Isaia 63:5 - ÎVUKU RÎA ÛVORO MWARO

⁵ Nînaroririe, nwatî ndiona mûndû wanarî ûmwe ûngîndethia; nînamakire, nwatî gîtiarî na wa kûnyûmîrîria. Kwoguo nînavootanire na vinya wakwa namo marakara makwa makîmbîkîra vinya.

Isaia 63:5 ပူးပေါင်းရင်းမြစ်များ

Thaburi 44:3

Andû aku matiegwatîra vûrûri na mbaara, kana mavootana na vinya wao; nwatî maavootanire na vinya na ûvoti waku, nîwethagîrwa nao vîndî cionthe, nîûndû nîwakenagua nîo.

Hosea 1:7

Nwatî nîngeguîra andû a Juda ntha na nîmavonokie. Nie Ngai-Mûnene Ngai wao nîngamavonokia, nwatî tî na vinya wa athigari a mbaara, kana rûviû rwa njûra kana mbaara, kana mbarathi, kana arîa mekaragîra mbarathi.”

Isaia 52:10

Ngai-Mûnene nîonanîtie vinya wake mûtheru kûrî andû a mavûrûri monthe, nayo mîthiia yonthe ya nthî nîîkona ûvonokio wa Ngai wetû.

Isaia 50:2

“Nîndûî gîatûmire vethîrwe vatarî mûndû vîndî îrîa naûkire? Nîndûî gîatûmire ndure mûndû wa kûnjokeria vîndî îrîa netanire? Nîkwa vinya wa njara yakwa wî mûnini, ûndû îtangîvota gûkûûra andû? Kana nîkwa ndarî na vinya wa kûvonokania? Taroriani nie nîmvûîthagia îria na uuge wakwa, na ngatûma nyûnjî ituîke werû, na nthamaki ciakuo igakua nî kûnyonda, na ikanunga nî gûtura manjî.

Isaia 41:28

Nwatî naroria, ndirona mûndû, gatagatîrî ka mîvuanano îno, gûtirî mûtaarani, ûngîvota gûcokia kîûria vîndî îrîa naûria.

Isaia 40:10

Taroria Mwathani Ngai-Mûnene nîaûkîte na vinya, vinya wake nîguo ûrathana, nîaûka na andû arîa avonoketie na iveo cia andû ake.

Thaburi 98:1

Inîrani Ngai-Mûnene rwîmbo rûcerû, nîûndû nîekîte maûndû ma magegania! Vinya wake na ciîko ciake ntheru nîitûmîte avootane.

1Akor 1:24

Nwatî kûrî arîa Ngai etîte, Ayahudi na andû a Ndûrîrî, ndûmîrîri ya Kristû nî vinya na ûûgî wa Ngai.

Johana 16:32

Kavinda nîgagûkinya, na rîu nîgakinyu, kavinda karîa muonthe mûkaanyagarûkana wa mûndû enûke gwake mûciî na mûndige nîrî nienga. Nwatî ndirî nienga nîûndû Vava arî vamwe nanie.

Isaia 63:3

Nake Ngai-Mûnene nîwacokirie atîrî, “Nakinyangire andû a ndûrîrî ta thavibu nîrî nienga, na gûtirî mûndû wandethirie. Namakinyangire nîrî na marakara na mang'ûrîka, na nthakame yao îgîtîkîra nguo ciakwa cionthe.

Isaia 51:9

Ûkîra, ûkîra, we Ngai-Mûnene! Îkîra vinya waku ûtûvonokie, ûkîra wata ûrîa wekire vingo ya tene, kûrî njiarwa cia tene. Na kinthî tîwe watinangirie Rahabu tûcunjî tûcunjî, wa we ûrîa wamundangire njûnamatu?

Thaburi 22:11

Ndûgekare varaca nanie! nîûndû thîna ûrî vakuvî nanie, na gûtirî na mûndû wa kûndethia.

Thaburi 69:20

Icambio nîimbûragîte ngoro, na nînthirîte vinya. Njarîtie wa kûmbîguîra ntha, nwatî nîmûturu; njarîtie mûndû ûngînyûmîrîria, nwatî ndimûmwonu.

Isaia 51:5

Gûkûûrana gwakwa kûrî vakuvî, naguo ûvonokio wakwa nî mwambîrîriu kwoneka. Nie mwene nînie ngaatha mavûrûri; andû arîa matûûraga mavûrûrirî ma kûraca nîmambetererete, na mevokete nîmavonokie.

Ezek 22:30

Naacaririe mûndû gatagatîrî kao ûrîa ûngîtuma rûthingo na arûngame mbere yakwa vandûrî va andû a vûrûri nîguo ndikamacûkangie, nwatî ndianona wanarî ûmwe.

Thaburi 94:16

Nîûrîkû wandethirie kûrûa na andû arîa aganu? Nîûrîkû warî mwenarî wakwa ngîrûa na eki naaî?

Thaburi 107:12

Nîmaathirîte vinya nîûndû wa wîra mûrito, nîmaagwîre nthî na mationa mûndû wa kûmatethia.