Jeremia 49:17 - ÎVUKU RÎA ÛVORO MWARO

¹⁷ “Edomu îkeguithagia andû guoya, na mûndû ûrîa ûkavîtûkagîrîra vakuvî naguo akaauga ûûi, nîkûmaka ona ûrîa kwanangîtwe.

Jeremia 49:17 ပူးပေါင်းရင်းမြစ်များ

1Atha 9:8

Wana ethîrwa nyomba îno îrî na ngumo ûguo, nîîkomomorwa, na mûndû wa wonthe ûkaavîtûkîrîra vo nîakaamaka na aciive akîûragia atîrî, ‘Ngai-Mûnene eekire vûrûri ûyû vamwe na hekarû îno ûguo nîkî?’

Jeremia 18:16

Nîmatûmîte vûrûri wao ûtuîka kîndû gîa kûmakania, ûtuîke kîndû gîa kûnyararwa tene na tene. Andû onthe arîa mavîtûkagîrîra vakuvî naguo, mamakaga makainainia ciongo ciao.

Jeremia 49:13

Nie mwene nînîvîtîte nama atî, îtûûra rîa Bozira nîrîtuîka kûndû gwa kwîguithia andû guoya, na gwa kûnyararwa, werû na kûrume; na matûûra ma kuo monthe nîmatûûra marî macûkangie viû. Nie Ngai-Mûnene nînie nauga ûguo.”

Jeremia 50:13

Nîûndû wa ûrîa nie Ngai-Mûnene ndakarîte, gûtirî mûndû wanarî ûmwe ûgatûûraga Babuloni; îtûûra rîu nîrîcûkangua viû. Arîa onthe makavîtûkagîra vakuvî narîo nîmakaamaka, makamaka makiugaga, we! we! we! Nî ûrîa rîcûngangîtue.

Jeremia 51:37

Vûrûri wa Babuloni nîûtuîka maganjo; ûgaatuîka kûndû gwa gûtûûrwa nî mbwe, nîgûtuîka kîmako na kûndû gwa kûnyararûa, kûndû gûtatûûragwa nî andû.

Ezek 25:13

kwoguo nie Ngai-Mûnene Ngai mbugîte atî nîngaatambûrûkia njara yakwa îgûrû rîa vûrûri wa Edomu na mbûrage andû onthe na nyamû cionthe. Nîngaatûma wanangîke kuuma îtûûrarî rîa Temani nginya îtûûrarî rîa Dedani. Andû onthe nîmakaaûragîrwa mbaararî.

Ezek 27:36

Andû a mavûrûri arîa magûraga na makendia indo nîmagaakûnyarara nîûndû ûkethîrwa ûkinyîtie mûthiia na ndûgaacoka kwonekana rîngî tene na tene.”

Ezek 35:15

wata ûrîa we wakenire rîrîa vûrûri wa Isiraeli wanangirwe. Kwoguo ûguo nîguo ngaagwîka. Kîrîma gîa Seiru nîgîgaatuîka werû, wana vûrûri wonthe wa Edomu. Nao nîmakaamenya atî, nie nînie Ngai-Mûnene.”

Ezek 35:3

ûkîîre nie Mwathani Ngai-Mûnene mbugîte atî: Nîndeganîte nawe we kîrîma gîa Seiru. Nîngatambûrûkia njara yakwa ndûe nawe, na nîngaatûma gîtuîke werû.

Ezek 35:7

Nîngatûma kîrîma gîa Seiru gîtuîke îganjo na werû, na mûndû wa wonthe ûkaathiîrîra kuo nîngaamûraga.

Mika 6:16

Nîmûrûmîrîrîte mîtugo mîcûku ya mûthamaki Omuri na maûndû monthe marîa meekagwa nî andû a mûciî wa Ahabu, na mûkarûmîrîra ûtaari wao. Kwoguo nîngaamûretithîria mûthiro na mûnyararwe nî andû onthe. Andû a kûndû kuonthe makaamwonaga makamûciva.

Zefania 2:15

Ûguo nîguo gûgekîka kûrî îtûûra rînene rîrîa rîîtîaga nîûndû wa vinya warîo na rîgeciria atî nîrîgitîre. Îtûûra rîu rîciragia atî nîrîo rînene mûno nthî îno. Rîgaatuîka îganjo, varîa nyamû cia kîthaka ikaavurûkaga! Mûndû wa wonthe ûkaavîtûkîrîra vo nîakaavavûka na etigîre.

Gûco 29:22

“Njiarwa cienyu irîa igaaûka vuva wenyu, na ageni arîa makaauma mavûrûri ma kûraca nîmakoona na mamenye mînyamaaro na mathîna marîa Ngai-Mûnene aareteere vûrûri wenyu.