Jeremia 23:6 - ÎVUKU RÎA ÛVORO MWARO

⁶ Îvindarî rîake andû a Juda nîmakavonokua, nao andû a Isiraeli matûûre marî na thayû. Agetagwa, ‘Ngai-Mûnene nîke ûthingu wetû.’

Jeremia 23:6 ပူးပေါင်းရင်းမြစ်များ

1Atha 4:25

Vîndî îrîa yonthe Solomoni aarî mwoyo, andû a Juda na a Isiraeli kuuma Dani kûthiî nginya Beerisheba maatûûraga na thayû, wa mûndû arî na mîthavibu na mîkûyû yake.

Thaburi 45:5

Mîguî yaku nî mîûgî, nîîtonyaga ngoro cia nthû ciaku; nacio ndûrîrî nîigûcaga rungu rwa magûrû maku.

Ntha 9:26

Gosheni gîcunjî kîrîa andû a Isiraeli maatûûraga nwakuo gûtaaura mbura îo ya mbembe.

Isaia 2:4

Ngai nîagaatuithania ciira gatagatî ka mavûrûri, na nîakeguîthania ndûrîrî nyîngî; magaatura mviû ciao cia njûra ituîke macembe ma mîraû, namo matumû mao matuîke tûviû twa gûcaa. Vûrûri ndûkaarûa na vûrûri ûrîa wîngî, kana merute kûrûa rîngî.

Isaia 32:1

Nîgûkaagîa na mûthamaki ûkaathanaga na ûthingu, na anene mathanage na kîvooto.

Isaia 32:18

Andû akwa magaatûûraga kûndû kûrî na thayû, kûndû kûgitîre na kûndû gûtarî na thîna.

Isaia 33:22

Nîûndû Ngai-Mûnene nîke mûtucanîri ciira wetû, Ngai-Mûnene nîke ûtwathaga, Ngai-Mûnene nîke mûthamaki wetû, na nîke ûgaatûvonokia.

Isaia 33:5

Ngai-Mûnene nî mûnene, ke atûûraga îgûrû; nîagecûria Zayuni na kîvooto na ûthingu.

Isaia 35:9

Gûtirî mînyambû îkethîrwa njîrarî îo, kana nyamû wa yonthe mbaganu îvîtûkîrîra varavararî îo. Nyamû icio itikooneka varavararî îo, nwatî andû arîa akûre nîo makaavîtûkîrîra kuo.

Isaia 42:6

Nînie Ngai-Mûnene ngwîtîte wîke maûndû na kîvooto, nîngûnyitîte njara na ngakûgitîra. Na njîra yaku nîndûthîte kîrîkanîro na andû onthe, we ûgaatuîka ûtheri wa mavûrûri.

Isaia 45:17

Nwatî vûrûri wa Isiraeli nîûkaavonokua nî Ngai-Mûnene, na ûvonokio wao ûgaatûûra tene na tene. Andû a kuo matigaaconorithua tene na tene.

Isaia 54:17

Gûtirî indo cia mbaara irîa irûthîtwe cia gûgûcûkangia ikaavota gwîka guo. Mûndû ûrîa ûgaakûthitanga îgootirî nîûkaamûvoota. Rîîrî nîrîo îgai rîa ndungata cia Ngai-Mûnene, na rîu nîrîo îtua rîakwa kûrî o.” Nie Ngai-Mûnene nînie nauga ûguo.

Isaia 7:14

Kwoguo Mwathani ke mwene nîakûmûva rûûri: mwîrîtu nîakaagîa îvu, aciare kaana na agatuîrîre rîîtwa, ‘Imanueli.’

Isaia 9:6

Nîûndû nîtûciarîrîtwe kaana. Nîtûvetwe kaana ga kavîcî. Na nîkavetwe vinya wa kwathana. Gageetwa, “Mûtaarani wa Magegania, Ngai mwene vinya wonthe, Vava wa Tene na tene, Mûthamaki wa Thayû.”

