Isaia 58:7 - ÎVUKU RÎA ÛVORO MWARO

⁷ Nî kûgaana irio cienyu na arîa avûtu na kwamûkîra athîni arîa maûrûraga mîciîrî yenyu. Mwona mûndû arî njaga, mûkamûva nguo na mûtikarege gûtethereria andû enyu.

Isaia 58:7 ပူးပေါင်းရင်းမြစ်များ

Kîam 19:14

Loti nîwacokire akîthiî kûrî arûme arîa maarî mavikie erîtu ake na akîmeera atîrî, “Îîvarîrieni narua muume îtûûrarî rîîrî, nîûndû Ngai-Mûnene nîwîvarîrîtie kûrîcûkangia.” Nwatî meeciragia nî îtherû aarî narîo.

Kîam 19:2

na akiuga atîrî, “Athi akwa, nie nîrî ava nîguo nîmûtungatîre. Nîramûthaitha mûtonye gwakwa nyomba, mwîthambie magûrû na mûrarîrîre. Kîraûko gwakîa nîmûkaaramûka mûthiî.” Nwatî nîmaacokerie Loti atîrî, “Naarî, tue nîtûrara gûkû nja kîvarorî.”

2Maû 28:15

Atongoria acio magwetetwe marîîtwa mao nîmoocire mîgwate na indo cionthe irîa ciatavîtwe. Kuumana na indo irîa maatavîte, nîmaaveere mîgwate yonthe îrîa yarî njaga nguo, iratû, na makîmava irio, gîa kûnyua, na arîa maarî na ironda nîmaamavakire maguta ma ndamaiyû. Nao arîa mataarî na vinya nîmaamatwîthirie mvundarî ciao na makîmacokia kûrî andû ao Jeriko, îtûûra rîa mîtî ya mîkîndû. Andû a Efiraimu nîmaacokire magîcoka Samaria.

Nehemia 5:5

Tûrî a nthakame îmwe na Ayahudi acio etû. Ciana cietû nî ûndû ûmwe na ciana ciao. Nwatî rîu ciana cietû tûraitua ngombo. Erîtu etû amwe nîmendetue ta ngombo. Nwatî tûtingîvota gwîtethia, nîûndû tûrî acune mîgûnda yetû na mîtî yetû ya mîthavibu nî andû engî.”

Ayubu 22:7

Nîwamaimire arîa maarî anogu manjî ma kûnyua, na arîa maarî avûtu ûkîmaima irio cia kûrîa.

Thaburi 112:9

Arutaga na ûtaana, akava andû arîa athîni; ûtaana wake ûtûûraga tene na tene; ethagîrwa na vinya na nîwîtigîrîtwe.

Nthi 11:17

Mûndû ûrîa ûrî ntha nîagunîkaga ke mwene, nwatî mûndû ûrîa mwaganu ecûkangagia ke mwene.

Nthi 22:9

Mûndû mûtana nîarathimagwa, nîûndû nîagaanaga irio ciake na athîni.

Nthi 24:11

Vonokia andû arîa mavirîtwe kûûragwa, ndûkarege kûvonokia arîa matuîrîrîtwe kûûragwa matarî na mavîtia.

Nthi 25:21

Ethîrwa nthû yaku îrî mvûtu, mîve irio îrîe; na ethîrwa îrî nyondu, mîkundie manjî înyue;

Nthi 28:27

Mûndû ûrîa ûvecaga arîa athîni ndagaaturaga kîndû, nwatî ûrîa ûregaga gûtethia athîni nîakaarumwa nî andû eengî.

Isaia 58:10

mûvecage arîa avûtu irio, na mûvingagîrie arîa marî na mathîna mavata mao, ûtheri wenyu ûkaaraga kûrîa kûrî nduma, nakîo kîeva kîenyu kîgarûrwe gîtuîke gîkeno.

Jeremia 22:3

Nie Ngai-Mûnene nîramwatha mwîkage maûndû ma kîvooto na ma ûthingu. Mûvonokie andû onthe arîa macunîtwe indo ciao kuuma kûrî arîa mamavinyagîrîria. Mûtigeke ûndû mûcûku kana mûnyamaria ageni, ciana irîa itarî methe, mûndûmûka wa ndigwa kana mûrage mûndû ûtarî na wîvia vandû ava.

