Isaia 66:12 - ÎVUKU RÎA ÛVORO MWARO

¹² Ngai-Mûnene arauga atîrî, “Ngaava îtûûra rîa Jerusalemu ûtonga mwîngî ta rûnjî, na ûtonga wa ndûrîrî ûgeecûra kuo ta rûnjî rûrî rwîcûru. Namue mûkoonga na mûkuuagwe ta mwana wa rûkenge, na mûthathawe ta mwana athathaagwa arî cierorî cia ng'ina.

Isaia 66:12 ပူးပေါင်းရင်းမြစ်များ

Isaia 14:2

Andû a mavûrûri nîmagaatethereria andû a Isiraeli gûcoka vûrûrirî ûrîa maaverwe nî Ngai-Mûnene. Nao andû acio a mavûrûri nîmagaatungatagîra Aisiraeli marî ngombo. Arîa maatavîte Aisiraeli nîmagaatavwa nî Aisiraeli, na andû a Isiraeli nîmakaatha arîa maamavinyagîrîria.

Isaia 26:3

We Ngai-Mûnene, arîa magwîtîkîtie, nîûmaigaga marî na thayû mûkinyanîru, nîûndû nwawe mevokete.

Isaia 33:21

Nwatî kûu nîkuo Ngai-Mûnene agaatwoneria riiri wake. Nîgûkethîrwa kûrî na nyûnjî nene na tûrûnjî, kûrîa meri cia mbaara itakaavîtûkîrîra, kana meri irîa nene itonya kuo.

Isaia 45:14

Ngai-Mûnene arera Isiraeli atîrî, “Ûtonga wa Misiri na indo cia Ethiopia ikethîrwa irî cienyu, nao andû arîa araca na îgûrû a Seba, nîmagaaûka kûrî we na methîrwe marî aku, na makûrûmîrîre. Nîmagaaûka kûrî we movetwe na mînyororo, na makwînamîrîrie mothiû mao makiugaga atî: ‘Ngai arî vamwe nawe, na gûtirî ngai îngî tiga ke.’ ”

Isaia 48:18

“Naarî kethîrwa nîweguîte maathani makwa! Thayû ûngîakûnyûrûrûkîre ta rûnjî, ûngîagîre na ûthingu mwîngî ta makûmbî ma manjî.

Isaia 54:13

“Nie Ngai-Mûnene nînie ngathomithia ciana ciaku, na nîikaagîa na thayû mwîngî.

Isaia 54:3

Nîûndû nîûgaatamba mîena yonthe, nacio njiarwa ciaku nîikegwatîra ndûrîrî ituîke ciao, namo matûûra marîa matiganîrie rîu nîmagecûra andû.

Isaia 59:19

Kuuma mwena wa îthûîro, wa mûndû nîagetigîra rîîtwa rîa Ngai-Mûnene, na onanie riiri wake kuuma mwena wa îrathîro. Nîûndû Ke agaaûka ta rûnjî rûvinyûrîte, rûtindîkîtwe nî rûkûngi rûnene rwa Ngai-Mûnene.

Isaia 60:16

Nîûkaareterwe irio nî andû a ndûrîrî, athamaki magaakûvecaga irio mbaro, na nîûkaamenya atî nie Ngai-Mûnene, nînie Mûvonokia waku, nînie mwene Vinya mûkûri wa Jakovu.

Isaia 61:6

Nwatî mue mûgeetagwa athînjîri-Ngai a Ngai-Mûnene, andû makaamwîtaga Ndungata cia Ngai wetû. Mûkaarîcaga ûtonga wa ndûrîrî, na mwîkenagie naguo.

Isaia 66:11

Nîûndû nîmûkoonga na mwîganie, mûkaarîa ûtonga warîo na mwîganie; mûkaanyua mûkenete na mûvae, kuumana na wîngî wa ikeno ciake.

Isaia 9:6

Nîûndû nîtûciarîrîtwe kaana. Nîtûvetwe kaana ga kavîcî. Na nîkavetwe vinya wa kwathana. Gageetwa, “Mûtaarani wa Magegania, Ngai mwene vinya wonthe, Vava wa Tene na tene, Mûthamaki wa Thayû.”

Isaia 9:7

Wathani wake nîûkaathiî na mbere ûkînenevaga; vîndî cionthe ûkethagîrwa ûrî na thayû, na nîagaatuîka mûthamaki vuva wa Daudi. Nîakaaûrûngamia na aûmenyerere, akaathanaga na kîvooto na ûthingu, kuuma rîu nginya tene na tene. Ngai-Mûnene mwene vinya wonthe nîke ûkaavingia maûndû mama.

Jeremia 33:6

Taroria, nîngavonia îtûûra rîîrî, na njokerie andû a rîo ûgima wa mwîrî. Nîngatûma mathatûkwe mûno na magîe na ûgitîri.

Hagai 2:9

Hekarû îrîa njerû îkethîrwa îrî nthaka gûkîra ya mbere, na kûu nîkuo ngarathimîra andû akwa.” Ûguo nîguo Ngai-Mûnene mwene vinya wonthe arauga.