Isaia 60:21 - ÎVUKU RÎA ÛVORO MWARO

²¹ Andû aku onthe makethîrwa marî athingu, na nîmakegwatîra vûrûri tene na tene. O magaatuîka ta mûtî ûrîa mvandîte nie mwene, nîguo ngumague nî andû onthe.

Isaia 60:21 ပူးပေါင်းရင်းမြစ်များ

2Sam 7:10

Nî nthuurîrîte andû akwa a Isiraeli kûndû kwa gûtûûra na nîngaatûma matûûre kuo, nîguo na matigacoke kûvinyîrîrua rîngî ta ûrîa meekagwa mbererî nî andû arîa aganu.

Thaburi 37:11

Nwatî andû arîa avooreri nîo makeegwatîra nthî, na makenagîre ûtûûro mwaro na thayû.

Thaburi 37:18

Ngai-Mûnene nîamenyagîrîra andû arîa mamwathîkagîra, na îgai rîao rîgaatûûra tene na tene.

Thaburi 37:22

Andû arîa arathime nî Ngai-Mûnene nîmakagaa nthî, nwatî arîa arume nîke nîmakaathirua.

Thaburi 37:29

Andû arîa athingu nîmakaagaa nthî, na matûûre kuo tene na tene.

Thaburi 92:13

Mekariî ta mîtî îvandîtwe nyombarî ya Ngai-Mûnene, îrîa îkûragîra hekarûrî ya Ngai wetû.

Isaia 19:25

Ngai-Mûnene mwene vinya wonthe nîakaamarathima akiugaga atîrî, “Mûrorathimwa andû akwa a Misiri, mûrorathimwa andû a Asîria arîa naûmbire na njara ciakwa, na Aisiraeli arîa nîîthuurîrîte.”

Isaia 24:16

Nîtûregua nyîmbo cia gûkumia Ngai ûrîa mûthingu, ikinwa kuuma mîthiia ya nthî. Nwatî ngoro yakwa nî ndito nî kîeva, nama, ngoro yakwa nî ndito! Ndirî na kîîrîgîrîro! Andû arîa acukanîrîri mekaga maûndû ma ûcukanîrîri, na ûcukanîrîri ûthiîte na mbere kwongerereka.

Isaia 26:2

Vingûrani ivingo cia îtûûra, nîguo vûrûri ûrîa mûthingu, na ûrîa mwîvokeku ûtonye ndaarî.

Isaia 29:23

Nîûndû rîrîa akoona ciana ciake, wîra wa njara ciakwa, nîmagaakumia rîîtwa rîakwa nie Ûrîa Mûtheru wa Jakovu; na metigîre Ngai wa Isiraeli.

Isaia 43:21

Acio nî andû arîa naûmbire marî akwa nie mwene, nîguo managîrîre ngumo yakwa!

Isaia 43:7

Andû onthe arîa metanagua nanie, arîa naûmbire nîûndû wa riiri wakwa, arîa naûmbire na ngîtûma magîe kuo.”

Isaia 44:23

Kenani mue arîa onthe mûtûûraga îgûrû, nîûndû Ngai-Mûnene nîekîte ûguo! Anîrîrani mue nthî kûrîa kûriku! Inani mûkenete mue irîma, mîtitû na mîtî yonthe îrîa îrî kuo! Nîûndû Ngai-Mûnene nîakûûrîte Jakovu, na nîatûûra akumagua vûrûrirî wa Isiraeli.

Isaia 45:11

Ngai-Mûnene Ûrîa Mûtheru wa Isiraeli, ûrîa mûmûmbi arauga atîrî, “Nwa mûmbûrie ûvoro wa ciana ciakwa, kana mûmbathîre wîra ûrîa ndutaga nie mwene?

Isaia 45:24

“Vîndî îo nîgûkeerwa îgûrû rîakwa atî: Ûthingu na vinya cionekaga kûrî Ngai-Mûnene; andû arîa onthe maamûrakarîrîte, nîmagaaûka kûrî ke na maconoke.”

Isaia 45:25

Nie Ngai-Mûnene nîngaatethûra njiarwa cionthe cia Isiraeli, na nîikaavootana.

Isaia 45:8

Mbura nîyure kuuma îgûrû, namo matu nîmaurithie ûthingu nthî, nthî nîyatûke nîguo îciare ûvonokio, na îtûme kûgîe na ûthingu wanaguo. Nie Ngai-Mûnene nînie mbîkîte maûndû mau.”