Jeremia 29:11

Nîûndû, nie Ngai-Mûnene nîmbîcî mîvango îrîa nîrî nayo kûrî mue, mîvango ya maûndû maro na tî maûndû macûku nîguo mûtûûrîre wenyu wa vîndî îrîa îgaûka wîthîrwe ûrî na kîîrîgîrîro.

Jeremia 30:10

“Nie Ngai-Mûnene nîramwîra mue ndungata ciakwa andû a Jakovu mûtigetigîre, kana mue andû a Isiraeli mûgwatwa nî guoya; nîûndû nîngamûvonokia kuuma vûrûrirî wa kûraca, na njiarwa ciaku nîirute vûrûri ûrîa ithamîrîtue. Nîmûgaacoka na mûtûûre na thayû, na gûtirî mûndû ûgatûma mûgîa na guoya.

Jeremia 31:23

Ngai-Mûnene mwene vinya wonthe Ngai wa Isiraeli arauga atîrî, “Rîrîa ngaacokia andû a Isiraeli vûrûrirî wao, marî vûrûrirî wa Juda na matûûrarî maguo, nîmakaauga atî: ‘Ngai-Mûnene akûrathime we kîrîma kîthingu Kîam Jerusalemu, akûrathime we kîrîma kîtheru!’

Jeremia 32:37

nîngaûngania andû onthe kuuma mavûrûrirî monthe kûrîa namanyaganirie nîûndû wa marakara na mang'ûrîka makwa. Nîngamacokia gûkû na ndûme matûûre kuo marî agitîre.

Jeremia 33:15

Mîthenya îo na îvinda rîu, nîngatûma kûgîe na mûndû mûthingu kuuma rûciaro rwa Daudi atuîke mûthamaki; nake nîakaathana na ûûma na kîvooto gûkû nthî.

Jeremia 33:16

Îvindarî rîu Juda nîîkavonokua na îtûûra rîa Jerusalemu rîgîe na thayû. Îtûûra rîu rîgetagwa, ‘Ngai-Mûnene nîke ûthingu wetû.’

Ezek 21:27

Nîngûcûkangia îtûûra rîu viû na rîtigacoka kwonwa rîngî. Nwatî ndigwîka ûguo nginya agaûka ûrîa mwagîrîru nîrînenganîre kûrî ke.

Ezek 28:26

Nîmagaatûûra kuo marî agitîre. Nîmagaatuma nyomba kuo na mavande mîtî ya mîthavibu. Magaatûûra marî agitîre nîûndû nîngaaverithia mavûrûri marîa mariganîtie nao marîa maamavinyagîrîria. Na nîmakaamenya atî nie nînie Ngai-Mûnene Ngai wao.”

Ezek 38:14

“Kwoguo, we mûndû rathîra Gogu ûvoro na ûmwîre Mwathani Ngai-Mûnene augîte: Rîrîa andû akwa a Isiraeli makethîrwa mekarîte marî na thayû nîrîo ûkaathiî

Ezek 48:35

Ûraca wa rûthingo rwa îtûûra rîu mîena yonthe îna rûkethîrwa rûrî rwa mita ngiri kenda (9,000). Îtûûra rîu kuuma vîndî îo rîgetagwa, “Ngai-Mûnene arî ava.”

Danieli 9:24

“ ‘Mîaka mûgwanja maita mîrongo mûgwanja, nî îvinda rîrîa Ngai amûrîte rîa kûthiria waganu, mevia; kwovera andû arîa mekîte maûndû macûku, kûrete thayû wa tene na tene, gwîtîkîra cioneki na ûrathi, na kûvaka vandû varîa vatheru Mûno maguta.

Danieli 9:7

We, Mwathani, wîthagîrwa ûrî mûthingu vîndî cionthe. Nwatî tue, tûtûûraga tûrî na gîconoko, wana andû onthe arîa matûûraga Judea na Jerusalemu, na andû onthe a Isiraeli arîa marî mavûrûrirî marîa marî vakuvî na marî kûraca, nîûndû matiarî evokeku kûrî we.

