Isaia 59:14 - ÎVUKU RÎA ÛVORO MWARO

¹⁴ Kîvooto nîkîthengutîtue, naguo ûthingu ûgekara varaca. Ûma nîkwa ûkinyangagîrwa nthî magootirî, naguo wîvokeku ndonekaga kuo.

Isaia 59:14 ပူးပေါင်းရင်းမြစ်များ

1Atha 21:10

Mwige mîkora îîrî yerekanîrîte nake nîguo îmûthitange îkîmwîraga atî nîarumîte Ngai vamwe na mûthamaki. Mûcoke mûmûrute nja ya îtûûra na mûmûûrage na mathiga.”

1Atha 21:11

Kwoguo andû a îtûûra rîa Nabothi, ndungata vamwe na atongoria arîa maatûûranagia na Nabothi nîmeekire wata ûrîa Jezebeli aathanîte maarûarî irîa aamatûmîrîte.

Thaburi 119:150

Andû arîa mavangaga maûndû macûku ma kûnyarira nîmarakuvîvîria, acio marî kûraca na watho waku.

Mûvunjia 3:16

Ûndû wîngî naamenyire gûkû nthî nî atî kûrîa kwagîrîrwe kwîthîrwa na kîvooto na ûûma kwîthagîrwa na maûndû macûku.

Isaia 1:21

Na kaî îtûûra rîrîa rîarî rîvokeku nîrîtuîkîte ta mûmaraa-î! Vîndî îmwe nîrîecûrîte ûthingu na ûma, nwatî rîu rîcûrîte aûragani.

Isaia 46:12

“Tathikîrîriani mue andû aya aûmû ngoro, mue mûrî kûraca na ûvonokio.

Isaia 5:23

Arîa mavakagwa nîguo marekererie arîa marî na mavîtia, na makaima arîa athingu kîvooto Kîamo.

Isaia 5:7

Nîûndû mûgûnda wa Ngai-Mûnene mwene vinya wonthe nî nyomba ya Isiraeli. Andû a Juda nîo mîthavibu mîaro îrîa aavandire; eevokaga nîmagwîka ûrîa kwagîrîrîte, nwatî vandû va ûguo, nîmaûraganîte; eevokaga nîmakwîthîrwa marî athingu, nwatî vandû va ûguo nîmaatûmire kûgîe na kîrîro.

Isaia 59:11

Tuonthe tûraramaga ta ngatûnyi, twîkaraga tûgîcaga ta ndutuura. Twetagîrîra tûone waragania nwatî tûtiwonaga; twetagîrîra ûvonokio, nwatî ûrî kûraca natue.

Isaia 59:4

Rîrîa mwathiî îgootirî, gûtirî mûndû ûrûmagîrîra kîvooto. Gûtirî mûndû ûthitanganaga arûmîrîrîte ûma. Mwîvokaga mîario îtarî kîene na mûkaveenania, mûtungaga maveeni na mûgatûma maûndû macûku mekîke.

Isaia 59:9

Nîûndû wa maûndû mau twîkîte, kîvooto kîrî kûraca natue, na Ngai nîarutîte ûthingu wake kûrî tue. Tûcaragia ûtheri, nwatî twîyonaga ndumarî, twîriragîria kûthiîrîra ûtherirî, nwatî tûthiîcagîrîra ndumarî.

Jeremia 5:31

arathi methîrîtwe makîruta ûrathi wa maveeni, na athînjîri-Ngai makathana wa ûrîa makwenda. Andû akwa makona ûndû ûcio ûrî mwagîrîru. Nwatî maûndû mama makinya mûthiia mûgeka atîa?”

Jeremia 7:28

Nawe ûkamera atî, ‘Rûrû nî rûrîrî rûrîa rwaregire kwathîkîra mûgambo wa Ngai-Mûnene Ngai wao, na rûkîrega kûrûngwa nîke. Ûûma nîwathirire kûrî o, wana matiaragia ûvoro waguo.’

Danieli 8:12

Ciûmbe cia îgûrû nîcianenganîrwe rungu rwa wathani wa karûvîa kau. Îthenyarî rîa magongoona marîa maarutagwa wa mûthenya, andû nîmambîrîrie gwîka maûndû macûku. Karûvîa kau nîgaacûkangirie ndini ya Ngai, na gagîtoorania maûndûrî monthe marîa geekaga.

Hosea 7:1

Rîrîa rîonthe nenda kûrûnga andû akwa a Isiraeli na kûmavonia, wîvia wa andû a Efiraimu nîûguûragua, vamwe na ciîko njûku irîa ciîkîtwe nî andû a Samaria. Nao nîmaavenanagia; nîmavunjaga nyomba cia arîa engî, na acunani nîmaakavagîra andû njîrarî na makamacuna indo ciao.

Amosi 5:11

Mue nîmûvinyagîrîria ngîa na mûkametia gooti ya ngano nyîngî gûkîra ûrîa magîrîrwe nî kûruta. Mwîtumîrîte nyomba cia mathiga ma kumia, nwatî mûtigaitûûra. Nîmûrîmîte mîgûnda mîaro ya mîthavibu nwatî mûtikaanyua ndivei ya thavibu icio.

Amosi 5:7

Îîmenyerereni mue arîa mûreganaga na ûûma na mûgakinyangîra kîvooto nthî.

Amosi 6:12

Mbarathi nîivinyûragîra mathigarî? Andû nîmarîmaga îriarî na ndegwa? Nwatî mûgarûrîte kîvooto gîgatuîka ûrogi, na ûthingu ûgatuîka ûrûrû.

Habakuku 1:4

Kwoguo watho ndûrî na vata, na kîvooto gîtirûmagîrîrwa. Andû arîa acûku mathiûrûrûkîrîtie andû arîa aro, kwoguo kîvooto gîtirûmagîrîrwa.