Isaia 9:15 - ÎVUKU RÎA ÛVORO MWARO

¹⁵ Athuuri na andû arîa ave gîtîîo nîo ciongo, nao arathi arîa mathomithanagia maûndû ma maveeni nîo mîkia.

Isaia 9:15 ပူးပေါင်းရင်းမြစ်များ

1Atha 13:18

Mûrathi ûcio mûkûrû waumîte Betheli nîwamwîrire atîrî, “Nie nîrî mûrathi wa tawe, na Ngai-Mûnene ambathîte na njîra ya mûraika, ambîra ngwoce tûcoke nawe mûciî gwakwa nîguo ûrîe na ûnyue.” Nwatî mûrathi ûcio mûkûrû nîkwa aavenanagia.

Ayubu 22:8

Nîwîtîkîrîtie arîa marî vinya gwoca ithaka, na ûgîtîkîria arîa wendete matûûre kuo.

Isaia 19:15

Gûtirî mûndû vûrûrirî wa Misiri, arî gîtonga kana mûthîni, mûndû ûrî îgweta kana ûtarî îgweta, ûngîvota gwîka ûndû wa vata.

Isaia 23:9

Ngai-Mûnene mwene vinya wonthe, nîke wavangire maûndû mama monthe. Eekire ûguo nîguo athirie mwîtîîo wa andû a kuo, na aconorithie arîa maveetwe gîtîîo nthî yonthe.

Isaia 28:15

Nîûndû mugîte atîrî, “Tue tûrî arûthu kîrîkanîro na gîkuû, na tûrîetîkanîriu na kwa arîa akuû! Rîrîa mûthiro ûkaavîtûkîrîra gûkû ndûgaatûvutia, nîûndû tûtuîte maveeni kûndû gwa kûrîra, na tûkethitha maûndûrî ma maveeni.”

Isaia 28:17

Ngaatûmîra kîvooto kîrî kîthimi gîakwa, naguo ûthingu ûrî ta kavirû.” Mbura ya mbembe nîkaavata maveeni monthe, namo manjî macûkangie ûgitîri wenyu.

Isaia 28:7

Arathi na athînjîri-Ngai wanao nî arîe nî ndivei, nîmaratûgûgana nîûndû wa kûrîwa nî njovi ndûrû. Nîavîngîcîku nîûndû wa kûrîwa nî njovi ndûrû, nîavîngîce nî ndivei makaremwa nî kwona cioneki, nîmavîngagwa magîtua ciira.

Isaia 29:10

Nîûndû Ngai-Mûnene nîatûmîte mûnyitwe nî toro na mûmame toro ndito; nîavingîte metho menyu mue arathi, na nîakunîkîte ciongo cienyu, mue oni a maûndû.

Isaia 3:12

Andû akwa makaavinyagîrîrua nî ciana na aka mamathage. Mue andû akwa, atongoria enyu nî maramûvîtithia, makamwagagia nîguo mûvîtie njîra îrîa mûkûthiîra.

Isaia 3:5

Andû nîmakaavinyanagîrîria, wa mûndû na ûrîa wîngî; andû ethî nîmakaaira andû arîa akûrû, na andû matarî kîene nîmakaaira anene ao.

Isaia 43:27

Îthe waku wa mbere nîwevirie; nao arîa maakwaragîrîria nîmaareganire nanie.

Isaia 5:13

Kwoguo nîngaavira andû akwa îthamîriorî nîûndû wa kwaga ûmenyo. Atongoria ao nîmagaakua nî yûra, na andû eengî nîmagaakua nî nyonda.

Isaia 59:3

Nîûndû njara cienyu nîinyitîtwe nî mûgiro nîûndû wa kûragana, ciara cienyu igeka ciîko njûku, mîromo yenyu nîyarîtie maveeni, natuo tûrîmî twenyu tûkaaria waganu.

Isaia 59:4

Rîrîa mwathiî îgootirî, gûtirî mûndû ûrûmagîrîra kîvooto. Gûtirî mûndû ûthitanganaga arûmîrîrîte ûma. Mwîvokaga mîario îtarî kîene na mûkaveenania, mûtungaga maveeni na mûgatûma maûndû macûku mekîke.

Jeremia 23:32

Tanthikîrîria! Nie Ngai-Mûnene nîrauga atî, nîndeganîte na arathi arîa marotaga iroto cia maveeni. Na njîra ya iroto ciao na mîario ya maveeni, nîmatûmîte andû akwa mauma njîrarî ya ma. Nie ndianamatûma, kana nîmera mathiî, kwoguo matirî na ûtethio kûrî andû akwa.”

