Jeremia 17:26 - ÎVUKU RÎA ÛVORO MWARO

²⁶ Nao andû nîmakauma îtûûrarî rîa Juda na matûûra marîa mathiûrûrûkîrîtie Jerusalemu kuuma îtûûrarî rîa Benjamini, Shefela, kuuma vûrûri ûrîa ûrî irîma na kuuma Negebu, na nîmakaaruta matega ma kûvîvua, na magongoona, na matega ma irio cia mûgûnda na ûbani mûnungi waro, vamwe na matega ma gûcokia ngatho. Makarete indo ino cionthe hekarûrî ya Ngai-Mûnene.

Jeremia 17:26 ပူးပေါင်းရင်းမြစ်များ

Ezira 3:11

Nîmaainire nyîmbo cia gûkumia Ngai-Mûnene makiugaga atîrî, “Ngai-Mûnene nî mwaro, wendo wake ûtathiraga kûrî andû a Isiraeli nî wa tene na tene.” Andû onthe nîmaaugîrîrie na vinya wata ûrîa mangîavotire, magîkumagia Ngai-Mûnene nîûndû wîra wa gûtuma mûcingi wa hekarû nîwambîrîrîtue.

Thaburi 107:22

Nîmarute matega ma kûmûcokeria ngatho, na mauge ûrîa ekîte na nyîmbo makenete.

Thaburi 116:17

Nîngûkûrutîra îgongoona rîa gûcokia ngatho, na ngaîre rîîtwa rîaku.

Thaburi 66:13

Nîngaaûka gûkûrutîra matega ma kûvîvua nyombarî yaku; nîngaavingia ûrîa naakwîrîre na mîvîtwa.

Isaia 58:13

Ngai-Mûnene arauga atîrî, “Ûngîtiga kûruta wîra mûthenya wa thavatû, ûtige kûrûmîrîra maûndû ma gwîkenia we mwene mûthenya wakwa mwamûre, ûtucage thavatû mûthenya wa gûkena na mûthenya wa Ngai-Mûnene wa kûvewa gîtîîo, ûvecage mûthenya ûcio gîtîîo, na ûtige kûthiîcaga njîra ciaku, na ûtige gûcaragia maûndû ma gwîkenia kana kwaragia ndeto itarî na kîguni,

Jeremia 30:19

Atûûri a Jerusalemu nîmakaaina nyîmbo cia kûgooca, nîmakaugîrîria nî gûkena, nîngatûma mongerereke na matikanyiva; nîngatûma matîwe na matikairwa.

Jeremia 32:44

Andû nîmakaagûra mîgûnda îo na mbeca na mekîre irore maarûarî cia mîgûnda, na ivingwe na kûgîe na aira vûrûrirî wa Benjamini, vakuvî na Jerusalemu, vakuvî na îtûûra rîa Juda, matûûrarî marîa marî vûrûrirî ûrîa ûrî irîma, na matûûrarî ma Shefela na matûûra marîa marî werûrî wa Negebu. Nîûndû nîngamacokia rîngî vûrûrirî wao. Nie Ngai-Mûnene nînie nauga ûguo.”

Jeremia 33:11

andû makiugîrîria macanjamûkîte nî gûkena, andû makiugîrîria marî kîrugorî Kîam ûviki. Nîmûkegua andû makina makenete makîrete maketha ma gûcokia ngatho hekarûrî ya Ngai-Mûnene makiugaga, ‘Kumiani Ngai-Mûnene mwene vinya wonthe, nîûndû nî mwaro, nîûndû wendo wake ûtathiraga nîwa tene na tene.’ Nîngatûma vûrûri ûyû ûgîe na maûndû maro wata ûrîa wekariî mbere. Ûguo nîguo nie Ngai-Mûnene nîrauga.”

Jeremia 33:13

Matûûrarî ma vûrûri ûrîa ûrî irîma, matûûrarî ma Shefela, na matûûrarî marîa marî werûrî wa Negebu, vûrûrirî wa Benjamini, icunjî irîa ithiûrûrûkîrîtie Jerusalemu na matûûra ma Juda, nîgûgaatuîka kûndû kwaro gwa kûrîthia ng'ondu. Ûguo nîguo nie Ngai-Mûnene nîrauga.”

Zakaria 7:7

Ndûmîrîri îo nîyo Ngai-Mûnene aamûkinyîîrie na njîra ya arathi arîa maarî kuo mbere. Vîndî îo îtûûra rîa Jerusalemu nîrîagaacîrîte na rîgatûûrwa nî andû eengî. Wanamo matûûra marîa maarigicîrîtie Jerusalemu, vûrûri wa mwena wa îveti, na vûrûri ûrîa ûrî nthî ya irîma nîgwatûûraga andû eengî.

Ahib 13:15

Kwoguo, na njîra ya Jesû nîtwagîrîrwe tûkumagie Ngai vîndî cionthe. Rîîrî nîrîo îgongoona rîetû rîrîa tûtegagîra Ngai rîrîa tûkûmumbûra na tûnyua twetû atî ke nî Mwathani.

1Pet 2:5

Ûkani kûrî Kristû ta mathiga marî mwoyo mûtûmîrwe gûtuma hekarû ya kîîroho na matuîke ta athînjîri-Ngai atheru a kûrutaga magongoona ma kîîroho kûrî Ngai. Nake agetîkagîra magongoona mau na njîra ya Jesû Kristû.

Kûguû 1:5

wana kuuma kûrî Jesû Kristû, Mûira ûrîa mwîvokeku, ûrîa wa mbere kûriûka na nwake Mwathi wa athamaki a nthî. Ke nîatwendete, na nîwatûkûûrire kuuma meviarî na nthakame yake