Johana 10:27 - ÎVUKU RÎA ÛVORO MWARO

²⁷ Ng'ondu ciakwa nîithikagîrîria mûgambo wakwa; nie nînîciîcî na nîinûmagîrîra.

Johana 10:27 ပူးပေါင်းရင်းမြစ်များ

1Atha 18:21

Nake Elija nîwathiîre kûrî andû acio na akîmaûria atîrî, “Nîmwîthîrwa mûrî na mathangania na nganja nginya rî? Ethîrwa Ngai-Mûnene nî Ngai, mûgooceni; nwatî ethîrwa Baali nîke Ngai, mûgooceni!” Nwatî andû matiamwîra wanarî ûndû.

Isaia 66:22

“Wata ûrîa îgûrû rîcerû na nthî njerû irîa ngaaûmba igaatûûra na vinya wakwa, nwaguo njiarwa cienyu na rîîtwa rîenyu igaatûûra.

Mathaayo 16:24

Nake Jesû nîwacokire akîîra arutwa ake atîrî, “Mûndû wa wonthe ûngîenda kûnûmîrîra nwa nginya erege, akuue mûtharava wake na anûmîrîre.

Mathaayo 17:5

Na vîndî wa îo Petero wa akîaragia, îtu rîarî na ûtheri mwîngî nîrîaûkire rîkîmakunîkîra. Naguo mûgambo nîwaumire îtuurî rîu na ûkiuga atîrî, “Ûyû nîke Mûrû wakwa ûrîa mendete, na nie nîrîmûkenie mûno nîke, mûthikîrîrieni!”

Mathaayo 25:12

Nwatî mûvikania nîwamerire atîrî, ‘Nîramwîra nama atî nie ndimwîcî.’ ”

Mathaayo 7:23

Nanie nîngaamera atîrî, ‘Nie ndiamwîcî. Nthengutîrani mue mwîkaga maûndû macûku!’

Maariko 10:21

Nake Jesû aroria mûndû ûcio nîwegwire amwenda na akîmwîra atîrî, “Kûrî na ûndû ûmwe ûtigarîtie gwîka. Thiî wendie indo ciaku cionthe, ûve athîni mbeca icio na ûcoke ûnûmîrîre, nawe nî ûkwîigîra ûtonga mwîngî îgûrû.”

Maariko 8:34

Nake Jesû nîwacokire agîîta kîrîndî na arutwa ake varîa aarî, na akîmeera atîrî, “Mûndû wa wonthe ûngîenda kûnûmîrîra, nwa nginya erege, akuue mûtharava wake na acoke anûmîrîre.

Luka 13:27

Nake Mwathani nîakaamûcokeria rîngî atîrî, ‘Nie ndiîcî mumîte na kû. Nthengutîrani ava ndûrîka ino!’

Luka 9:23

Jesû nîwacokire akîîra andû onthe atîrî, “Mûndû wa wonthe ûngîenda kûnûmîrîra, mbere nî ambe erege ke mwene na akuuage mûtharava wake wa mûthenya na acoke anûmîrîre.

Johana 10:14

Nie nînie mûrîthi ûrîa mwaro. Nîmbîcî ng'ondu ciakwa nacio ng'ondu ciakwa nîimbîcî,

Johana 10:16

Na nîrî na ng'ondu ciîngî ciakwa itarî rwagarî rûrû, na nwa nginya wa nacio nîirete. Nacio nîikûthikîrîria mûgambo wakwa, na cionthe vamwe ituîke cia ndîthia îmwe na igîe na mûrîthi ûmwe.

Johana 10:8

Arîa onthe maaûkire mbere yakwa nî aîi na acunani, nwatî ng'ondu itiamathikîrîria.

Johana 12:26

Mûndû wa wonthe ûndungatagîra nwa nginya anûmîrîre nîguo varîa nîrî ndungata yakwa îthagîrwe nîvo îrî wa nayo. Nake Vava agaatîîaga mûndû wa wonthe ûrîa ûndungatagîra.

Johana 21:22

Jesû nîwamûcokerie atîrî, “Wana ngenda ekare nginya rîrîa ngaaûka-î, îo nî thîna yaku? We ta nûmîrîra!”

Johana 5:25

Nie nîramwîra na ma atî îvinda nîrîkuvîvîriu na nîrîrîkîtie gûkinya. Îvinda rîîrî nîrîo akuû makeegua mûgambo wa Mûriû wa Ngai, na arîa makaawîgua nîmakaagîa na mwoyo.

Johana 8:12

Jesû nîwarîrie Afarisai rîngî akîmeera atîrî, “Nie nînie ûtheri wa nthî. Mûndû wa wonthe ûnûmagîrîra nîakûgîa na ûtheri wa mwoyo na ndakaathiîcagîrîra ndumarî.”

Johana 8:43

Mûrarega gûtaûkîrwa nî ûrîa nîrauga nîkî? Mûrarega gûtaûkîrwa nîûndû mûtirenda kûthikîrîria ndûmîrîri yakwa.

Ciîko 3:23

Mûndû wa wonthe ûtakaathîkîra mûrathi ûcio nîakaathengutua kûrî andû a Ngai na athirue.’

1Akor 8:3

Nwatî Ngai nîwîcî mûndû wa wonthe ûmwendete.

Agal 4:9

Nwatî rîu nîûndû nîmûmenyanîte na Ngai, kana mbuge Ngai nîamenyanîte na mue, nîkî kîratûma mûcokerere maroho marîa matarî vinya na matarî vata? Mûrenda gûtuîka ngombo cia maroho mau rîngî nîkî?

2Tim 2:19

Nwatî mûcingi ûrîa Ngai atumîte ndûngîenyenyeka; na îgûrû rîaguo kwandîkîtwe atîrî, “Mwathani nîwîcî andû ake na mûndû wa wonthe umbûraga Mwathani nwanginya atige gwîka maûndû ma waganu.”

Ahib 3:7

Kwoguo wata ûrîa Roho Mûtheru augîte atîrî, “Ûmûnthî mûngîgua mûgambo wa Ngai,

Kûguû 14:4

Andû acio nî arîa mataanamenyana kîîmwîrî na aka; o nî athingu. Marûmagîrîra Gatûrûme kûrîa kuonthe akûthiî. Ngai nî amakûûrîte kuuma kûrî andû acio engî, na nîmaatuîkîte maciaro ma mbere kûvecanwa kûrî Ngai na kûrî Gatûrûme.

Kûguû 3:20

Ta roriani! Nie nûngamîte mûrangorî ngîringaringa mûndû wa wonthe ûkwîgua mûgambo wakwa na amvingûrîre mûrango, nie nîngûtonya na ndîcanîre nake, nake arîcanîre nanie.