Jeremia 23:9

Ûvoro wîgiî arathi acio nie nîregua nthînîkîte ngororî, mavîndî makwa monthe nîmarainaina, mbîkariî ta mûrîu, ta mûndû mûvote nî ndivei, nîûndû wa Ngai-Mûnene, na nîûndû wa ciugo ciake ntheru.

Jeremia 5:31

arathi methîrîtwe makîruta ûrathi wa maveeni, na athînjîri-Ngai makathana wa ûrîa makwenda. Andû akwa makona ûndû ûcio ûrî mwagîrîru. Nwatî maûndû mama makinya mûthiia mûgeka atîa?”

Maca 2:14

Arathi enyu nîmoonete cioneki cia maveeni, nîmakunîkîrîte mavîtia maku nîguo mavote gûkûrûnga, nwatî cioneki ciao ciarî cia maveeni.

Ezek 13:19

Mue nîmûmbagithîtie gîtîîo mbere ya andû akwa nîûndû wa kûvewa îvaki rîa cairi ya ngundi na tûirio tûnini. Nîmûragithîtie andû arîa matagîrîrwe nî kûragwa na mûkavonokia andû arîa matagîrîrwe nî gûtûûra mwoyo na njîra ya kûveenia andû akwa nao magetîkia maveeni menyu.’ ”

Ezek 13:22

“Maveeni menyu nîmathirîtie andû arîa athingu vinya, na ndiendaga kûmathiria vinya. Nîmwîkîrîte andû arîa aganu vinya nîguo matigatige gwîka maûndû ma waganu mavonokie mîoyo yao.

Hosea 9:8

Mûrathi nî mûrangîri wa Efiraimu, andû a Ngai wakwa, Nwatî wa kûrîa kuonthe akathiî ethagîrîria aigîrîtwe mûtego ta wa gîconi, wana nîmûmene nyombarî ya Ngai wake.

Amosi 2:4

Ngai mûnene arauga atîrî, “Andû a Juda matûûraga mevagia, kwoguo ndigaatiga kûmaverithia. Nîmareganîte na watho wa Ngai-Mûnene, na marega kwathîkîra mawatho make. Nîmavîtithîtue nî ngai irîa methe mao maagoocaga.

Mika 3:5

Ûvororî wîgiî arathi arîa mavîtithagia andû akwa; arathi arîa marathaga thayû rîrîa mavewa kîndû, nwatî makamarathîra mbaara rîrîa matavetwe kîndû.” Ngai-Mûnene arauga atîrî,

Malaki 2:9

Kwoguo nîndûmîte mûnyararwe na mwagithue kîene mbere ya andû onthe a Isiraeli nîûndû mûtiarûmîrîra njîra ciakwa, nwatî mwîthîrîtwe mûkîthomithia watho na njîra ya kîmenyano.”

Mathaayo 24:24

Nîûndû Mesaya a maveeni na arathi a maveeni nîmakeyumîria. Nîmakoonania ciama na morirû nîguo mangîvota mavîtithie andû arîa Ngai ethuurîrîte.

Mathaayo 7:15

“Îîmenyagîrîreni arathi a maveeni arîa maûkaga kûrî mue mekariî ta ng'ondu, nwatî ndaarî yao mekariî ta ciathi ngoroku.

1Joh 4:1

Arata akwa, mûtigetîkagie andû onthe arîa maugaga atî marî na Roho. Nwatî ambagani mûkamaroria waro nîguo mûmenye kana roho ûrîa marî naguo umîte kûrî Ngai nîûndû kûrî na arathi eengî a maveeni meyumîrîtie gûkû nthî.

Kûguû 19:20

Nayo nyamû nîyanyitirwe wa vamwe na mûrathi wa maveeni ûrîa waringaga ciama îrî vo. (Na njîra ya ciama icio, mûrathi ûcio wa maveeni nîwavîtithirie arîa maarî na rûûri rwa nyamû na maagoocete mûvuanano wayo.) Nyamû îo na mûrathi ûcio wa maveeni nîmaaikirue marî mwoyo îriarî rîa mwaki ûrîa wakanaga na ûviriti.

1Sam 9:6

Nwatî ndungata îo nîyerire Saûlo atîrî, “Tamba ûtige! Gûkû îtûûrarî rîîrî kwîthagîrwa kûrî na mûndû wa Ngai. Mûndû ûcio ethagîrwa arî mûtîîku mûno nîûndû maûndû monthe marîa augaga nîmatuîkîkaga. Tiga tûthiî kûrî ke, na avota gûtwîra kûrîa tûngîona mvunda icio.”