Hosea 2:7 - ÎVUKU RÎA ÛVORO MWARO

⁷ Nîakaarûmîrîra arata ake, nwatî ndakamoona; nîakaamacaria; nwatî ndakamoona. Nake nîagaacoka auge atîrî, “Nîngûcoka kwa mûthuuri wakwa wa mbere; nîûndû vîndî îo narî mwaro gûkîra rîu.”

Hosea 2:7 ပူးပေါင်းရင်းမြစ်များ

2Maû 28:23

Nîwarutire magongoona kûrî ngai cia andû a Damesiki arîa maamûvootire akiuga atî, nîûndû ngai icio nîciatethirie Asîria ciavota kûmûtethia wanake. Nwatî ûndû ûcio nîwatûmire acûkangue wa vamwe na vûrûri wonthe wa Isiraeli.

Thaburi 116:7

Ngoro yakwa, gîa na thayû, nîûndû Ngai-Mûnene nîambîkîte maûndû maro.

Isaia 30:16

Vandû va ûguo mue mwaugire atîrî, “Naarî! Tue tûkaavinyûra tûtwîte mbarathi irîa irî îvenya.” Îî nîguo, nîmûkaavinyûra na mbarathi irîa irî îvenya, nwatî arîa makaamûvinyûria makethîrwa matwîte mbarathi irî na îvenya makîria!

Jeremia 14:22

Kûrî ngai cia mîvuanano mavûrûri ingiurithia mbura? Kana îgûrû rîo rîene riurithie mbura, kinthî tîwe Ngai-Mûnene Ngai wetû? Twigîte mwîvoko wetû kûrî we, nîûndû nîwe wîkaga maûndû mama monthe.

Jeremia 2:2

“Thiî wanîrîre andû onthe a Jerusalemu makîgucaga ûmeere Ngai-Mûnene arauga atî, “Nînîraririkana ûrîa warî mwîvokeku vîndî îrîa warî mwîthî, na ûrîa wamendete rîrîa warî mûviki, wana ûrîa warûmanagîrîra nanie werûrî, vûrûrirî ûrîa ûtaanavandwa kîndû.

Jeremia 2:28

Nwatî irîkû ngai cienyu icio mwîrûthîrîte? Nîciûkîre, ethîrwa nwa ivote kûmûtethia, vîndî îrîa mûrî thînarî. We Juda mwîgana wa ngai ciaku nîta mwîgana wa matûûra maku.

Jeremia 2:36

Wocaga ûvoro wa kûgarûrûka na ûvûthû nîkî ûkagarûrîra mîthiîre yaku? We nîûgûconorithua nî andû a Misiri, wata ûrîa waconorithirue nî andû a Sîria.

Jeremia 3:1

Mûndû mûrûme angîta mûka, na athiî akînagûrwa nî mûndûmûrûme wîngî, mûndû mûrûme ûrîa wamûvikîtie mbere, nwa acokerere mûndûmûka ûcio rîngî? Na kinthî gwîka ûguo tî kûgwatia vûrûri wonthe mûgiro? Nwatî we Isiraeli nî ûvûrîte ûmaraa na anyanya engî, rîu we ûrenda kûnjokerera? Ûguo nîguo Ngai-Mûnene arauga.

Jeremia 31:18

“Nîmbîguîte Efiraimu akîaria arî na kîeva, ‘We nîûnthomithîtie kwathîka, nanie ngathîka, ta gacaû gatamenyeretue gwîkîrwa îcoki. Njokia kûrî we na nîngûgûcokerera, nîûndû we nîwe Ngai-Mûnene Ngai wakwa.’

Jeremia 31:32

Kîrîkanîro kîu gîtikethîrwa gîkariî ta kîrîa narûthire na methe mao vîndî îrîa naamarutire Misiri na njara yakwa nie mwene. Nîmaaregire kwathîkîra kîrîkanîro kîu, wana ethîrwa nie narî ta mûthuuri kûrî o.

Jeremia 44:17

Nwatî ûrîa wonthe twîvîtîte nîtûgwîka, nîguo tûgwîka. Nîtûkûvîvîria ngai yetû îrîa îtagwa mûthamaki wa mûndûmûka wa kûu îgûrû, na twîtûrûre ndivei nthî îrî îgongoona kûrî ke wata ûrîa twekaga methe metû, athamaki etû, na atongoria etû tûrî matûûrarî ma Juda na njîrarî cia Jerusalemu. Vîndî îo twarî na irio cia kwîgana, twarî athatûke, na tûtiarî na thîna.

Ezek 16:18

Wocire nguo ciaku irîa ciarî ng'emie irîa nakûveere na ûgîciîkîra mîvuananorî îo, na ûkîmîrutîra matega ma maguta makwa na ûbani wakwa.

