Jeremia 23:25 - ÎVUKU RÎA ÛVORO MWARO

²⁵ Nîmbîguîte maûndû ma maveeni marîa arathi arîa maaragia maveeni marîtie mambîgiî na njîra ya rîîtwa rîakwa makiugaga atî, ‘Nîrîmûrotu! Nîrîmûrotu!’

Jeremia 23:25 ပူးပေါင်းရင်းမြစ်များ

Kîam 37:5

Vîndî îmwe Josefu nîwarotire, na rîrîa eerire aa mûrwang'ina ûvoro wa kîroto kîu, nîmaamûmenire mûno makîria.

Kîam 37:9

Josefu nîwarotire rîngî na akîra aa mûrwang'ina atîrî, “Nînîrarotire kîroto kîngî, na nona riûa, mweri na njata îkûmi na îmwe ciînamîrîrîte mbere yakwa.”

Thaburi 139:2

Nîûmenyaga rîrîa ngwîkara nthî na rîrîa ngûkîra, nîûmenyaga meciria makwa ûrî kûraca.

Thaburi 139:4

Wana mbere ya mbuga ûndû, we Ngai-Mûnene wîthagîrwa wîcî ûrîa nguga.

Jeremia 13:27

Nîmonete ûgîka maûndû marîa menete, ûtharia na gûcumîkîra aka ene na ûmaraa mwîngî, kûu tûrîmarî na mîgûndarî. Mue andû a Jerusalemu kaî mwî na thîna-î! Nîmwîkara mûtatheretue nginya rî?”

Jeremia 14:14

Nake Ngai-Mûnene nîwanjokerie atîrî, “Arathi maratûmîra rîîtwa rîakwa kwaria maveeni; nie ndianamatûma kana nîmatha, wana kana mbaria nao. Maramûrathîra cioneki cia maveeni, woni ûtarî na vata na maûndû marîa mecirîtie o ene.

Jeremia 16:17

Nie nîmonaga maûndû monthe marîa mekaga; gûtirî ûndû mangînthitha. Nîmonaga mevia mao monthe.

Jeremia 23:28

Mûrathi ûrîa ûrotete nîavecane ûvoro wa kîroto gîake, nwatî mûrathi ûrîa ûrî na ndûmîrîri yakwa nîamîvecane na wîvokeku. Nie Ngai-Mûnene nîrauga atîrî, ‘Ngano tî ûndû ûmwe na rûûa.’

Jeremia 23:32

Tanthikîrîria! Nie Ngai-Mûnene nîrauga atî, nîndeganîte na arathi arîa marotaga iroto cia maveeni. Na njîra ya iroto ciao na mîario ya maveeni, nîmatûmîte andû akwa mauma njîrarî ya ma. Nie ndianamatûma, kana nîmera mathiî, kwoguo matirî na ûtethio kûrî andû akwa.”

Jeremia 27:10

Methagîrwa makîmûveenia na nîmagaatûma mûthamue mûvirwe kûraca na vûrûri wenyu. Nie Ngai-Mûnene nîngamwîngata na nîmûgaacûkangua.

Jeremia 27:15

Ngai-Mûnene augîte: tî nie ndûmîte arathi acio, nwatî maramûrathîra maûndû ma maveeni magîtûmagîra rîîtwa rîakwa. Nîngûmwîngata mûthiî mûkaûragwe, mue vamwe na arathi acio maramwîra maûndû ma maveeni.”

Jeremia 29:23

Ngameka ûguo nîûndû nîmekire ûndû wa nthoni vûrûrirî wa Isiraeli. Nîmaatharirie na aka a andû arîa maariganîtie nao, na nîmaririe maveeni makîgwetaga rîîtwa rîakwa, na ndiamathîte meke guo. Nie mwene nîmbicî na nîrî mûira wa maûndû mau. Ûguo nîguo nie Ngai-Mûnene nîrauga.”

