Isaia 42:22 - ÎVUKU RÎA ÛVORO MWARO

²² Nwatî aya nî andû aîe indo na magatavwa, onthe nîanyitîre marimarî nî mûtego na makathithwa njeera. Mekariî ta nyamû iguîmîtwe matarî na mûndû wa kûmavonokia, Nî atave na gûtirî wa kuga atî: “Nîmacokue kwao!”

Isaia 42:22 ပူးပေါင်းရင်းမြစ်များ

Thaburi 102:20

Nîwegwire gûcaa kwa andû arîa ove, na akîrekereria arîa maatuîrîrîtwe kûûragwa.

Thaburi 50:22

“Îcirieni ûvoro ûyû, mue mûtatindanagîra nanie, mwarega nîmûcûkangie, na gûtirî mûndû ûkaamûvonokia.

Isaia 1:7

Vûrûri wenyu nî mûcûkangie, namo matûûra menyu makavîvua na mwaki. Ageni maregwatîra vûrûri wenyu wa mûkîonaga, na magacûkangia indo cionthe.

Isaia 14:17

Nîke watûmire nthî îtuîka ta werû, na agîcûkangia matûûra mayo, na akîgiria andû arîa moovetwe macoke kwao mîciî?’

Isaia 18:2

Vûrûri ûcio ûtûmaga anjaama makathiî na rûnjî rwa Nailo, marî matarûrî matumîtwe na mîrura. Thiîni mue anjaama aya mûthiîcaga na îvenya, thiîni vûrûrirî ûcio mûnene na ûrî vinya, vûrûri ûcio ûgaanîtue nî nyûnjî, ûrî andû araca na marî rûûo rûnyoroku, andû metigîrîtwe nî andû a nthî yonthe.

Isaia 24:18

Mûndû ûrîa ûkaaûra nî înegene, akaagwa îrimarî rîu; nake ûrîa ûkaauma îrimarî, akaagwatwa nî mûtego. Nîûndû ndirica cia îgûrû nî mvingûre, nayo mîcingi ya nthî nîîrainaina.

Isaia 24:22

Ngai nîakaamaûngania onthe vamwe îrimarî ta mîgwate; nîmakaavingîrwa njeera mîthenya mîîngî, na mîthenya îo yathira nîmakaaverithua.

Isaia 24:3

Nthî nîgaacûkangua yanangîke viû; nîûndû Ngai-Mûnene nîaugîte guo.

Isaia 36:1

Mwakarî wa îkûmi na îna Hezekia arî mûthamaki wa Juda, Senakeribu, mûthamaki wa Asîria nîwatharîkîre matûûra monthe ma Juda marîa magitîre na akîmagwata.

Isaia 42:23

Nû gatagatîrî kenyu ûgûtegera ûndû ûyû gûtû? Nû ûkaathikîrîria waro maûndû marîa magekîka?

Isaia 42:7

Nîûkaavingûra metho ma itumumu, nîûkaaruta andû arîa ove njeera, na ûrete ûtheri kûrî arîa mekaraga ndumarî.

Isaia 45:13

Nînie nathire Cairasi avingie ûrîa nendaga na kîvooto, na nîngaarûngaria njîra ciake cionthe. Nîagaatuma rîngî îtûûra rîakwa Jerusalemu, na arekererie andû akwa arîa marî îthamîriorî. Ageeka ûguo atakûrîvwa kana avakwa kîveo.” Ûguo nîguo Ngai-Mûnene augîte.

Isaia 5:29

Athigari ao mararamaga ta mînyambû, mararamaga ta mînyambû mîthî, înyitîte kîndû na îgakîvira kûndû kûraca, na gûtirî mûndû ûngîmîcuna.

Isaia 51:23

Nîngaacoka nengere gîkombe kîu andû arîa makûnyariraga, arîa maakwîrire atî, ‘Mama nthî nîguo tûvîtûkîrîre îgûrû rîaku;’ arîa maatwire mûkurukuthu waku ta nthî, na magîûtua ta njîra na makavîtûkagîrîra îgûrû.”

Isaia 56:9

Mue nyamû cionthe cia kîthaka, mue nyamû cionthe cia mûtitû, ûkani mûcûkangie andû akwa.

Jeremia 50:17

Ngai-Mûnene arauga atîrî, “Andû a Isiraeli mekariî ta ng'ondu ivinyûrîtue na ikanyaganua nî mûnyambû. Maambire kûtharîkîrwa nî mûthamaki wa Asîria, magîcoka makîtharîkîrwa nî Nebukadinezarû mûthamaki wa Babuloni.

Jeremia 52:31

Mwaka wa mîrongo îthatû na mûgwanja, tarîki mîrongo îîrî na ithano mweri wa îkûmi na îîrî, Jehoiakini arî mûthamaki wa Juda, Evilimerodaki nîwatuîkire mûthamaki wa Babuloni. Mwaka wa ûcio nîweguîrîre Jehoiakini ntha na akîmûrekereria akiuma njera.