Ezek 7:11 - ÎVUKU RÎA ÛVORO MWARO

¹¹ Mbûkanîrîro nîîngîvîte mûno. Gûtirî wanarî ûmwe wao ûgaatigara, kana indo irîa magîte nacio itigare, kana ûtonga, kana gûtigare wanarî mûndû ûrî na riiri.

Ezek 7:11 ပူးပေါင်းရင်းမြစ်များ

Thaburi 125:3

Arîa aganu matigûtûûra mathanaga vûrûri wa arîa athingu; nîguo arîa athingu matikagucîrîrue gwîka naaî.

Thaburi 73:8

Manyûrûragia andû arîa engî na makaria maûndû macûku, nî etîi na mavangaga ûrîa makûvinyîrîria arîa engî.

Thaburi 78:64

Athînjîri-Ngai ao nîmaaûragîrwe mbaararî, na aka ao a ndigwa matiamacakaîra.

Isaia 14:29

“Mue andû onthe a Filisiti, mûtigakene, atî nîûndû mûragi ûrîa mwarivirwe naguo nî munîkangu; nîûndû njoka îtarî ûrogi nîgaaciara kîmvuva, nakîo kîmvuva nîgîgaaciara njoka mbaganu makîria.

Isaia 5:7

Nîûndû mûgûnda wa Ngai-Mûnene mwene vinya wonthe nî nyomba ya Isiraeli. Andû a Juda nîo mîthavibu mîaro îrîa aavandire; eevokaga nîmagwîka ûrîa kwagîrîrîte, nwatî vandû va ûguo, nîmaûraganîte; eevokaga nîmakwîthîrwa marî athingu, nwatî vandû va ûguo nîmaatûmire kûgîe na kîrîro.

Isaia 9:4

Nîûndû nîunangîte îcoki rîrîa rîamaritûvîrîte, na ûkaunanga mûtî wa kwigîrîra ciande ciao. Nîunangîte rûthanju rûrîa rwavinyagîrîria andû aku, wata ûrîa wavootire athigari a mbaara a Midiani.

Jeremia 22:18

“Kwoguo ûvoro wîgiî Jehoiakimu mûvîcî wa Josia mûthamaki wa Juda, Ngai-Mûnene arauga atîrî: Gûtirî mûndû ûkaamûcakaîra akiugaga, ‘Ûûi mûrwaiya! Kana ûûi mwarwaiya! Gûtirî mûndû ûkamûrîrîra akiugaga, Ûûi mwathi wakwa! Ûûi mûthamaki wakwa!’

Jeremia 25:33

Mûthenya ûcio andû arîa makaûragwa nî Ngai-Mûnene makanyagania kuuma mûthiia ûmwe wa nthî kûthiî ûrîa wîngî. Matigacakaîrwa, matikaûnganua kana mathikwa; makanyagarûkua nthî ta irûndo cia thumu.

Jeremia 6:7

Wata ûrîa kîthima kigaga manjî matheru, nwa guo Jerusalemu igaga waganu, mbaara na wanangi ciîguîkaga kuo, andû arwaru na marî na ironda nîmonaga vîndî cionthe.

Jeremia 7:34

Na kûu matûûrarî ma Juda na tûcîrarî twa Jerusalemu nîngatûma gûtikegue mûgambo wa kûthekania na wa gîkeno, mûgambo wa mûviki na mûvikania, nîûndû vûrûri wonthe ûgatwîka îganjo.”

Ezek 45:9

Ngai-Mûnene augîte atîrî, “Mue anene a andû a Isiraeli nîmwîvîtie vandû va kavinda karaca. Thirwani nî waganu na mûtige kûvinyanîrîria mwîkage maûndû ma kîvooto na ma waragania. Tigani kûvinyûria andû akwa kuuma vûrûrirî wao. Nie Ngai-Mûnene nînie nauga ûguo.

Ezek 5:11

“Kwoguo, nie Ngai-Mûnene, wata ûrîa ndûraga mwoyo, nîûndû nîmûgwatîtie nyomba yakwa mûgiro na njîra ya gwîka maûndû macûku, nîngaamûrega muonthe ndakwîguîra mûndû wana ûrîkû ntha.

Ezek 5:4

Nîûgoca tûcuîrî twîngî na ûtûikie mwakirî tûvîe viû. Mwaki nîûkaauma vau na ûtambe kûrî andû onthe a Isiraeli.”

Ezek 6:11

Ngai-Mûnene augîte atîrî, “Inainia njara ciaku na ûringithie magûrû maku nthî na uuge: Wûi nîûndû wa maûndû marîa marî mûgiro manekwa nî andû a Isiraeli. Andû a Isiraeli nîmakaaûragwa nî mbaara, yûra na mîrimû.

Ezek 7:16

Andû arîa makaavonoka nîmakaaûra na mathiî magekarage irîmarî, magîcayaga ta ndutuura cia ciandarî, wa mûndû nîûndû wa mevia make.

Ezek 7:2

“We mûndû, îra andû a Isiraeli atî nie Ngai-Mûnene mbugîte ûyû nî mûthiia! Ûyû nî mûthiia wa vûrûri wonthe!

Ezek 7:23

“Thondeka nyororo, nîûndû vûrûri wîcûrîtwe nî ûragani na matûûra magecûrwa nî mbaara.

Ezek 8:17

Ngai-Mûnene nîwambîrire atîrî, “Mûndû, nîwona maûndû mau? Maûndû mau marî mûgiro andû a Juda mareka marona arî ûndû mûnini, nîûndû nîmatûmîte vûrûri wonthe ûgîe mbaara na magatûma nthiî na mbere kûrakara? Taroria, nîmarandakaria makîria!

Amosi 3:10

Ngai-Mûnene arauga atîrî, “Maigaga indo irîa maîîte na macunanîte na vinya nyombarî ciao. Kwoguo matimenyaga gwîka maûndû marîa magîrîru.

Amosi 6:3

Mue mûgeragia kûrega mûthenya mûcûku, nwatî mûgetîkîra arîa maathanaga na vinya.

Mika 2:2

Meriragîria mîgûnda, makathiî na makamîoca; meriragîria nyomba, makathiî na magacioca; mavinyagîrîria mûndû na andû a mûciî wake, na magacuuna andû indo ciao.

Mika 3:3

Mûrîcaga nyama cia andû akwa, mûkamaruta rûûo mîrîrî yao, munangaga mavîndî mao, na mûgatinangia nyama ciao tûcunjî tûcunjî ta cia kûrugwa na nyûngû.

Mika 6:12

Andû arîa itonga nîmaverithagia andû arîa athîni, na muonthe mwîcûrîtwe nî maveeni.

Zefania 1:18

Mûthenya ûcio wa marakara ma Ngai-Mûnene sîlûva ciao kana thaavu ciao itikaavota kûmavonokia. Nîûndû wa mwaki wa wîru wake, nthî yonthe nîîkavîa. Nîakaathiria na îvenya arîa onthe matûûraga nthî.”

Jakuvu 2:13

Nîûndû Ngai ndakeegua ntha agîcirithia andû arîa mategucanagîra ntha, nwatî mûndû ûrîa wîgucanagîra ntha ndageetigîra îtuîro.