Jeremia 29:8

Nîûndû Ngai-Mûnene mwene vinya wonthe, Ngai wa Isiraeli arauga atî mûtigetîkîre kûveenua nî arathi na aragûri arîa marî gatagatîrî kenyu na mûtikathikîrîrie iroto ciao.

Jeremia 8:6

Mbîthîrîtwe nthikîrîrîtie waro, nwatî matiaragia ûvoro wa ma. Gûtirî mûndû wanarî ûmwe wîriraga nîûndû wa waganu wake; na eyûrie atî, ‘Mbîkîte atîa?’ Wa mûndû athiîcaga njîra yake ke mwene, ta mbarathi îvinyûrîte mbaararî.

Maca 2:14

Arathi enyu nîmoonete cioneki cia maveeni, nîmakunîkîrîte mavîtia maku nîguo mavote gûkûrûnga, nwatî cioneki ciao ciarî cia maveeni.

Ezek 22:28

Arathi ao nîmatenderetie ngoro ciao ta ûrîa mûndû avakaga rûthingo cokaa. Monaga cioneki cia maveeni, na makaratha maûndû ma maveeni makiugaga atî nî Ngai-Mûnene warîtie wa rîrîa atarîtie.

Joeli 2:28

“Vuvarî, nîngetîrîria andû onthe Roho wakwa, andû enyu, anake na erîtu nîmakaanîrîra, andû enyu arîa akûrû nîmakaarota iroto, nao anake enyu nîmakoona cioneki.

Zakaria 13:3

Kûngîkaaumîra rîngî mûndû ûkaaratha maûndû, îthe na ng'ina arîa maamûciarire nîmakaamwîra atî, ‘We nîûgûkua nîûndû nîwarîtie maveeni rîîtwarî rîa Ngai-Mûnene.’ Angîkaaratha maûndû, îthe na ng'ina nîmakaamûmunda na kaviû mamûrage.

Ndari 12:6

Ngai-Mûnene, nîwamerire atîrî, “Tanthikîrîriani! Rîrîa kûrî na arathi gatagatîrî kenyu, nie nîîmenyithanagia kûrî o na njîra ya cioneki na ngamarîria na njîra ya iroto.

Mathaayo 1:20

Na rîrîa Josefu eeciragia îgûrû rîa maûndû mau, mûraika wa Mwathani nîwamumîrîre kîrotorî na akîmwîra atîrî, “Josefu, we ûrîa wî wa mbarî ya Mûthamaki Daudi, ndûgetigîre kûvikia Mariamu, nîûndû îvu rîu arî narîo riumanîte na vinya wa Roho Mûtheru.

Luka 12:3

Kwoguo, ûndû wa wonthe mwanarîria ndumarî andû nîmakaawîgua ûtherirî, na ûndû wa wonthe mwanavevanîrîra mwîthithîte nyomba ndarî, nî ûkaanîrîrwa nî mûndû arûngamîte nyomba îgûrû.

1Akor 4:5

Kwoguo mue mûtiagîrîrwe nî gûtuîra mûndû wana ûmwe kavinda karîa kagîrîru ga gûka kwa Mwathani gatarî gakinyu. Mwathani nîakaarete ûtherirî maûndû monthe marîa mathithîtwe ndumarî na aguûrie maûndû marîa mathithîtwe ngororî. Kwoguo wa mûndû nîakaamûkîra îgai rîrîa rîmwagîrîrîte kuuma kûrî Ngai.

Ahib 4:13

Gûtirî ûndû wana ûmwe ûngîthithwa Ngai. Maûndû monthe methagîrwa marî ûtherirî na matarî mathithe mbere ya metho make. Na nwanginya tûmûtaaragîrie maûndû monthe marîa twîkaga.

Kûguû 2:23

Wana nîngaaûraga arûmîrîri ake. Namo makanitha monthe nîmakaamenya atî nie nînie nduîragia meciria ma andû na ngamenya merirîria mao. Nie nîngaaverithia wa ûmwe wa cienyu kûringana na mevia marîa ekîte.