûndû ûngîûka kûrî nie, tiga nwanga Vava ûrîa wandûmire andeterete ke. Nanie nîngaariûkia mûndû ûcio mûthenya wa mûthiia.

Johana 8:28

Kwoguo nîwamerire atîrî, “Vîndî îrîa mûgaaûkîrîria Mûrû wa Mûndû îgûrû, nîmûkaamenya atî ‘Nînie Nie’ na atî gûtirî ûndû wana ûmwe mbîkaga nîyathîte, nwatî mbugaga tu wa ûrîa Vava ambathîte mbuge.

Agal 3:13

Nwatî Kristû nîwatuîkire kîrumi nîûndû wetû nîguo atûkûûre kuuma kûrî kîrumi kîrîa kîretagwa nî watho. Nîûndû Mandîko matheru maugîte atîrî “Mûndû wa wonthe mwambe mûtharavarî nî mûrume nî Ngai.”

1Tim 2:6

Ke nîke wevecanire nîguo akûûre andû onthe kuuma meviarî. Ûndû ûcio nîwonanirie na ma kavinda karîa kaagîrîrîte atî Ngai nîwendaga andû onthe mavonoke,

Ahib 2:9

Nwatî twonaga Jesû ûrîa gwa kavinda kanini watuirwe mûnini gûkîra araika, nîguo na njîra ya wega wa Ngai akue nîûndû wa andû onthe. Na rîu tûmwonaga ekîrîte nthûmbî îrî na riiri na gîtîîo nîûndû wa ûrîa aathînirue na agîkua.

1Pet 2:24

Kristû ke mwene nîwakuuire mevia metû mûtharavarî na njîra ya mwîrî wake. Eekire ûguo nîguo maûndûrî ma wîvia twîkare ta tûrî akuû na tûtûûrage mwoyo maûndûrî ma ûthingu. Mue rîu nîmûvonetue na njîra ya ironda ciake.

1Pet 3:18

Kristû aakwire nîûndû wa mevia ma andû onthe rita rîmwe. Aarî mûthingu na nîwakwire îthenya rîa evia, nîguo atûvire kûrî Ngai. Nîwaûragirwe kîîmwîrî, nwatî kîîroho nîwagîre na mwoyo,

1Joh 2:2

Kristû ke mwene nîke ûtûmaga twoverwe mevia metû, na twa mevie metû tu, nwatî nî wana mevia ma andû onthe.

Kûguû 5:9

Nacio ciûmbe icio na athuuri acio nîmaainire rwîmbo rûcerû makiugaga atîrî: “We ûrî mwagîrîru wa gwoca îvuku rîa gîkûnjo na ûtumûre ndumo ciarîo. Nîûndû we nîwaûragirwe, na njîra ya nthakame yaku we nîwagûrire andû a Ngai kuuma mîvîrîga yonthe, nthiomi cionthe, mavûrûri monthe na iruka cionthe.