Isaia 49:3

Nîwacokire akîmbîra atîrî, “We Isiraeli wî ndungata yakwa; na nîwe ûkoonanagia riiri wakwa.”

Isaia 51:2

Taîcirieni ûvoro wa Iburahimu, îthe wenyu wa tene, na ûvoro wa Sara ûrîa wamûciarire. Iburahimu aarî wenga rîrîa namwîtire, nwatî nînamûrathimire na ngîmûva ciana nyîngî.

Isaia 52:1

Ûkîra, ûkîra! Gîa na vinya, we Zayuni; îkîra nguo ciaku irîa mbaro, we Jerusalemu, îtûûra rîrîa rîamûre; nîûndû gûtirî mûndû ûtarî mûruu kana ûrî na mûgiro ûgaatonya gwaku rîngî.

Isaia 54:17

Gûtirî indo cia mbaara irîa irûthîtwe cia gûgûcûkangia ikaavota gwîka guo. Mûndû ûrîa ûgaakûthitanga îgootirî nîûkaamûvoota. Rîîrî nîrîo îgai rîa ndungata cia Ngai-Mûnene, na rîu nîrîo îtua rîakwa kûrî o.” Nie Ngai-Mûnene nînie nauga ûguo.

Isaia 57:13

Vîndî îrîa mûgaakaya mûgîtia ûtethio, mîvuanano îo yenyu nîîkamûvonokia! Rûkûngi nîrûkaamîvuruta îthiî kûndû kûraca. Nwatî arîa manîîvokete nîo makegwatîra vûrûri ûtuîke wao, na magae Kîrîma gîakwa kîrîa Kîammûre.”

Isaia 61:11

Nîûndû wata ûrîa mûthetu ûtûmaga mbegû îmere, na wata ûrîa mûgûnda ûtûmaga kîrîa kîvande kuo gîkûre, ûguo nwaguo Mwathani Ngai-Mûnene agaatûma ûthingu na ûkumio, cionekane ndûrîrîrî cionthe.

Isaia 61:3

Andûmîte ngave arîa maracakaya marî Zayuni, ngovia ya maûa vandû va mûu, maguta ma gîkeno vandû va kîeva, nguo ya ûgooci vandû va îvooru. Makethîrwa mavaana ta mîtî ya mîvuru ya ûthingu, îrîa Ngai-Mûnene avandîte nîguo akumague.

Isaia 61:7

Nîûndû wa ûrîa mwaconorithirue mûkaarîvwa maita maîrî, nîûndû wa kûrega gûtîîwa nîmûgaakenera îgai rîenyu, kwoguo nîmûgaatûûra vûrûrirî wenyu, na ûtonga wenyu wongerereke maita maîrî, na mûtûûre mûkenete tene na tene.

Isaia 62:4

We ndûgaacoka gwîtwa rîngî, “Mûtiganîrie,” na vûrûri waku ndûgaacoka gwîtwa rîngî, “Mûndûmûka mûtiganîrie.” Nwatî ûgeetagwa, “Nîngenagua nîke,” naguo vûrûri waku ûgeetagwa, “Mûndû mûvikie.” Nîûndû Ngai-Mûnene nîakenetue nîwe, nake agaatuîka ta mûndûmûrûme avikîtie vûrûri waku.

Isaia 64:8

Nwatî kûnarî ûguo, we Ngai-Mûnene, we nîwe Vava. Tue twîkariî ta yûmba, nawe wîkariî ta mûmbi wa nyûngû. We nîwe watûmbire tuonthe.

Isaia 65:9

Nîngaatûma kûgîe na njiarwa kuuma kûrî Jakovu, na ndûme Juda kuume andû arîa makaagaa vûrûri wakwa ûrîa ûrî irîma. Andû arîa nthuurîte nîo makaaûgaa, nao arîa mandungatagîra nîo magaatûûra kuo.

Jeremia 24:6

Nîngamagitîra na nîmeke maûndû maro na nîngamacokia vûrûrirî ûyû. Nîngamatuma na ndikamomomora; nîngamavanda na ndikamang'aûrania.

Jeremia 32:41

Nîngakena ngîmeka maûndû maro, na ndûme mekindîrie vûrûrirî ûyû.”