Ezek 16:8

“Rîrîa navîtûkîrîre vakuvî nawe rîngî, nînoonire atî nama warî mwîrîtu mûkinyiu wa kûmbwa. Nînarutire nguo yakwa ya îgûrû ngîgûkunîka nîguo ûthithe njaga. Nîtwarîkanîre nawe atî nîtûkûvikania, nawe nîwatuîkire wakwa.” Ûguo nîguo Ngai-Mûnene arauga.

Ezek 20:32

Ûguo mûtuîte na ngoro cienyu gûtingîvoteka, nîûndû mûrauga atî nîmwenda kûvanana na ndûrîrî irîa ciîngî, irîa igoocaga mîtî na mathiga.”

Ezek 23:12

Nîweriragîria andû a Asîria, atongoria, anene a athigari a mbaara, athigari njamba arîa meethagîrwa meyovete indo ciao cia mbaara, athigari arîa maathiîcaga mekarîrîte mbarathi. Onthe acio maarî anake ethî na athaka.

Ezek 23:22

“Kwoguo we Oholiba Ngai-Mûnene arauga atîrî, “Rîu nîngûtûma anyanya aku arîa watiganîrie magûkîrîre. Magaagûkîrîra kuuma na mîena yonthe.

Ezek 23:4

Ûrîa mûkûrû eetagwa Ohola, nake ûrîa mûnini eetagwa Oholiba. Nao nîmaatuîkire aka akwa, magîciara anake na erîtu. Marîîtwa mau mao, Ohola nî Samaria, nake Oholiba nî Jerusalemu.

Danieli 4:17

Îtua rîîrî rîathanirwe kûvîtûkîrîra kûrî mûrangîri ûrîa mûvinyaru. Kwoguo andû onthe a nthî nîmamenye atî Ûrîa ûrî Îgûrû Mûno nîke wathaga mothamaki na andû, na nîke ûvecanaga ûthamaki kûrî mûndû ûrîa akwenda, wana ethîrwa nî mûndû ûrîa ûtarî îgweta.”

Danieli 4:25

We nîûkengatwa ume kûrî andû ûthiî ûgatûûranagie na nyamû cia kîthaka, na ûtuîke wa kûrîcaga nyaki ta nyamû cia kîthaka. Ûkararaga nja na ûrivagwe nî îme îvinda rîa mîaka mûgwanja, nîguo ûmenye atî Ngai ûrîa wî îgûrû mûno nîke wathaga mothamaki monthe ma nthî na avecanaga ûthamaki ûcio kûrî mûndû wa ûrîa angîenda.

Danieli 4:32

We nîûkengatwa ume kûrî andû, ûthiî mûgatûûrage na nyamû cia kîthaka. Ûkaarîcaga nyaki ta ndegwa îvinda rîa mîaka mûgwanja. Vîndî îo nîûkaamenya, atî Ngai Ûrîa ûrî Îgûrû Mûno nîke ûrî vinya îgûrû rîa mothamaki monthe ma nthî na nîavecaga mûndû wa ûrîa akwenda ûthamaki.”

Danieli 5:21

Nîwarutirwe gatagatîrî ka andû namo meciria make nîmaagarûrûkire magîtuîka ta ma nyamû. Ke aatûûranagia na nyûmbû, aarîcaga nyaki ta ndegwa, na aararaga nja akîrivagwa nî îme, nginya rîrîa atî Ngai Ûrîa ûrî Îgûrû mûno nîke wathaga mothamaki ma andû na nîke ûthuuraga ûrîa akwenda athanage mothamakirî mau.

Hosea 1:2

Rîrîa Ngai-Mûnene ambîrîrie kwaria na andû a Isiraeli na njîra ya Hosea nîwamerire atîrî: “Thiî ûgûre mûndûmûka mûmaraa na mûgîe ciana nake na njîra ya ûraa, nîûndû andû a vûrûri ûyû nîmareka mevia meengî mûno nîûndû wa kûndiganîria.”

Hosea 13:6

Nwatî rîrîa mwarîre mûkîvaa, nîmwambîrîrie gwîtîîa, nginya mûkîriganîrwa nînie.

Hosea 14:1

Mue andû a Isiraeli, cokererani Ngai-Mûnene Ngai wenyu, wîvia wenyu nîguo ûtûmîte mûvîngwe.

Hosea 2:16

Nie Ngai-Mûnene nîrauga atîrî: “Mûthenya ûcio we ûkambîta ‘Mûthuuri wakwa’ na ndûkambîta ‘Baali yakwa’ rîngî.

Hosea 5:13

Rîrîa andû a Efiraimu mamenyire kûrîa marwarîte, na andû a Juda makîona ironda ciao, andû a Efiraimu nîmaathiîre Ashuru, kûvoya ûtethio kûrî mûthamaki mûnene; nwatî mûthamaki ndavota kûmathondeka, wana ndavota kûvonia ironda ciao.

Hosea 5:15

Nîngaacoka gîkarorî gîakwa na nîmetheme, nginya rîrîa makavera mevia mao na manjokerere. Mathîna mao nîmagaatûma manjarie makiugaga: