Gûco 32:39 - ÎVUKU RÎA ÛVORO MWARO

³⁹ “Menyani rîu atî, Nie nînie Ngai; na gûtirî ngai îngî tiga nie. Nînie mbûragaga na ngariûkia, nînie nguraragia na ngavonia, gûtirî mûndû ûngîvota gûtethûra mûndû njararî ciakwa.

Gûco 32:39 ပူးပေါင်းရင်းမြစ်များ

2Atha 20:5

“Coka kûrî Hezekia, mûtongoria wa andû a Ngai-Mûnene Ngai wa aguo Daudi, ûkamwîre nînegua îvoya rîaku na nînona methori maku. Nîngûkûvonia, na vuva wa mîthenya îthatû nîûkaathiî hekarûrî.

2Atha 5:7

Rîrîa mûthamaki wa Isiraeli aathomire maarûa îo, nîwatûmbirwe nî marakara na agîtembûranga nguo ciake na akiuga atîrî, “Mûthamaki wa Sîria areciria nie nî Ngai ûngîvota kûûraga mûndû na akamûriûkia, nwa nvote kûvonia mûndû ûyû mûrimû wake mûcûku wa ngothi? Roria rîu wone ûrîa arenda twambîrîrie kûnegenania nake!”

Nehemia 9:6

Ezira nîwavoire akiuga atîrî, “We, Ngai-Mûnene, we wenga nîwe Ngai-Mûnene; nîwe waûmbire îgûrû na ûkîûmba njata cia matuurî, nîwe waûmbire nthî, îria na ûkîûmba indo cionthe irîa irî kuo, nîwe waiveere mwoyo cionthe. Maavinya ma îgûrû nîmenamagîrîra magakûgooca.

Ayubu 10:13

Nwatî wîthîrîtwe ûthithîte maûndû mama monthe ngororî yaku, na nîmbicî nîwavangîte kûmbîka maûndû mau monthe.

Ayubu 10:7

We nîwicî atî ndirî mwîviu, na atî gûtirî mûndû ûngîndethûra kuuma kûrî we.

Ayubu 5:18

Nîûndû ke nîativagia nwatî nîacokaga akamwova, na nîatemaga mûndû na akamûvonia.

Thaburi 102:27

Nwatî we ndûgarûrûkaga, na ûtûûraga tene na tene.

Thaburi 102:28

Ciana cia ndungata ciaku igaatûûraga irî ngitîre, nacio njiarwa ciao igaatûûra ciîkindîrîtie varî we.

Thaburi 18:31

Ngai-Mûnene wenga tu, nîke Ngai, Ngai wenga tu, nîke ûtûgitagîra.

Thaburi 50:22

“Îcirieni ûvoro ûyû, mue mûtatindanagîra nanie, mwarega nîmûcûkangie, na gûtirî mûndû ûkaamûvonokia.

Thaburi 51:8

Mbîcûria gîkeno na ûnjanjamûre; na wana ethîrwa nî ûnthirîtie vinya, nî ngwîcûrwa nî gîkeno rîngî.

Thaburi 68:20

Ngai wetû nîke ûtûvonokagia; nîke Ngai-Mûnene, Mwathani wetû, ûrîa ûtûvonokagia kuuma gîkuûrî.

Thaburi 86:10

We wî mûnene na nîwîkaga maûndû ma magegania; we wenga tu nîwe Ngai.

Ntha 15:26

Nîwacokire akîmeera atîrî, “Nie nînie Ngai-Mûnene, Ngai wenyu na nînie nîmûvonagia. Ethîrwa mue mûkambathîkagîra na kinyi na mwîkage ûrîa kwagîrîrîte methorî makwa, nie ndikaamûtûmîra mîrimû ta îrîa naatûmîre andû a Misiri.”

Ntha 4:7

Nake Ngai-Mûnene nîwerire Musa rîngî atîrî, “igîrîra njara yaku rîngî kîthûrirî gîaku.” Nake nîwekire guo. Na rîrîa aamîrutire vîndî îo njara îo yarî na vinya na nîyonekaga îkariî ta mwîrî ûcio wîngî.

Mûvunjia 3:3

Kavinda ga kûûraga na kavinda ga kûvonia, kavinda ga kwomomora na kavinda ga gûtuma.

Isaia 19:22

Ngai-Mûnene nîakaaverithia andû a Misiri, acoke amavonie; nao nîmakaamûcokerera nake nîakegua mathaithana mao na amavonie.

Isaia 30:26

Makîria ya ûguo, mweri nîûkaara ta riûa, naguo ûtheri wa riûa ûneneve maita mûgwanja ta ûtheri wa mîthenya mûgwanja warîte mûthenya ûmwe. Ûguo nîguo gûgekara mûthenya ûrîa Ngai-Mûnene akoova ngurara na avonie ironda cia andû ake kûrîa aamativangirie na rûthanju rwake.

Isaia 41:4

Nû watûmire maûndû mau monthe mekîke? Nû wavangire ûrîa maûndû marûmanagîrîra kuuma Kîammbîrîria? Nie Ngai-Mûnene, naarî kuo kuuma Kîammbîrîria, na nînie ngethîrwa kuo nginya kîrîkîro.

Isaia 43:10

Ngai-Mûnene arauga atîrî, “Mue Aisiraeli mûrî aira akwa; namûthuurire mûtuîke ndungata ciakwa, nîguo mûûmenye na mûmbîtîkie, gûtirî ngai îngî tiga Nie. Na mûmenye atî nie nînie Ngai, gûtirî ngai îngî yarî kuo mbere yakwa na gûtikaagîa.

