Hosea 9:4 - ÎVUKU RÎA ÛVORO MWARO

⁴ Matikarutîra Ngai-Mûnene matega ma ndivei wana magongoona mao matikamûkenia. Irugo ciao ikethîrwa ciîkariî ta irugo cia macakaya, andû onthe arîa makaairîa nîmakaagîa na mûgiro. Ikethîrwa irî irio cia kûmavaithia tu; itikavirwa hekarûrî ya Ngai-Mûnene.

Hosea 9:4 ပူးပေါင်းရင်းမြစ်များ

Ntha 29:40

Rutaga ndûrûme ya mbere vamwe na kilo îmwe ya mûtu ûrîa mûvinyu wa ngano ûtukanîtue na lita îmwe ya maguta maro ma ndamaiyû, na lita îmwe ya ndivei ya gwîtûrûrwa.

Ntha 40:23

Nîwacokire akiga mûgate ûrîa wategeretwe Ngai-Mûnene îgûrû rîa metha ya kîgongoona, wata ûrîa Ngai-Mûnene aathîte Musa.

Isaia 57:6

Mwocaga mathiga marîa manyoroku kuuma Kîamndarî. Mûmocaga mûkîmarutagîra matega ma kîndû gîa kûnyuwa na matega ma irio. Mwîciragia nîngenagua nî maûndû mau?

Isaia 66:3

“Andû arîa marutaga ndegwa îgongoona monaga arî ûndû ûmwe na kûruta mûndû îgongoona; arîa marutaga ng'ondu îgongoona monaga arî ûndû ûmwe na kuna ngui ngingo; arîa marutaga matega ma irio cia mûgûnda monaga arî ûndû ûmwe na kûruta îtega rîa nthakame ya ngûrwe; arîa marutaga îtega rîa ûbani monaga arî ûndû ûmwe na kûgooca mûvuanano. Andû acio methuurîrîte njîra ciao o ene, na makenaga rîrîa makûgooca Ngai na njîra itarî mbagîrîru.

Jeremia 16:7

Gûtirî mûndû ûkaarîcanîra kana anyunyanîra na mûndû wa wonthe ûkuîrîrîtwe, nîguo amûmîrîrie. Wana gûtirî mûndû wana ûrîkû ûkaaringwa nî ntha nîûndû wa mûndû ûrîa ûkuîrîrîtwe nî îthe kana ng'ina.

Jeremia 6:20

Mandetagîra ûbani wakî kuuma Sheba, kana mînyamû mînungi waro kuuma vûrûri wa kûraca? Matega menyu ma kûvîvua matingîtîkîrîka, kana ngenua nî magongoona menyu.”

Ezek 24:17

Caa ûtakugîrîria, na ndûgacakaîre ûrîa ûkuîte. Îyove kîremba na wîkîre iratû magûrû. Ndûgekunîke ûthiû na ndûkarîe irio irîa irîcagwa vîndî ya macakaya.”

Ezek 24:22

Mûgeeka wata ûguo nie nekire. Mûtigekunîke mothiû menyu kana mûrîe irio irîa irîcagwa vîndî ya macakaya.

Danieli 1:8

Nwatî Danieli nîwatuire atî ke ndangîîgwatia gîko na njîra ya kûrîa irio, kana kûnyua ndivei ya Mûthamaki. Kwoguo Danieli nîwaûririe Ashipenazi amwîtîkîrie ndakarîe irio icio nîguo ndakagwatwe nî gîko.

Hosea 3:4

Ûguo nwa ta guo andû a Isiraeli magatûûra îvinda îraca matarî na athamaki kana atongoria; matakûruta magongoona, itugî cia mathiga cia kûvoera, na matarî na efodi kana terafimu.

Hosea 7:16

Nîmagarûrûkîrîte ngai ya Baali, mekariî ta ûta mûregerû. Atongoria ao makaûragîrwa mbaararî, nîûndû wa ciugo ciao cia mwîtîîo. Kwoguo nîmakaanyararwa marî vûrûri wa Misiri.

Hosea 8:13

O nîmendete magongoona, na kûrîa nyama cia magongoona; nwatî nie Ngai-Mûnene ndikenagua nîo wana vanini; Ke aririkanaga mevia mao; na akamaverithia nîûndû wa mevia mao; nîakaamacokia Misiri ûkomborî.

