Gûco 1:7 - ÎVUKU RÎA ÛVORO MWARO

⁷ Ambûrani magema na mûthiî na mbere na rûgendo nginya mûkinye vûrûrirî ûrîa ûrî irîma wa Aamori, na icunjî cionthe irîa ithiûrûrûkîrrîtie vûrûri ûcio: na nîkuo Araba, vûrûri ûrîa ûrî irîma, nthî ya irîma, na Negebu. Mûthiîni vûrûrirî wa Kanaani na mûvîtûke irîma cia Lebanoni mûkinye rûnjîrî rûnene rwa Farati.

Gûco 1:7 ပူးပေါင်းရင်းမြစ်များ

Kîam 12:9

Nake Aburamu nîwathiîre na mbere na rûgendo rwake erekerete Negebu.

2Sam 8:3

Daudi nîwacokire akîvoota Hadadezeri, mûvîcî wa Rehobu. Hadadezeri aarî mûthamaki wa Zoba kûrîa kwarî Sîria. Daudi aavootire mûthamaki ûcio rîrîa mûthamaki aathiîte gûkûûra vûrûri wake ûrîa warî vakuvî na rûnjî rwa Farati.

1Maû 18:3

Daudi nîwatharîkîre mûthamaki Hadadezeri wa Zoba vakuvî na vûrûri wa Hamathi. Vîndî îo Hadadezeri aageragia kûnenevia ûthamaki wake ûkinye mwena wa îgûrû wa rûnjî rwa Farati.

1Maû 27:29

Shitirai wa kuuma Sharoni aarî mûnene wa ûrîthi ûrîa warîthagua Sharoni. Nake Shafati mûvîcî wa Adilai aarî mûnene wa ûrîthi ûrîa warîthagua ciandarî.

1Maû 5:9

Andû aya nwa matûûraga na mwena wa îrathîro nginya rûtere rwa werû vakuvî na rûnjî rwa Farati nîûndû maarî na indo nyîngî cia kûrîthia irîa ciongererekete marî vûrûrirî wa Gileadi.

Ntha 23:31

Nîngekîra mîvaka ya vûrûri wenyu kuuma îriarî rîrîa Îtune nginyagia îria rîa Mediterania, na kuuma werûrî nginyagia rûnjîrî rwa Farati. Nîngaatûma mûvoote andû arîa matûûraga vûrûrirî ûcio, na nîmûkaamengata maume kuo.

Amosi 2:9

“Kûnarî ûguo, mue andû akwa, nînathiririe Aamori viû nîûndû wenyu, arîa maaracavîte ta mîtarakwe, na maarî na vinya ta mîtî ya mîvuru, na nînacûkangirie mvûa vamwe na mîri.

Ndari 10:12

Nao Aisiraeli nîmaambîrîrie rûgendo makiuma werûrî wa Sinai. Îtu nîrîathiîre rîkîrûngama werûrî wa Parani.

Gûco 1:19

“Nîtwekire wa ûrîa Ngai-Mûnene, Ngai wetû aatwathire twîke. Nîtwaumire kîrîmarî gîa Sinai na tûkîthiî tûvîtûkanîrîtie werûrî mûnene warî na guoya ûrîa mwonire na vûrûrirî ûrîa ûrî irîma wa Aamori, na tûgîkinya Kadeshi-barinea.

Gûco 11:11

Nwatî vûrûri ûrîa mûkwîgwatîra mwaringa Jorodani, nî vûrûri ûrî irîma na cianda, vûrûri uraga mbura.

Gûco 11:24

Kûrîa kuonthe mûkaavîtûkîrîra, gûkethîrwa kûrî kwenyu. Vûrûri wenyu ûkeethîrwa umîte werûrî nginya Lebanoni, na kuuma rûnjîrî rwa Farati nginya îria rîa Mediterania mwena wa îthûîro.

Josh 1:4

Mîvaka ya vûrûri wenyu îkethîrwa yumîte werûrî mwena wa îveti nginya mwena wa rûgûrû irîmarî cia Lebanoni. Na kuuma îriarî rîa Mediterania rîrîa rîrî mwena wa îthûîro nginya rûnjîrî rûrîa rûnene rwa Farati, ûvîtûkîrîrîte vûrûrirî wa Ahiti.

Josh 10:40

Kwoguo Joshua nîwarûire mbaara na akîvoota vûrûri wonthe. Nîwavootire athamaki a vûrûri wonthe ûrîa ûrî irîma, Negebu kûndû kûrîa kwaraganu na inyûrûrûkorî, na athamaki a mwena wa îthûîro ûrîa werekerete irîma. Andû onthe nîmaaûragirwe nî Joshua marî na athigari ake a mbaara. Joshua eekire ûguo nîûndû nîguo aathîtwe nî Ngai-Mûnene, Ngai wa Isiraeli.

Josh 24:15

Ethîrwa mûtikwenda gûtungatîra Ngai-Mûnene, thuurani ûmûnthî ûrîa mûgatungatagîra. Thuurani kana nîkwa mûgatungatagîra ngai irîa methe menyu ma tene maatungataga marî Mesopotamia kana ngai cia Amori. Nwatî nie na andû a nyomba yakwa tûgaatungatagîra Ngai-Mûnene.”

Josh 9:1

Ûvootani wa andû a Isiraeli nîwamenyirwe nî athamaki onthe arîa maarî mwena wa îthûîro wa Jorodani, mavûrûri marîa maarî irîmarî, ciandarî na arîa maarî rûtererî rwa îria rîa Mediterania nginya mwena wa rûgûrû wa Lebanoni. Acio onthe maarî: mûthamaki wa Ahiti, Amori, Akanaani, Aperizi, Ahivi na wa Jebusi.

Kûguû 9:14

Naguo mûgambo ûcio nîwerire mûraika wa gatandatû atîrî, “Rekereria araika ana arîa movetwe vau rûnjîrî rûnene rwa Efarati.”