Isaia 43:12

Ngai-Mûnene augîte atî: Nînaamenyithanirie maûndû marîa magekîka, ngîanîrîra na ngîvonokania, gûtiarî na ngai îngî ng'eni gatagatîrî kenyu; na mue mûrî aira akwa.

Isaia 43:13

Nie nînie Ngai na nîndûûra nîrî Ngai. Gûtirî mûndû wanarî ûmwe ûngîîvonokia kuuma njararî ciakwa; gûtirî mûndû ûngîndigîrîria ngîruta wîra wakwa.”

Isaia 45:18

Ngai-Mûnene ûrîa waûmbire îgûrû nîke Ngai! Ûrîa waûmbire nthî na agîtûma îgîe nîke wamîvandire; ndaamîûmbire îthîrwe îtarî na thayû na îtarî kîndû, aamîûmbire nîguo îtûûragwe. Nîke ûrauga atîrî, “Nie nînie Ngai-Mûnene, na gûtirî ngai îngî.

Isaia 45:22

“Njokererani nîguo mûvonokue, andû a nthî yonthe! Nîûndû nie nînie Ngai na gûtirî wîngî.

Isaia 45:5

“Nie nînie Ngai-Mûnene na gûtirî ngai îngî tiga nie. Nînie ngûmenyagîrîra, wana ethîrwa ndûmbîcî,

Isaia 46:4

Nie nînie Ngai wenyu na nîndûûra nîmûmenyagîrîra nginya ûkûrûrî wenyu wana rîrîa mûkaauma mbuî. Nie nînie namûmbire na nîndûûra nîmûmenyagîrîra; nîngaamûkuua na nîmûvonokie.

Isaia 48:12

Ngai-Mûnene arauga atîrî, “Tanthikîrîria we Jakovu, tanthikîrîria we Isiraeli ngîgwîta! Nie nînie Ngai-Mûnene, nînie wa mbere na nînie wa mûthiia!

Ezek 37:12

Kwoguo marathîre ûmere, nie Mwathani Ngai-Mûnene mbugîte atî mue andû akwa nîngaavingûra mbîrîra cienyu na nîmûriûkie kuuma mbîrîrarî cienyu na nîmûcokie vûrûrirî wa Isiraeli.

Ezek 37:3

Nake nîwambûririe atîrî, “We mûndû, mavîndî mama nwa macoke gûtûûra mwoyo?” Nanie nînaamûcokerie atîrî, “Mwathani Ngai-Mûnene, we nwawe wicî!”

Hosea 5:14

Nie ngethîrwa mbîkariî ta mûnyambû kûrî Efiraimu, ngethîrwa mbîkariî ta kaana ka mûnyambû kûrî Juda. Nie mwene nîngamatarûranga tûnuku ngînathiî, nîngamoca na gûtirî mûndû ûkaamavonokia.

Hosea 6:1

Ûkani tûcokerere Ngai-Mûnene; ke mwene nîatûgurarîtie, nwatî wake mwene nîagûtûvonia. Ke mwene nîatûtivangîtie, nwatî ke mwene nîagûtûthondeka kûrîa tûtivangîtue.

Mika 5:8

“Andû a Isiraeli arîa magatigara marî mwoyo, marî mavûrûrirî marîa mengî, makeethagîrwa mekariî ta mûnyambû ûrî gatagatî ka nyamû cia kîthaka, kana ta kaana ka mûnyambû karî ndîthiîra ya ng'ondu. Kathiîcaga na gakaûraga na gûtamburûranga kîrîa kaûragîte, na gûtirî mûndû wa kûivonokia.

Johana 8:24

Na nîkîo namwîra atî mwona mwathiî na mbere na kwîvia, mûgaakua. Na mûgaakua mûrî wana mevia menyu angîthîrwa mûtigwîtîkia atî ‘Nie Nînie Nie’ ”

Gûco 32:12

Ngai-Mûnene ke mwene nîke watongoririe andû ake, na gûtirî ngai îngî yamûtethererie.

Gûco 4:35

Mwonirue maûndû mau nîguo mûmenye atî Ngai-Mûnene nî Ngai, na gûtirî wîngî tiga Ke.

Gûco 7:9

Menyani nama atî Ngai-Mûnene, Ngai wenyu nîke Ngai, na nî mwîvokeku. Ke nîavingagia kîrîkanîro gîake na arî wendo ûtathiraga, kûrî njiarwa ngiri cia andû arîa mamwendete na mavingagia maathani make.

Ahib 1:12

We nîûgaaikûnja ta îgooti, na nîigaacenjua ta nguo. Nwatî we ndûcenjagia na ûtûûro waku ndûkaathira.”

Kûguû 1:11

Naguo mûgambo ûcio waugire atîrî, “Andîka ûrîa ûrona na ûtûme îvuku rîu makanitharî marîa marî matûûrarî marîa mûgwanja. Namo nî: Efeso, Simurina, Perigamu, Thîatira, Saridi, Filadelifia, na Laodikia.”

Kûguû 2:8

“Andîka kûrî mûraika wa kanitha ûrîa ûrî Simurina atîrî: “Îno nîyo ndûmîrîri kuuma kûrî ûrîa arî ke wa mbere na wa mûthiia, Ûrîa wakwire na akîriûka.

1Sam 2:6

Ngai-Mûnene nîke ûûragaga andû na nwake ûmavecaga mwoyo, nîke ûviraga andû kwa arîa akuû na akamaruta kuo.