Ezek 11:17

“Kwoguo meere Ngai-Mûnene augîte nîngaamaûngania nîmarute mavûrûrirî marîa naamanyaganîrie, na nîngaamacokia vûrûrirî wa Isiraeli.

Ezek 34:29

Nîngaaiva mîgûnda mîaro îgûkûra irio nîguo itigaacoke kûgîa na yûra vûrûrirî ûcio, na itigaacoka kûthekererwa nî ndûrîrî rîngî.

Ezek 37:25

Nîmagaatûûra vûrûrirî ûrîa naveere ndungata yakwa Jakovu. Vûrûri ûcio nî ûrîa methe mao maatûûraga. Nao o ene, ciana ciao na ciana cia ciana ciao nîmagaatûûra kuo tene na tene. Nake Daudi ndungata yakwa nîagaatuîka mûnene wao tene na tene.

Ezek 47:7

Rîrîa nacokaga nînonire mîena yoîrî ya karûnjî kûrî na mîtî mîngî.

Amosi 9:15

Nîngatûma andû akwa mekare vûrûrirî wao, na matikaarutwa kuo rîngî.” Ûguo nîguo Ngai-Mûnene augîte.

Obadia 1:17

“Nwatî kîrîmarî gîa Zayuni nîgûkethîrwa arîa makaavonokua, gûkethîrwa kûrî kûndû kûtheru. Andû a Jakovu nîmakegwatîra vûrûri ûrîa maacunîtwe ûtuîke wao kîûmbe.

Zefania 3:13

Andû arîa matigîtwe kûu Isiraeli matigeka naaî, matikaria maveeni, kana mageria kûveenania. Makaagîcaga gîa kûrîa na marî na ûgitîri, na matagwîtigîra wanarî kîndû.”

Mathaayo 15:13

Nake Jesû nîwamacokerie atîrî, “Mûtî wa wonthe ûtavandîtwe nî Vava ûrîa ûrî îgûrû nîûgakûûrwa.

Mathaayo 5:5

Kûrathimwa nî arîa avoreri; nîûndû nîmakagaa nthî!

Johana 15:2

Ke nîatemaga rûvûa wa ruonthe rwakwa rûrîa rûtaciaraga maciaro, na rûvûa wa ruonthe rûciaraga maciaro nîarûcaaga nîguo rûciare maciaro meengî.

Aefeso 1:12

Tigani tue arîa twathuurirwe na twarî a mbere kwîrîgîrîra Kristû tûkumie riiri wa Ngai!

Aefeso 1:6

Tigani tûkumie Ngai nîûndû wa riiri wa wega wake, na nîûndû wa kîveo kîrîa atûvete mana na njîra ya Mûriû wake mwende!

Aefeso 2:10

Ngai aatûmbire ûguo twîkariî na njîra ya Kristû nîguo twîkage ciîko mbaro irîa aavangîte twîkage.

Aefeso 2:7

Eekire ûguo nîguo mavindarî monthe marîa magaaûka akoonania magegania na ûnene wa wega wake. Eekire ûguo na njîra ya wendo ûrîa aatwonirie na njîra ya Jesû Kristû.

2Ath 1:10

Ûguo gûgekîka mûthenya ûrîa Mwathani agaûka kwamûkîra riiri kuuma kûrî etîkia onthe. Mue mûkethîrwa mûrî gatagatîrî kao, nîûndû nîmwîtîkîtie ndûmîrîri îrîa twamwîrire.

2Pet 3:13

Nwatî kûringana na kîîranîro gîake, tue twetererete îgûrû rîcerû na nthî njerû, kûrîa gûkethîrwa gwîcûrîte ûthingu.

Kûguû 21:27

Nwatî gûtirî kîndû kîrî mûgiro gîgaatonya îtûûrarî rîu înene. Mûndû wa wonthe wîkaga maûndû macûku na marî nthoni, kana andû arîa maveenanagia matigaatonya kuo. Arîa magaatonya nî arîa marîîtwa mao mandîkîtwe îvukuurî rîa Gatûrûme rîa mwoyo.

Kûguû 21:7

Mûndû wa wonthe ûkavootana nîakaamûkîra maûndû mama kuuma kûrî nie. Nie nîngaatuîka Ngai wake, nake atuîke mwana wakwa.

Kûguû 5:10

We nîûmatuîte rûrîrî rwa athînjîri-Ngai a gûtungatîra Ngai na nîmakaathana gûkû nthî.”