Hosea 1:11

Andû a Juda na Isiraeli nîmakaagomana vamwe na nîmakathuura mûtongoria wao ûmwe; nao nîmakoongereka kûu vûrûrirî wao. Mûthenya ûcio ûkethîrwa ûrî mûnene kûrî Jezireeli.

Hosea 1:7

Nwatî nîngeguîra andû a Juda ntha na nîmavonokie. Nie Ngai-Mûnene Ngai wao nîngamavonokia, nwatî tî na vinya wa athigari a mbaara, kana rûviû rwa njûra kana mbaara, kana mbarathi, kana arîa mekaragîra mbarathi.”

Hosea 2:18

Nîngarûtha kîrîkanîro na nyamû cia kîthaka, iconi cia rîerarî, vamwe na tûgunyû tûrîa tûkurumaga, na nîngathengutia ûta, rûviû, na indo cia mbaara vûrûrirî, na ndûme ûtûûre ûrî mûgitîre.

Obadia 1:17

“Nwatî kîrîmarî gîa Zayuni nîgûkethîrwa arîa makaavonokua, gûkethîrwa kûrî kûndû kûtheru. Andû a Jakovu nîmakegwatîra vûrûri ûrîa maacunîtwe ûtuîke wao kîûmbe.

Obadia 1:21

Andû arîa magaatigara marî mwoyo nîmakaathiî kîrîmarî gîa Zayuni, nao nîmakaathaga kîrîma gîa Esaû, Nake Ngai-Mûnene nîke ûgaatuîka mûthamaki.”

Zefania 3:13

Andû arîa matigîtwe kûu Isiraeli matigeka naaî, matikaria maveeni, kana mageria kûveenania. Makaagîcaga gîa kûrîa na marî na ûgitîri, na matagwîtigîra wanarî kîndû.”

Zakaria 10:6

Nîngaatûma nyomba ya Juda îgîe vinya, na nîngaavonokia nyomba ya Josefu. Nîngaamacokia kwao nîûndû nînîmegucagîra ntha, na nîmagekara ta andû ndanatiganîria, nîûndû nî nie Ngai-Mûnene, Ngai wao, na nîngegua mavoya mao.

Zakaria 3:10

Mûthenya ûcio wakinya, wa mûndû wa mûndû nîagetaga mûndû ûrîa mariganîtie nake athiî magekare rungu rwa mîthavibu na rungu rwa mîkûyû makenere thayû na ûgacîru wa vûrûri. Ûgo nîguo Ngai-Mûnene mwene vinya wonthe arauga.”

Aroma 3:22

Ngai atucaga andû onthe athingu na njîra ya gwîtîkia Jesû Kristû. Ngai ekaga ûguo kwî andû onthe arîa metîkîtie nîûndû ndathuurûkanagia.

1Akor 1:30

Nwatî Ngai nîke kiumo Kîam ûûrûmwe wenyu na Jesû Kristû. Na njîra ya Kristû Ngai nîatûvecaga ûûgî na agatûtua athingu. Natue nîtûtuîkaga andû a Ngai na tûgakûrwa kuuma meviarî metû.

2Akor 5:21

Kristû ndaarî na mevia, nwatî nîûndû wetû Ngai nîwatûmire atuîke wa kûgaa mevia metû nîguo atî tûrî kîndû kîmwe nake tûkaavota kûgaa ûthingu wa Ngai.

Afil 3:9

tûtuîke kîndû kîmwe nake viû. Rîu ndiîthagîrwa nîrî na ûthingu wakwa nie mwene ûrîa umanaga na watho. Nîrî na ûthingu wa Ngai, ûrîa ûvecanagwa nîûndû wa gwîtîkia Jesû Kristû. Ûthingu ûcio uumaga kûrî Ngai na njîra ya wîtîkio.