Jeremia 30:19 - ÎVUKU RÎA ÛVORO MWARO

¹⁹ Atûûri a Jerusalemu nîmakaaina nyîmbo cia kûgooca, nîmakaugîrîria nî gûkena, nîngatûma mongerereke na matikanyiva; nîngatûma matîwe na matikairwa.

Jeremia 30:19 ပူးပေါင်းရင်းမြစ်များ

Ezira 6:22

Nîmaakûngûîre kîrugo Kîam mîgate îtaarî mîkîre ndawa ya kwimbia vandû va mîthenya mûgwanja marî na gîkeno. Maakenete nîûndû Ngai-Mûnene nîwatûmîte mûthamaki wa Asîria agîe na wendo nîguo amatethie gûtuma rîngî hekarû ya Ngai wa Isiraeli.

Nehemia 8:12

Kwoguo andû onthe nîmeenûkire mîciî kwao na nîmaarîre na makînyua marî na gîkeno. Nîmaacokire makîgaîra andû arîa mataarî na kîndû nîûndû nîmaataûkîrwe nî ciugo irîa maathomerwe.

Nehemia 8:17

Andû onthe arîa maaûkîte kuuma îthamîriorî nîmaatumire tûnyomba magîtûûra kuo. Kuuma vîndî ya Joshua mûvîcî wa Nuni nginya mûthenya ûcio andû a Isiraeli matiagîte na kîrugo gîa tûnyomba. Andû a Isiraeli nîmaagîre na gîkeno kînene mûno.

Thaburi 53:6

Naarî kethîrwa ûvonokio wa andû a Isiraeli ûkaauma Zayuni, rîrîa Ngai agaatûma andû a Isiraeli magacîre. Njiarwa cia Jakovu nîigaakena, andû a Isiraeli nîmagaakûngûîra.

Isaia 12:1

Mûthenya nîûgaakinya rîrîa mûkaaina atîrî, “Nîngagûcokeria ngatho we Ngai-Mûnene, nîûndû warî mûrakaru nîtue, nwatî rîu marakara maku nî mathiru, na nîûtûmîrîrîtie.

Isaia 26:15

Nwatî we Ngai-Mûnene nîûtûmîte rûrîrî rwetû rûkûre, nîwaramîtie mîvaka yonthe ya vûrûri wetû, kwoguo we nîûtîîtwe.

Isaia 27:6

Vîndî nîgaakinya rîrîa njiarwa cia Jakovu ikaagîa na mîri, Isiraeli nîkaamera na îtheûke, na matunda mayo nîmagecûra nthî yonthe.

Isaia 35:10

Arîa maakûûrirwe nî Ngai-Mûnene nîmagaacoka, magaaûka Zayuni magîkûngûagîra, makethîrwa marî na gîkeno gîa tene na tene. Nîmakethîrwa marî na gîkeno na marî acanjamûku, kîeva na kîrîro nîikaathira viû.

Isaia 51:11

Andû arîa aku wakûûrire we Ngai-Mûnene nîmagaacoka, magaakinya Zayuni makinaga, magecûrwa nî gîkeno gîa tene na tene. Nîmakaagîa na gîkeno na macanjamûke, kîeva na kîmako nîikaathira viû.

Isaia 51:3

“Nîûndû nie Ngai-Mûnene nîngavoreria îtûûra rîa Zayuni, na ndûthe kûndû gwakuo kuonthe kûrîa gûcûkangu. Nîngaatua werû wa kuo ta mûgûnda wa Edeni, werû wa kuo nîûtue ta mûgûnda wa Ngai-Mûnene; kûu nîgûkethîrwa na gîkeno na gûcanjamûka, na nyîmbo cia gûcokia ngatho nîikeguîka kuo.

Isaia 52:9

Mue kûndû kûrîa gûcûkangu kwa Jerusalemu, ambîrîriani kwina vamwe mûkenete. Nîûndû Ngai-Mûnene nîavoreretie andû ake, nîakûûrîte Jerusalemu.

Isaia 55:5

Nama nîmûgeta ndûrîrî irîa mûtaicî, na andû a ndûrîrî irîa itagwîcî nîmagaaûka kûrî we mavinyûrîte! Nie Ngai-Mûnene Ngai wenyu Ûrîa Mûtheru wa Isiraeli, nînie ndûmîte maûndû mau monthe mekîke, nînie ndûmîte ûvewe riiri.”

Isaia 60:19

“Riûa rîtigacoka rîngî gûkûmûrîkîra mûthenya, wana kana mweri ûcoka gûkûmûrîkîra mathaa ma ûtukû, nwatî nie Ngai-Mûnene nînie ngaatuîka ûtheri waku wa tene na tene, naguo riiri wakwa ûkûmûrîkagîre.

Isaia 60:22

Ûrîa mûnini gatagatîrî kenyu nîagaakûra atuîke mûvîrîga, nake ûrîa ûtarî na vinya atuîke rûrîrî rwî na vinya. Vîndî îrîa mbagîrîru yakinya nîngeka ûguo na îvenya. Nie nînie Ngai-Mûnene!”

Isaia 60:9

Nî meri ciumîte mavûrûrirî ma kûraca, itongoreretue nî meri cia Tarishishi. Iretete andû aku kuuma kûndû kûraca, marî na sîlûva na thaavu ciao, nîûndû wa rîîtwa rîa Ngai-Mûnene Ngai wenyu, na nîûndû wa Ûrîa Mûtheru wa Isiraeli, nîûndû nîatûmîte mûgîe riiri.

Jeremia 17:26

Nao andû nîmakauma îtûûrarî rîa Juda na matûûra marîa mathiûrûrûkîrîtie Jerusalemu kuuma îtûûrarî rîa Benjamini, Shefela, kuuma vûrûri ûrîa ûrî irîma na kuuma Negebu, na nîmakaaruta matega ma kûvîvua, na magongoona, na matega ma irio cia mûgûnda na ûbani mûnungi waro, vamwe na matega ma gûcokia ngatho. Makarete indo ino cionthe hekarûrî ya Ngai-Mûnene.

Jeremia 3:16

Vîndî îrîa mûkethîrwa mwongererekete na mûkengîva vûrûrirî, andû matigekaraga matakûgweta îthandûkû rîakwa rîa kîrîkanîro. Andû matikagweta, kana marîririkana rîngî, matikarîvatara kana marûtha rîngî.

Jeremia 31:27

Ngai-Mûnene arauga atîrî, “Îvinda nîrîgakinya rîrîa ngecûria vûrûri wa Isiraeli na wa Juda andû na nyamû.

Jeremia 31:4

Nîngamûvanda rîngî, na nîmûgekindîria mue andû akwa a Isiraeli! Nîmûgooca rîngî indo cienyu cia kwina mwîinie na gîkeno mûcanjamûkîte.

Jeremia 33:22

Wata ûrîa njata cia îgûrû na mûthanga ûrîa ûrî ndeererî cia îria ûtangîtarîka, nwa ta guo ngaatûma njiarwa cia Daudi na athînjîri-Ngai a mûvîrîga wa Lawi arîa mandungatagîra mongerereke.”

Ezek 36:37

Mwathani Ngai-Mûnene arauga atîrî, “Nîngetîkîria andû a Isiraeli mamvoe nîmatethie na nîngaatûma andû ao mongerereke ta ndîthia ya ng'ondu.

Ezek 37:10

Kwoguo nînaarathire wata ûrîa aambathire. Mîvevû nîyaûkire kûrî mîîrî îo na îkîgîa na mwoyo na makîrûngama na magûrû andû gîkundi kînene mûno.

Ezek 37:26

Nîngaathondeka kîrîkanîro Kîam thayû nao na gîkethîrwa kîrî gîa gûtûûra tene na tene. Nîngaamarathima na ndûme mongerereke, na nîngaatuma hekarû yakwa vûrûrirî wao îtûûrage kuo tene na tene.

Zakaria 10:8

Nîngaameta na nîmagaacokanîrîra vamwe, nîûndû nînîmakûrîte, na nîmakoongerereka na mengîve ta ûrîa meekariî mbererî.

Zakaria 12:8

Vîndî îo Ngai-Mûnene nîakaagitîra andû arîa matûûraga Jerusalemu, nîguo andû arîa matarî vinya gatagatîrî kao makaagîa na vinya ta mûthamaki Daudi. Nacio njiarwa cia Daudi nîigaatongoria andû a Juda ta araika a Ngai-Mûnene, ta arî Ngai ûramatongoria.

Zakaria 2:4

na akîmwîra atîrî, “Vinyûra ûthiî wîre mwanake ûrîa ûrî na rûrigi rwa kûthima atî ‘Îtûûra rîa Jerusalemu nîrîtuîka îtûûra rîtarî ririgîre na rûthingo nîûndû rîkethagîrwa na andû eengî mûno na nyamû nyîngî mûno cia kûrîthua.

Zakaria 8:19

“Kwînyerekia mweri wa kana, mweri wa gatano, mweri wa mûgwanja, wa mweri wa îkûmi igaatuîka irugo cia gîkeno na thayû kûrî andû a Juda. Kwoguo rûmagîrîrani ûvoro wa ma na wa thayû.”

Johana 17:22

Nie nîmavete riiri wata ûrîa we wamvere nîguo matuîke kîndû kîmwe wata ûrîa we nanie tûrî kîndû kîmwe.

1Pet 1:7

Mworoto wa magerio mama monthe nî kwonania atî wîtîkio wenyu nî wa ma. Wana nginya thaavu îgeragua na mwaki nîguo yonekane kana nî mbaro. Kwoguo wîtîkio wenyu ûrîa wî vata gûkîra thaavu, nwanginya ûgerue nîguo wonekane kana nî wa ma. Namue nîmûgaacoka kûgîa na ûkumio, riiri na gîtîîo vîndî îrîa Jesû Kristû akaaguûrua.