Isaia 55:7 - ÎVUKU RÎA ÛVORO MWARO

⁷ Andû arîa aganu nîmatigane na mîthiîre îo yao, nao andû arîa matarî athingu matigane na meciria mao macûku. Nîmacokerere Ngai-Mûnene nîguo ameguîre ntha, na macokerere Ngai wetû nîûndû nîakîragîrîria kwovanîra.

Isaia 55:7 ပူးပေါင်းရင်းမြစ်များ

Kîam 6:5

Ngai-Mûnene nîwonire atî waganu wa andû warî mwîngî mûno gûkû nthî, na atî meciragia maûndû macûku vîndî cionthe.

2Maû 15:2

Nîwathiîre gûtûnga mûthamaki Asa na akîmwîra atîrî, “Asa, wana andû onthe a Juda na a Benjamini, tanthikîrîriani. Ngai-Mûnene ethagîrwa arî vamwe namue rîrîa rîonthe mûrî nake. Mûngîmûcaria mûkaamwona, nwatî mûngîmûtiganîria wanake akaamûtiganîria.

2Maû 15:4

Nwatî vîndî ya thîna, nîmaagarûrûkagîra Ngai-Mûnene, Ngai wa Isiraeli. Nîmaamûcaragia na makamwona.

2Maû 30:6

Kwoguo anjaama nîmaathiîre Isiraeli na Juda kuonthe marî na maarûa kuuma kûrî mûthamaki na anene ake. Maarûa icio ciandîkîtwe atîrî, “Mue andû a Isiraeli ûkani kûrî Ngai-Mûnene, Ngai wa Iburahimu, Isaka na Jakovu. Nake Ngai nîagûka kûrî mue, arîa mwatigarire vîndî îrîa mwatharîkîrwe nî athamaki a Asîria.

2Maû 33:13

Ngai nîwegwire mavoya make na akîmwîguîrîra ntha. Kwoguo Ngai-Mûnene nîwamûvotithirie gûcoka Jerusalemu, ûthamakirî wake. Ûndû ûcio nîwatûmire Manase amenya atî Ngai-Mûnene, nî Ngai.

2Maû 7:14

ethîrwa andû akwa arîa metanîtue na rîîtwa rîakwa nîmakaavera, mavoe na magarûrûke matige mîthiîre yao mîcûku, nîngaamegua nîrî îgûrû na nîngaamovera mevia mao na mvonie vûrûri wao.

Ayubu 22:23

Ûngîcokerera Ngai mwene vinya wonthe na wînyivie, na ûthengutie waganu ûrîa wîkagwa gwaku mûciî;

Thaburi 130:4

Nwatî we nîûtwovagîra, nîguo tûgûtîîage.

Thaburi 130:7

We Isiraeli, îîvoke Ngai-Mûnene, nîûndû Ngai-Mûnene ethagîrwa arî na wendo ûtathiraga, na ethagîrwa arî na vinya mûnene wa kûvonokania.

Thaburi 51:1

Mbîguîra ntha, we Ngai, nîûndû wa wendo waku ûtathiraga. Theria mevia makwa, nîûndû wa ntha ciaku nyîngî!

Thaburi 66:18

Kethîrwa nînaaregire kûvera mevia makwa, Mwathani ndangîanthikîrîrie.

Nthi 28:13

Mûndû ûrîa ûthithaga mevia make ndangîgîa na mûtûûrîre mwaro, nwatî mûndû ûrîa umbûraga na agatiga mevia make nîakeguîrwa ntha nî Ngai.

Isaia 1:19

Ethîrwa nîmûgûîtîkîra kûmbathîkîra, nîmûkaarîa maciaro maro ma nthî.

Isaia 14:1

Ngai-Mûnene nîakeguîra andû a Jakovu ntha na athuure andû a Isiraeli rîngî matuîke ake kîûmbe. Nîakaamacokia vûrûrirî wao o ene, na ageni nîmagaaûka na matûûranie nao.

Isaia 21:12

Nanie mûrangîri ngîcokia atîrî, “Nîgûkîa, na gûcoke gûtuke rîngî. Wenda kûria ûria, thiî ûûke rîngî.”

Isaia 31:6

Mue andû a Isiraeli, garûrûkîrani ûcio mwaregire na vinya.

Isaia 32:7

Mîthiîre ya mûndû ûrîa mûthunu nî mîcûku; avangaga maûndû ma waganu nîguo acûkangie athîni na ciugo ciake cia maveeni, wana rîrîa athîni maretia kîrîa kîmagîrîrîte.

Isaia 40:2

Arîriani andû a Jerusalemu na ûvoreri. Na mûmeere atî ûkomborî ûrîa mararî nîwathira, na mevia mao nîmoverwa. Na atî Ngai-Mûnene amaverithîtie kwîgana nîûndû wa mevia mao monthe.”

Isaia 43:25

Nie nînie nakwoveere mevia maku nîûndû wa kwenda gwakwa, na ndikaaririkana mevia maku.

Isaia 44:22

Nîmvatîte mavîtia maku ta îtu, na mevia maku ta nundu; njokererani nîûndû nîmûkûûrîte.”

Isaia 54:10

Irîma nwa ithengute vo, na tûrîma tûkarutwa vo, nwatî wendo wakwa ûtathiraga ûrîa ngwendete naguo ndûkaathenguta kûrî we, na kîrîkanîro gîakwa Kîam thayû gîtikaathengutua.” Ûguo nîguo Ngai-Mûnene ûrîa ûkwîgucagîra ntha arauga.

Isaia 54:8

Nakûthithire ûthiû wakwa gwa kavinda kanini, nîûndû wa ûrîa natûmbîtwe nî marakara, nwatî nîngaakwîguîra ntha na wendo ûtathiraga.” Ûguo nîguo Ngai-Mûnene Mûkûri waku arauga.

Isaia 58:6

“Kwînyerekia kûrîa kûngenagia nî gûkû: kûthengutia mînyororo ya gûkinyanîrîria na ya kwimana kîvooto; kûrekereria andû arîa akinyîrîrie, na kûthengutia mînyororo ya mîthemba yonthe.

Isaia 59:7

Mûvinyûragîra gwîka waganu, na mûkevîka kûûraga arîa matarî na mavîtia. Mwîciragia maûndû ma waganu, kûrîa kuonthe mwavîtûkîrîra mûtigaga mwacûkangia na mwomomora.

Jeremia 3:14

Ngai-Mûnene arauga atîrî, “Njokererani, mue ciana ciakwa mûtarî evokeku; nîûndû nînie mwathi wenyu; nîngamwoca ûmwe kuuma îtûûrarî rîmwe, na andû aîrî kuuma wa mûciî; na nîmûvire Zayuni.

Jeremia 3:3

Kwoguo mbura nene nîmvingîrîrie, wana îrîa nini nîndigu kuura; kûnarî ûguo we wîigaga ta îraa; na ndwîgucaga nthoni.

Jeremia 4:14

We Jerusalemu, theria ngoro yaku îthirwe nî waganu, nîguo ûvonokue. Nî nginya rî ûgûtûûra wîciragia maûndû macûku ngororî?

Maca 3:40

Tigani twîthime na tûtuîrie mîthiîre yetû, na tûcokerere Ngai-Mûnene.

Ezek 14:6

“Kwoguo îra andû a Isiraeli atî, Ngai-Mûnene augîte: Îrireni na mûgarûrûke mûtigane na mîvuanano îo yenyu, na mûtige maûndû marîa macûku mwîkaga.

Ezek 33:11

Meere atî wata ûrîa nie Ngai-Mûnene Ngai ndûûraga mwoyo, ndikenagua nî gîkuû Kîam mûndû mwîvia, nwatî mendaga mûndû mwaganu agarûrûke atige mîthiîre yake na atûûre mwoyo. Mue andû a Isiraeli mûrenda gûkua nîkî? Garûrûkani mûtige maûndû menyu ma waganu.

Danieli 4:27

Kwoguo Mûthamaki wetû, nakûthaitha wîtîkîre mataaro makwa. Tiga kwîvia na gwîka maûndû ma waganu, na wambîrîrie gwîka maûndû ma ûthingu na kwîguîra andû arîa athîni ntha. Weka ûguo, wavota kwongererwa mavinda ma gûtûûra wîganîrîte.”

Jona 3:10

Rîrîa Ngai oonire ûrîa meekire na ûrîa maatiganire na ciîko ciao cia waganu, nîwericûkirwe na ndaamaverithia ta ûrîa aaugîte nîagwîka.

Zakaria 8:17

Ngororî cienyu mûtikavange mîvango mîcûku ya gûcûkia mûndû ûrîa wîngî, kana mûkenue nî mwîvîtwa wa maveeni nîûndû nînthûrîte maûndû mau monthe.”

Mathaayo 9:13

Thiîni mûkamenye gîtûmi Kîam mandîko matheru marîa maugîte atîrî, ‘Nie mendaga ciîko cia ntha na tî magongoona ma nyamû.’ Nie ndiûkîte gwîta andû arîa athingu, nwatî mbûkîte gwîta evia.”

Maariko 7:21

Nîûndû ngororî ya mûndû nîkuo kuumaga meciria macûku marîa matûmaga mûndû ende gwîka maûndû macûku ta; ûmaraa, wîi, ûûragani,

Maariko 7:23

Maûndû mama monthe macûku maumaga kûu ndaarî ya mûndû, nîmo matûmaga mûndû agîe na mûgiro.”

Luka 15:10

Nîramwîra atî, ûguo nwa guo araika a Ngai makenagîra mwîvia ûmwe ûrîa wîrirîte mevia make.”

Luka 15:24

nîûndû mwanake ûyû wakwa ararî mûkuû, nwatî rîu nîmûriûku; ararî mûru nwatî rîu nîmwoneku.’ Na kwoguo nîmaambîrîrie gûkenanîra.

Luka 7:47

Kwoguo nie nîrakwîra atîrî, wendo mwîngî ûrîa mûndûmûka ûyû onania, nîûronania atî ke nîwoverwa mevia meengî. Nwatî mûndû wa wonthe woveretwe mevia manini, onanagia wendo mûnini.”

Ciîko 26:20

Nînaambîrîrie kûvunjîria andû ngîmeeraga atî nwanginya merire mevia mao, macokerere Ngai na meke ciîko cia kwonania atî na ma nîmerirîte. Nie naambire kûvunjia ûvoro ûyû Damesiki, ngîcoka ngîûvunjia Jerusalemu na vûrûrirî wonthe wa Judea na nginya kûrî andû a ndûrîrî.

Ciîko 3:19

Kwoguo îîrireni na mûcokerere Ngai nîguo ke amwovere mevia menyu. Na mwona mweka ûguo,

Jakuvu 1:15

Merirîria mau macûku nîmagîcaga îvu na magaciara mevia, namo mevia mau makûra maciaraga gîkuû.