Joeli 1:13

Mue athînjîri-Ngai, îkîrani nguo cia macakaya mûrîre, mue mûtungataga metharî ya kîgongoona rîrani. Thiîni hekarûrî na mûcakae ûtukû mûgima! Matega ma irio na ma ndivei matirî kuo nyombarî ya Ngai.

Joeli 1:9

Matega ma irio na ndivei nî mathiru hekarûrî, na mûromorî wa Ngai-Mûnene; athînjîri-Ngai nîmaracakaya nîûndû matirî na kîndû mangîtegera Ngai-Mûnene.

Joeli 2:14

Nwa kwîthîrwa Ngai-Mûnene Ngai wenyu nîakwîricûkwa, na amûve irathimo cia irio nyîngî, mûcoke mûmûrutîre matega ma irio cia mûgûnda na ndivei.

Alawi 17:11

Mwoyo wa indo cionthe irîa ivevaga ûrî nthakamerî, kwoguo mbathanîte atî nthakame yonthe îtûrûragwe îgûrû rîa metha ya kîgongoona nîguo îtheragie mevia ma andû onthe. Nthakame îthagîrwa îrî mwoyo, na kîu nîkîo gîtûmaga Ngai amîvûthîre gûtûtheria mevia.

Alawi 21:17

“Îra Aroni atî, gûtirî mûndû wanarî ûmwe wa njiarwa ciake ûrî na wonje ûkaandutîra matega ma irio. Watho ûyû nîûtûûra ûrûmagîrîrwa nginya tene.

Alawi 21:21

Gûtirî mûthînjîri-Ngai wa mbarî ya Aroni arî kîonje ûkaandutîra îtega rîa kûvîvua, nîûndû nî kîrema.

Alawi 21:6

Nwanginya methagîrwe marî atheru na nwanginya matîîage rîîtwa rîakwa, nîûndû nîo mandutagîra matega ma kûvîvua, kwoguo na nwanginya methagîrwe marî atheru.

Alawi 21:8

Tucagani mûthînjîri-Ngai mûndû mwamûre nîûndû nîarutagîra Ngai matega ma irio. Nie Ngai-Mûnene nîrî mûtheru na nînie nîmûtheragia.

Amosi 5:22

Wana mwandutîra matega ma kûvîvua na matega ma irio cia mîgûnda ndikaametîkîra. Na ndigetîkîra matega menyu ma thayû ma nyamû irîa noru.

Malaki 2:13

Îgûrû rîa maûndû mau monthe, nîmûconjoretie metha ya kîgongoona ya Ngai-Mûnene na methori, mûkîrîra mûgîcaaga nîûndû ndatindanagîra na magongoona menyu, kana amamûkîra.

Ndari 19:11

Mûndû wa wonthe ûkaavutia kimba Kîam mûndû akethagîrwa atarî mûtheru îvinda rîa mîthenya mûgwanja.

Ndari 28:2

“Atha andû a Isiraeli mandutagîre matega ma kûvîvua marî na mûtararûko mwaro îvinda rîrîa rîagîrîru.

Ndari 4:7

“Nîmagaatandîka itambaa cia rangi wa vururu îgûrû rîa metha ya mûgate ûrîa ûtegagîrwa Ngai-Mûnene. Nîmakaaigîrîra îgûrû rîa metha îo thaani, iciko, na mbakûri irîa ciîkagîrwa ûbani na irîa ivothagîrwa na mîtûngi ya matega ma indo cia kûnyuwa. Mûgate ûkethagîrwa îgûrû rîa metha vîndî cionthe.

Johana 6:51

Nie nînie mûgate wa mwoyo ûrîa wanyûrûrûkire kuuma îgûrû. Mûndû wa wonthe ûrîcaga mûgate ûyû, agaatûûra tene na tene. Mûgate ûyû nî mwîrî wakwa ûrîa ngaavecana nîguo andû magîe na mwoyo.”

Gûco 26:14

Ndiarîa gîcunjî gîa îkûmi vîndî îrîa naacakayaga; kana nîkîruta nîrî na gîko, kana nîkîrutîra akuû. Nîmbathîkîrîte ûrîa wonthe Ngai-Mûnene, Ngai wakwa augîte, na ngeeka maûndû monthe marîa ambathîte mbîke.