Ezek 18:16

na ndavinyagîrîria mûndû. Ke ndocaga kîndû nîguo agaakûrîrwa, ndacuunanaga, nwatî nîagaagîra arîa avûtu irio ciake, na arîa matarî na nguo cia gwîkîra nî amavecaga.

Ezek 18:7

ethîrwa ndavinyagîrîria mûndû wana ûrîkû, nîacokagia kîndû kîrîa eranîrîte kûrî mûndû ûrîa marî thirî nake, wana ndacuunaga andû indo ciao, nwatî nîavecaga arîa avûtu irio na arîa matarî na nguo akamava cia gwîkîra.

Danieli 4:27

Kwoguo Mûthamaki wetû, nakûthaitha wîtîkîre mataaro makwa. Tiga kwîvia na gwîka maûndû ma waganu, na wambîrîrie gwîka maûndû ma ûthingu na kwîguîra andû arîa athîni ntha. Weka ûguo, wavota kwongererwa mavinda ma gûtûûra wîganîrîte.”

Luka 11:41

Vandû va gwîka ûguo, vecagani athîni ûtethio na indo cionthe cienyu nî igûtuîka ntheru.

Luka 19:8

Nake Zakayo nîwaumîrire vau mbere yao onthe na akîîra Mwathani atîrî, “Tathikîrîria Mwathani! Nie nîngûva athîni nuthu ya indo ciakwa. Na angîthîrwa kûrî mûndû nanacuuna kîndû gîake, nîngûmûrîva maita mana ma kîo.”

Luka 3:11

Nake Johana nîwamacokerie atîrî, “Mûndû wonthe ûrî na cati igîrî nwa nginya ave ûrîa ûtarî, na mûndû wa wonthe ûrî na irio nwa nginya agaîre ûrîa ûtarî.”

Ciîko 16:15

Ke na andû onthe a mûciî wake nîmaavatithirue. Nîwacokire agîtûthaitha agîtwîra atîrî, “Ethîrwa mue nîmwatua atî nie na ma nîmbîtîkîtie Mwathani, ûkani vi mûgekare gwakwa mûciî.” Nake nîwageririe mûno gûtwîgwithia atî tûthiî tûgekaranie nake.

Ciîko 16:34

Na vuva wa ûguo mûrangîri ûcio wa njeera nîwavirire Paûlo na Sailasi gwake mûciî, na akîmava irio. Nake mûrangîri wa njeera vamwe na andû ake nîmecûrirwe nî gîkeno nîûndû o nîmeetîkîtie Ngai.

Aroma 12:13

Tethagiani andû a Ngai arîa mavatarîte ûtethio, na mwamûkagîre ageni mîciîrî yenyu.

Gûco 22:1

“Ûngîona ng'ombe kana ng'ondu ya Mûisiraeli ûrîa wîngî îrî mbûru ndûkamîtige, nwatî ûkaamîcokia gwake mûciî.

1Tim 5:10

Nwanginya ethîrwe arî mûndû wîcîkene na arî na ngumo mbaro, mûndûmûka ûrerete ciana ciake na njîra mbaro, ûgwataga andû ûgeni gwake mûciî, ûtethagia andû arîa marî thînarî, ûtungatagîra akristiano arîa engî enyivîtie na wîkaga ûndû wa wonthe mwaro.

File 1:7

Mûrû wa îthe wetû, wendo waku nîûtûmîte ngîe na gîkeno kînene na ûkanyûmîrîria mûno! We nîûcanjamûrîte ngoro cia andû onthe a Ngai.

Atir 9:2

“Namûthaitha mwarie mûkîgucagwa nî andû onthe a Shekemu, mûmaûrie atîrî, ‘Nî ûndû ûrîkû mûrona wagîrîrîte? Mûrenda kwathagwa nî avîcî onthe mîrongo mûgwanja a Gideoni, kana mûrenda kwathagwa nî mûndû ûmwe?’ Makîria ya ûguo, ririkanani, atî mue nanie tûrî a nthakame îmwe.”