Isaia 45:13 - ÎVUKU RÎA ÛVORO MWARO

¹³ Nînie nathire Cairasi avingie ûrîa nendaga na kîvooto, na nîngaarûngaria njîra ciake cionthe. Nîagaatuma rîngî îtûûra rîakwa Jerusalemu, na arekererie andû akwa arîa marî îthamîriorî. Ageeka ûguo atakûrîvwa kana avakwa kîveo.” Ûguo nîguo Ngai-Mûnene augîte.

Isaia 45:13 ပူးပေါင်းရင်းမြစ်များ

Ezira 1:3

Ngai nîekare namue muonthe arîa mûrî ake. Thiîni Jerusalemu nîguo mûgatumîre Ngai-Mûnene, Ngai wa andû a Isiraeli hekarû rîngî. Ngai ûcio nîke ûgoocagîrwa Jerusalemu.

Thaburi 65:5

We nîûcokagia mavoya metû na njîra ya gûtûva ûvootani, na nîwîkaga maûndû ma magegania nîguo ûtûvonokie, we nîwe kîîrîgîrîro Kîam andû onthe a nthî, na Kîam arîa marî mariarî marîa marî kûraca.

Nthi 3:6

Ririkanaga Ngai-Mûnene maûndûrî maku monthe, nake nîakaarûngaria njîra ciaku.

Isaia 13:17

Ngai-Mûnene arauga atîrî, “Nîngaaringîrîra Amede nîguo matharîkîre Babuloni. Mavûrûri mama matiûragia sîlûva, na matikenagua nî thaavu.

Isaia 14:17

Nîke watûmire nthî îtuîka ta werû, na agîcûkangia matûûra mayo, na akîgiria andû arîa moovetwe macoke kwao mîciî?’

Isaia 41:2

“Nû watûmire mûndû kuuma mwena wa îrathîro, na agîtûma athiî akîvootanaga kûndû kuonthe? Nînie ndûmaga avoote mavûrûri, na ngatûma athage athamaki, ndûmaga mavaraganue na rûviû rwake takwa marî rûkûngû, nîmanyaganagia na mîguî yakwa ta ûrîa macaki manyaganagua nî rûkûngi.

Isaia 41:25

“Nîndûmîte mûndû aume mwena wa rûgûrû nake nîmûku, nîmûthuurîte kuuma mwena wa îrathîro, nake nîagaakaîra rîîtwa rîakwa. Ke nîagaakinyanga athamaki ta yûmba, ta ûrîa mûmbi wa nyûngû akinyangaga yûmba.

Isaia 42:6

Nînie Ngai-Mûnene ngwîtîte wîke maûndû na kîvooto, nîngûnyitîte njara na ngakûgitîra. Na njîra yaku nîndûthîte kîrîkanîro na andû onthe, we ûgaatuîka ûtheri wa mavûrûri.

Isaia 44:28

Nînie mbîraga mûthamaki Cairasi atî: ‘We nîwe ûgaatuîka mûthamaki vandûrî vakwa, we nîûkaavingia mîvango yakwa yonthe: nîûkaathana Jerusalemu îtumwe rîngî, na mûcingi wa hekarû ûtumwe rîngî.’ ”

Isaia 45:2

Nie mwene nîngaagûtongoreria, ngîaraganagia irîma mbere yaku. Nîngaaunanga mîrango ya gîcango tûcunjî, na munange mîkîgo ya kuo ya cuuma.

Isaia 46:11

Nîngeta mûndû kuuma mwena wa îrathîro; mûndû kuuma vûrûri wî kûraca, nîguo eke maûndû marîa mbîrîgîrîrîte gwîka. Nînie mbugîte ûguo na nîngaavingia; nînie mvangîte ûguo na nîngeka guo.

Isaia 49:25

Nwatî Ngai-Mûnene arauga atîrî, “Wana indo irîa itavîtwe nî andû njamba nîigoocwa, na andû arîa movetwe nî njamba irîa irî vinya nîmakaavonokua, nîûndû nie nînie ngaarûa na andû arîa marûaga nawe, na nîngaavonokia ciana ciaku.

Isaia 52:5

Kwoguo rîu nie nîratetheka na ndûî, rîrîa ngwona andû akwa matavîtwe mana? Arîa mamathaga nîkwa maretîîa, narîo rîîtwa rîakwa rîcambagua vîndî cionthe. Ûguo nîguo Ngai-Mûnene arauga.

Mika 4:10

Mue andû a Jerusalemu, rîrani na mûthînîke nî ûrûrû ta wa mûndûmûka agîciara, nîûndû nîmûkuuma îtûûrarî rîîrî mûthiî mûgatûûre werûrî, nîmûkûthiî Babuloni. Nwatî mûrî kûu Ngai-Mûnene nîakaamûvonokia, na amûkûûre kuuma kûrî nthû cienyu.