Jeremia 9:13 - ÎVUKU RÎA ÛVORO MWARO

¹³ Ngai-Mûnene nîwacokirie atîrî, “Maûndû mama mekîkîte nîûndû andû akwa nîmatiganîrîtie watho ûrîa namaveere na makîrega kwathîkîra mûgambo wakwa kana meka ûrîa namathire.

Jeremia 9:13 ပူးပေါင်းရင်းမြစ်များ

2Maû 7:19

Nwatî mûngîkaagarûrûka na mûtige kwathîkîra kîrîra na maathani marîa nîmûvete, na mwambîrîrie kûgooca na gûtungatîra ngai ciîngî,

Ezira 9:10

“Ngai wetû, rîu nîtuga atîa vuva wa gûtwîkîra maûndû mau monthe? Nîtûregete rîngî kwathîkîra maathani maku,

Thaburi 119:53

Nînyitagwa nî marakara meengî, rîrîa ngwona andû arîa aganu makiuna watho waku.

Nthi 28:4

Andû arîa mareganaga na watho makumagia andû arîa aganu, nwatî arîa mathîkagîra watho nîmareganaga na andû arîa aganu.

Jeremia 13:10

Andû aya aganu nîmaregete kûmbathîkîra. Nî aremi na nî aûmû ngoro. Matungatagîra na makagooca ngai ng'eni. Kwoguo matuîkîte ta thuruvarî îno ndembûkangu na îtangîtûmîrwa, nî ya mana.

Jeremia 22:9

Nao nîmagacokia atî, ‘Ekire ûguo nîûndû nîmaatiganîrie kîrîkanîro Kîam Ngai-Mûnene Ngai wao na mûkîambîrîria kûgooca Ngai ciîngî na gûitungatîra.’ ”

Jeremia 5:19

Nao andû enyu mangîkaûria gîtûmi Kîam mbîke maûndû mama monthe, we Jeremia ûkaamera atî, ‘wata ûrîa mwareganire nanie na mûkîgooca ngai ng'eni irîa ciarî vûrûrirî wenyu, nwata guo mûgatungatîra ageni mûrî vûrûrirî ûrîa ûtarî wenyu.’ ”

Jeremia 7:26

Nwatî mûtianthikîrîria kana mûmbîgua, nwatî nîmwaûmirie ciongo, na mûgîtuîka aregi gûkîra methe menyu.