Isaia 2:7 - ÎVUKU RÎA ÛVORO MWARO

⁷ Vûrûri wao wîcûrîte sîlûva na thaavu, na mûthithû wao ndûngîthira. Vûrûri wao wîcûrîte mbarathi, na ikaari ciao cia mbaara itingîtarîka.

Isaia 2:7 ပူးပေါင်းရင်းမြစ်များ

1Atha 4:26

Solomoni aarî na inyomba ngiri mîrongo îna (40,000) cia mbarathi cia gûkururia ikaari na andû ngiri îkûmi na igîrî (12,000) arîa maathiîcaga matûîte mbarathi.

Ayubu 3:15

Nîngîamamire vamwe na anene arîa maarî na thaavu, arîa mecûrîtie nyomba ciao na sîlûva.

Thaburi 20:7

Andû amwe metîîaga na ikaari ciao cia mbaara, nao engî magetîîa na mbarathi ciao, nwatî tue twîtîîaga na Ngai-Mûnene, Ngai wetû.

Isaia 30:16

Vandû va ûguo mue mwaugire atîrî, “Naarî! Tue tûkaavinyûra tûtwîte mbarathi irîa irî îvenya.” Îî nîguo, nîmûkaavinyûra na mbarathi irîa irî îvenya, nwatî arîa makaamûvinyûria makethîrwa matwîte mbarathi irî na îvenya makîria!

Isaia 31:1

Kaî arîa mathiîcaga Misiri gûcaria ûtethio marî thînarî-î, arîa mevokaga mbarathi nîûndû atî nî nyîngî, arîa mevokaga ikaari ciao cia mbaara nîûndû nî nyîngî, na athigari arîa mathiîcaga matwîte mbarathi nîûndû marî vinya nyîngî, nwatî matiîvokaga Ûrîa Mûtheru wa Isiraeli, kana maûria ûtaaro kûrî Ngai-Mûnene.

Isaia 57:17

“Narakarire nîo nîûndû wa mevia mao na ûkoroku wao, nînamaverithirie, ngîmatiganîria na ngîtûmbwa nî marakara. Nwatî nîmaûmirie kîongo na makîthiî na mbere kûrûmîrîra njîra ciao o ene.

Hosea 14:3

Vûrûri wa Asîria ndûgatûvonokia wana kana mbarathi cietû cia mbaara itûvonokie tûrî mbaararî. Tûtigeta mîvuanano îrîa tûmbîte na njara cietû ‘Ngai wetû.’ We nîwe wîgucagîra ciana cia ngoriai ntha.”

Mika 5:10

Ngai-Mûnene arauga atîrî, “Vîndî îo nîngathengutia mbarathi kuuma gatagatîrî kenyu, na njûkangie ikaari cienyu cia mbaara.

Kûguû 18:3

Mavûrûri monthe matuîkîte mîrîu ya merirîria macûku ma mwîrî. Athamaki a nthî nîmatharîtie nake. Nao avûri a mbiacara, matuîkîte itonga kuumana na merirîria meengî mûcûku make ma mwîrî.”